Galue malosi le tama mo lona aiga
O se tasi lea o tama e 50 le matua o lona soifua, mai le nu’u o Solosolo ma sa ia ta’ua i le Fofoga o Samoa, e galue malosi ma fa’amaoni aua e le mana’o e maua e lana fanau se lumana’i e pologa ai.
“O le tau o ole soifuaga ua matua ova le taugata, o se mea fo’i e fa’atiga i tagata,” o le tala lea a Savea i le Fofoga o Samoa.
“E le’o se mea la e ono toe fa’amatala atu aua ua tatou iloa uma le taugata loua iai nei.
O Savea e to’avalu lana fanau ma o le tasi o atali’i o lo’o faigaluega i Niu Sila, o ia lea e tele na fa’amoemoe ai le aiga i mea e fai.
I le tulaga ua o’o ai le olaga, sa fa’apea Savea, o le tali sa’o a o le i’u lelei o a’oga a tamaiti. O se mea taua lava lenei itu.
“Ou te fia fautuaina fo’i le tele o matua, e sili atu le fa’amuamua o a’oga a fanau.
“To’a’aga e ‘ave le fanau i le a’oga. Fautuaina latou e fa’amalolosi e fai meaa’oga ma va’ai lelei po’o lelei le faiga o meaa’oga aua a le fa’amaoni, e le i’u manuia.
E galue malosi pea le tama aua le fa’atupeina o a’oga a lana fanau.
“O le matou aiga e fai le ma’umaga. O le ma’umaga la lea e maua ai le tupe e totogi ai pili aoga, fai ai fa’alavelave ma isi tiute fai.
“O la’u a ia fautuaga e fai so’o i la’u fanau, o le galue malosi e taua aua a leiloa galue, o lona uiga o le’a fa’alagolago i isi tagata e tausi latou.
O le ma’umaga fo’i lea e aumai ai me’aai a le aiga.
“O le ma’umaga e aumai ai mea’ai a lo’u aiga ma e fa’atau atu fo’i isi mea mata aua se tupe,” o lana tala lea.
“Ae ou te masalo o le tele o taimi matou te mana’omia ai se tupe, o taimi la ia o fa’alavelave ma isi mea fai, a o mea’ai a ia e maua i aso mai le ma’umaga, ma ou te fa’afetaia lena itu aua e leai ai so’u loto popole.
“E le fa’apea la ua ou faiatu ona fa’apea ai lea o lo’o le pologa lo’u aiga, leai e iai a taimi matou te mana’omia ai le fesoasoani.
O se fautuaga taua lava mai lenei tama mo isi tagata aemaise matua, ia taumafai ma aua le fa’avaivai i lenei olaga.
“Ia tatou fa’amalosi ‘au i le fanau e fa’amaoni i le a’oga aua o lumana’i lelei o aiga e afua mai le fanau pe’a lelei i le a’oga.
“E tatau fo’i ona iloa e le fanau, o latou e fa’amoemoe ai o latou aiga.
“E tatau na fa’aaoga lelei le tomai aua e le’o toe faigofie le olaga.
“Fa’atino mai le itu lea ae aua na’o le tele o tala.
Sa ta’ua fo’i e le tama, o le lalolagi e le’o toe selau pasene sona lelei.
“A le afu la le tagata e galue mo sona lumana’i, e leai a se mea lelei e maua.
“Ia e pei o se fautuaga lena mo tagata uma o Samoa, aua ou te mana’o e toe fa’aleleia lo tatou atunu’u.