Faigofie pe ā ola magafagafa

By Ilia L Likou 28 September 2017, 12:00AM

E leai se mea e maua ma le filemu. O le olaga nei, e mafua ona ola falōlō le tagata o le nofoa’i. 

 Ae a galue punoua’i le tagata, tusa lava pe timu’ia pe lāina, e manuia lava aiga ma ola fiafia le fanau.

O le finagalo lea o Toma Folau, 46 le matua o le soifua o Faleula-Uta.

“Ia o le taimi lenei o lea ua nofo le fai e fai le togā kapisi ma ua fesoasoani tele lava i si o’u aiga.

“Na ou faigaluega muamua ia ae ua nofo fo’i o nisi o tulaga e le maa’alofia ma o lea lava le tulaga o lo’o va’ava’ai aga’i i ai – o le galue lava.

“Ua o tatou iloa ua le’o toe faigofie nei aso, ae o le taumafai lava i nisi o vaega mo aiga.

Na ia fa’ailoa o le itu faigata i le taimi lenei o le le mafai ai lea ona maua gofie oni galuega.

“Ia e a’u ia e le’i lelei ni a’u aoga, ma o le faigata lava lea ona maua ni galuega i le taimi lenei.

“O le tele lava o galuega o lo’o fa’alagolago i le lelei o aoga, e pei o lea lava le tulaga o lo’o ua tilotilo ai fo’i i le fa’aaogaina lelei o le ele’ele ina ia mafai ona fa’aaoga aua tupe maua o aiga.

Na ia ta’ua e fa’apea   “E le faigofie le olaga o lo’o tatou ola ai,” o lana fa’aaliga lea i le Fofoga o Samoa. 

“A le galue lava le tagata, e le mafai ona fafaga le aiga. 

“E tusa lava pe timu pe la, a na’o nofonofo ma fa’atalitali, na’o le fiaola le mea e maua. 

“E pei ona tou tau mai na ou alu atu e fa’asavali a’u fusi kapisi, ia lea e tusa ma le $30 la’u tupe lea na maua mai ai.

 “Po’o le a foi lava le ituaiga tau e iai, e le mafai ai lava ona tu’ua le mea e tatau ona fai, auā o le mea lea o lo’o fa’amoemoe iai le manuia o aiga ma tausi ai le fanau.

Na ia fa’ailoa o uiga fesuisuia’i o le tau o se tasi lea o itu faigata i le taimi lenei.

“E le faigofie fo’i auā e tele lava ina a’afia le tele o mea tōtō pe a mugalā. 

“Ona e tele lava ina mama’i ai  lau o kapisi, ia ae o lo’o fa’aaoga lava nai metotia laiti mo le tineia o vaega nei.

O le taimi lenei o lo’o tilotilo fo’i se galuega e mafai ona maua.

By Ilia L Likou 28 September 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>