1. Matauina i Tala Fou se ulutala fai mai –“O loo suesueina e Leoleo se gaoiga e ‘afa miliona tala-ma o loo faaauau pea suesuega a Leoleo. E tusa ai la ma faamatalaga na tuuina mai i le Samoa Observer e le Yazaki Ed Samoa-o lea tupe tele e faapea na faaaoga i se faiga e le talafeagai ai-e se Tausitusi Sinia ia Mati o le tausaga nei ma o lea la tagata faigaluega -ua faate’a ina ua mae’a suesuega i totonu o le ofisa.

E le’i faailoa maia la se finagalo o le Pule Sili o Funefe’ai Oliva Vaai e uiga i lea itu-se’ia vagana ai e faapea -o lea mataupu ua tuuina atu i le Ofisa o Leoleo. Ina ua fesiligia la pe moni ua tuua le atunuu e lea tagata-fai mai Afamasaga e leai sona iloa i lea itu!

Ia-atonu e le o se mea fou lenei mea-ae afai tatou te fesili pe ua mafua isea ona tula’i soo mai lenei solitulafono-faamata e le mafua mai le mativa poo le taumafai e soifua ia sili atu i lo mea e mafai ona maua?A toe faaupu-faamata e le mafua mai ona ua taugata tele le tau o le soifua ma soo se mea i totonu o le atunuu? Afai la o le pogai lea ua mafua ai- ona ua matitiva le atunuu-o le a la se mea e tatau ona fai e le faigamalo e fo’ia ai lenei faafitauli?

Ae afai foi e mafua ona ua matua taugata mea uma i totonu o Samoa-aisea na tatou le mafaufau ai i lea tulaga i le taimi o le faiga-palota talu ai nei? Afai la ua pologa le atunuu-ia atonu o le taui lena o le le manatunatu lelei-talu ai-e uma  le lima tausaga ona faatoa fai lea o le isi palota-o se matua taimi umi lava-ma e le o se manatu e avane ai-ae masalo e o’o atu i le isi faiga-palota-ua maliliu se vaega toatele o le atunuu!

Ae ia manatua lelei-afai o le faaiuga lea na outou faia i le taimi o le faiga-palota talu ai nei-ia o lea lava ua outou toe tofo i ai! O le a sou taofi?

2. Matauina foi i Tala Fou se ulutala fai mai ua asiasi mai se alii poto Mosalemi-ma ua aumai ai ma se faaupuga e faapea o se valaau talu ai nei ina ia tapu le Isalama- e se ta’ita’i sinia o se ekalesia i Samoa nei-o se faamanatu lea o le aiaina o Samoa e le lalolagi ma le faatinoina o talaiga e ala i le aveeseina o isi.

Afai la e le o talia e Samoa le talitonuga Mosalemi-e mafua ona e le talitonu i le Atua Soifua e pei o Ekalesia Kerisiano. Afai foi ua tatou faalogo i le tele o vevesi i totonu o atunuu o i ai nei tapuaiga-o lona uiga la-e le manaomia e Samoa ni vevesi.

Afai ua uma ona faata’oto le Faavae o Samoa e pei ona faatinoina e Matua ua tofafā mai Tia Sa-o “Samoa e faavae i luga o talitonuga faa-Kerisiano ma lana aganuu-o le a la le pogai o le aumai fua o isi tapuaiga e fete’enai ma talitonuga faa-Kerisiano o loo faavae ai le Malo Tuto’atasi o Samoa? O le a sou taofi? 

3. Matauina foi i Tala Fou se ulutala fai mai ua falepuipui mo le olaga atoa se alii ona o le maliu o lona to’alua i le tausaga talu ai i Le’auvaa. O lea la alii o Toni Eteuati ma na tuuina atu i le Falepuipui i le vaiaso nei e le Faamasino Sili-Lana Afioga Patu Tiava’asu’e Falefatu Sapolu.

O lea la tina o Fatima Tupa’i ua maliu- e faapea na tatu’i i se maa a o momoe ma lana fanau e to’alua. Fai mai la na tuua e lenei tina Eteuati ona o le saua-ona alu lea ma ave lana fanau ma nonofo i le fale o le tina o lona tina.

O le maliu la o lea tina ua tula’i mai ai le anoano o faaseā-aemaise ai lava mai le Vaega mo e Puapuagatia a Samoa…! O le fesili la-aisea ‘ea ua saga tulai mai ai sauaga i totonu o aiga ? Afai e leai se mea a le faigamalo o faia i ai-o le fesili la-e faapefea pulega a Alii ma Faipule?

A tuu ai lava lenei faatautala e faifai pea? E avatu fanau pele a isi ae fai ma polotu’i a isi tagata? O le a le aoga o le aganuu e faasino i le va o le tama tane ma le tama fafine? A tuu ai lava la lenei faatautala e saga fai pea? O le a sou taofi? 

4. Matauina foi i Tala Fou le sainia e le Minisita o Faatoaga ma Faigafaiva o ni feagaiga tau faigafaiva. O ia la feagaiga e faasino i le atiina a’e ma le pulea o faigafaiva. O moomooga la o le loto-talosia o loo saini ai ma ni aiaiga tau le tapulaa o laisene tau faigafaiva i le sami o Samoa-e tatau ona tuuina atu!

Ia manatua fo’i-e anoano laisene fagota ua uma ona tuuina atu e le Malo o Samoa-i kamupani faifaiva mai fafo e fagotaina ogasami o Samoa-ma talosia o loo totoe ai pe ni i’a mo le fofoga taumafa o le atunuu.

Ae o le itu e sili ona taua-o ni tupe a le atunuu e maua mai nei faigafaiva-talu ai-ailoga o i ai se tasi o malamalama i nei mea uma aemaise ai o ni tupe e maua mai ai- vagana ai le Palemia ma lana faigamalo? O le a sou taofi?