Ua i a’ao o le Loia Sili le mana’o o Falealupo

30 December 2015

Ripotia e Tusitala a le 

Samoa Observer

Fa’aliliu e Maiava

Ua lafo atu nei i a’ao o le Loia Sili a le Malo ma lo latou Ofisa le mana’o o le afio’aga o Falealupo mo se taui talu ai le fa’aleagaina o lo latou si’osi’omaga ma le gataifale ona o le suau’u na masa’a ai.

Na fa’amaonia mai lea tulaga e le Ofisa Sili o le Matagaluega o Galuega, Fela’ua’iga ma Galuega Tetele a le Malo, o Va’aelua Nofo Va’aelua, e tali ai i se tala sa fa’asalalauina i le Samoa Observer o le Aso 17 o Tesema 2015.

O le fa’aaliga a le Ofisa Sili, na ta’ua ai, ua lafo atu nei le mana’o o Falealupo i le ofisa o le Loia Sili mo se fautuaga fa’aleTulafono, e fuafua fo’i i mana’oga o le Tulafono o Va’a 1998, e uiga i mea fa’aleagaina ma galuega toe-fa’aleleia e mo’omia.

ADVERTISEMENT

Peita’i na te’ena e Va’aelua se vaega o lea tala na lomia, lea e fa’apea ai, “sa faia se su’esu’ega e le komiti a le malo e aofia ai sui mai le Matagaluega o Galuega, le Matagaluega o Puna’oa ma le Si’osi’omaga fa’apea le Vaega mo le Puipuiga o le Si’osi’omaga o le Pasefika (le SPREP)”.

Na ta’ua fo’i i lea tala, “…na fa’atoa faia lea tulaga ina ua fa’ailoa atu le mana’o o Falealupo mo se taui ona o le fa’aleagaina o le si’osi’omaga, ina ua oso i le a’au i gataifale o le afio’aga se va’a-fagota a le Kamupani o le Apia Deep Sea Fishing, e le gata ua fa’aleagaina ai ‘amu ma le a’au ae masa’a ai fo’i ma suau’u i le gataifale”. 

Na ta’ua e Va’aelua, e ao ona fa’asa’o ia fa’amatalaga mo le silafia lelei e le mamalu o le atunu’u. 

“O le nofoaga tonu lea na malepe, ua leva ona aloa’ia ma avea o se nofoaga-fa’asaina a’o le’i fa’alauiloaina mai le mana’o o Falealupo mo se taui e miliona tala,” o le fa’aaliga lea na tu’uina mai e le Matagaluega.

“E fa’apena fo’i i le su’esu’ega sa faia, e fia iloa tonu ai le mafuaga o le pa’ulia o le va’a, o mea na fa’aleagaina e aofia ai fo’i le su’esu’eina o le suau’u na masa’a e tusa o mana’oga o le Tulafono mo Va’a 1998. 

 “O sui o le Komiti sa faia le ulua’i su’esu’ega, e aofia ai sui mai le Matagaluega o Galuega, Fela’ua’iga ma Galuega Tetele a le Malo, le Pulega o Uafu, le Matagaluega o Puna’oa ma le Si’osi’omaga, o sui o le kamupani i le lotoifale fa’apea sui o le va’a-fagota na leaga. E le’i iai se sui o le Vaega mo le Puipuia o le Si’osi’omaga o le Pasefika, i totonu o le Komiti lea.”

E le fia fa’aalia se finagalo o le Faipule Falealupo ua loa i le Palemene, o ‘A’e’au Peniamina Leavaise’eta, e uiga i lea tulaga. 

O le va’a-fagota lea ua ta’ua na masa’a le suau’u, na osofa’ia le a’au o le afio’aga ia Oketopa, ina ua “faitau-sese le tau” e le Kapeteni, na mafua ai ona oso i luga o le a’au ma pa’ulia ai.

E 12 le ‘auva’a sa i luga o le va’a-fagota i lea taimi. 

30 December 2015

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?