‘E le saisaitia le Malo e ni faiga faa-tamaiti ma le faavalevalea’

17 February 2016, 12:00AM

Faaliliu e Seagaitumua Tupuola

 

O loo tumau pea le teena e le Palemia o le Malo Tuilaepa Sailele Malielegaoi, ma lana tautoga e faapea o le a  le “noatia” lana pulega e ni “faiga faa-tamaiti ma le faavalevalea a le Itu Agai.” Na faaalia e Tuilaepa lea manatu e ala i se pepa o faamatalaga na tuuina mai e le Vaega o Failautusi a le Malo ananafi, e tali mai ai i se faasilasila o se lafo mo se Faaiuga Faalaua’itele ma ni Poloaiga e Taofia ai na faaulu e le Tautua Samoa Party i le vaiaso talu ai. 

 “E le noatia le Malo e nei faiga faa-tamaiti ma le faavalevalea a le Itu Agai,” o le faaupuga lea e faaapea na fai e Tuilaepa.  

“E mataga.   Mo le Itu Agai na te faamata’u le malo e pei lava o se atigi kalone 44 pe a ta i se pate kirikiti Samoa e 2 i le 4 inisi. E matua ‘o’ō ma uiga ese lana tatagi.”O lea tagi na faaulu i le Faamasinoga Sili i le aso 10 o Fepuari 2016, o lea lafo poo le tagi ua faatulaga mo le fofogaina i le aso 22 o Fepuari, ma o loo talosagaina ai le Faamasinoga ina ia “faasa” sui uma o le Kapeneta poo le malo o loo vaaia nei le atunuu “mai le talosagaina e avea ma sui faatutu mo le Faiga-palota Lautele o loo loma nei. 

O lea foi talosaga o loo talosagaina ai le Faaiuga Faalauiloa e faailoa atu ai e faapea o le Kapeneta o loo vaaia nei le malo “ e le o ia te ia se malosi faale-tulafono e faatino ai tiute tau le pulega o le malo o Samoa.” E tusa ai ma lea Lafo, o le leai o se malosi faale-tulafono o le itu tete’e e afua mai le soli o le Faavae o Samoa mataupu 32 (1) e ala i le soli o le faiga masani o le Tiute Fai faatasi. Ae peitai-fai mai le Palemia o Tuilaepa o lea gaoioiga e polokiki ma fai mai o loo tilotilo o ia i luma i le lu’itau ua una’ia e “loia o le vaomatua” a le Itu Agai.

 “O le ta’ua o le Faavae e avea ma mafuaga mo le latou fuafuaga ua tumu saisai i polokiki o se ata vaaia lea o le le popona i le tulafono,” o le faaaliga lea a Tuilaepa. 

 “Afai o manatua e se tasi, o le teuteuina o le Faavae na faatu atu talu ai nei e le malo i le Palemene e faasino i nofoa e lua Tu-Taulaga i totonu o le Maota ua tuuina atu ai ni mafaufauga taua i le itu agai.

Ina ua agai mai lea teuteuga mo le faitauga lona tolu ma le faamaoniga mulimuli, e na o Leala, (Lealailepule Rimoni Aiafi, lea sa avea muamua ma Fofog o le Itu Agai) na lagolagoina le teuteuga o le faavae.”

 “E leai se tasi o Faipule o le Itu Agai se’ia vagana ai Lealailepule sa malamalama e faapea o le teuteuga o le Tulafono o Faiga-Palota mo le faavaeina o ni nofo se lua i totonu o le taulaga e le mafai ona taogifia e aunoa ma le toe teuteuina muamua o le Faavae. 

 “Ia e faapefea la ona mafai ona latou talanoa i le Faavae ae leai se mea e tasi latou te iloa e uiga i le Faamaumauga pa’ia a lo tatou atunuu?” 

Na ta’ua foi e le Palemia e faapea o le ta’ua o le faamavae ma le loto i ai o le Minisita muamua o Tupe e fai ma faata’ita’iga  o le latou tagi i le faamasinoga o se mea sese maoa’e lea i le itu i le faaiuga. “O le faamavaega o se faaiuga fetuutuuna’i lea a le Minisita muamua e taofi ai le maopoopoga o la matou Pati,” o le faaaliga lea a Tuilaepa. “ O nei mau tala feavea’i i lea taimi, na faa-satauro e le Minisita lona tiute  mo le maopoopoga o le Pati.”

“Sa ‘ou talosagaina le Ofisa o le Loia Sili a le Malo ina ia fai se suesuega pe i ai soo se tulafono ua soli e le Minisita ma o le tali na faataatia i totonu o le Kapeneta na faamamaina ai le Minisita. Sa ‘ou faamatalaina foi i totonu o la’u tusi na lomia faasalalau e le Samoa Observer i le Aso To’ana’i na soso’o ma le Aso Maliu 2015 le faavalevalea o tuuaiga na fai. 

“Ua ‘ou le fiafia ona ua se’e loia o le vaomatua a le Itu Agai i lenei tulaga maulalo tele e faasese ai tagata palota. “Ae poo le a lava, ou te fia vaai lava i auiliiliga o le latou gaoioiga ua tuuina atu i le faamasinoga ia o le a sili atu lo’u fiafia e tali auiliili atu i ai.” 

17 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>