O fa’afitauli e una’ia i luma atina’e

VM
By Vatapuia Maiava, 09 October 2016

O To’oto’o Hansel o se tinā ua loa tausaga o ia fa’atauina la’au ma fugala’au mo teuga ‘ese’ese mo so’o se sauniga, fa’atasiga i totonu o Savai’i.

“Ia ua fai si leva ona ou fa’atau atu la’au tōtō i’inei i Savai’i.” o lana saunoaga  lea i le fa’atalatalanoaga ma le Fofoga o Samoa.

“Ia e mo le silafia ai, ia o i’inei i Savai’i e mo’i lava ae telē lava lona ‘ese’esega ma Upolu, aua e tele tagata fa’atau e le gata i la’au ae o fugāla’au.

“Ua silafia fo’i o Upolu e le umi lava ona fa’atau vaega nei ae uma.

“Ae pei o Savai’i, ia se’iloga lava o ni fa’atasiga po o ni sauniga tetele fa’atoā fa’atau lea e tagata o vaega nei.

“Ia e le gata la i la’au ae o lo’o i ai fo’i nai nisi o vaega o lo’o fai ma tua i ai le aiga i le tele o taimi , ma o le olaga lenei, o la’u ia mau i ai, e leai lava se atina’e  e leai ni fa’afitauli.

“E mana’omia lava le tu’u atoa i ai o le taimi ona solosolo lelei lava lea o le tele o vaega fa’atino , aua lava tausiga o aiga, nu’u ma le ekalesia.

ADVERTISEMENT

Na fa’ailoa e Tootoo e ui i fa’afitauli ae o le onosa’i lava.

“Ia e pei ona ta’ua muamua e i ai lava vaega po’o nai fa’afitauli laiti ona e tau leai ni fa’atau.

“Ae e le’o avea lea ma vaega e solomuli ai ma fa’avaivai le ola galue ma taumafai, e leai se agaga fa’apena o i a te a’u.

“Atonu lava e i ai lava se taimi oi luma ia ona tele lea o ni tagata fa’atau, ma e le fa’apea o le a tutusa ai fo’i aso uma.

“O a’u ia o lo’o taumafai lava, o le a se atina’e ia e pei o vaega nei ou te faia, o le maua lava o le onosa’i.

“Ae a leai fo’i fa’afitauli ia e le mafai ona alualu i luma le tele o taumafaiga tatou te naunau e fa’atino aua le tausiga o aiga.

“Ia o lo’u fale e i ai lava le fa’ailoilo o lo’o tu i luma o le auala, ma a i ai lava le tagata e mana’omia ni la’au ia po’o ni fugāla’au fo’i ia e afe mai lava ma fa’atau atu i so’o se taimi.

“E pei o le itu faigofie lena aua e le tau tele ni feuiaiga e faia, na o le afe sa’o atu lava i tua ia ma filifili e le tagata ana la’au o lo’o mana’omia ia ona fa’apea lea ona ou fa’atauina atu.

“Ae o le tulaga lava ia i’inei i le motu , ia o le galue lava ma ia aua ne’i fiu gofie.

VM
By Vatapuia Maiava, 09 October 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?