Fa’amuamua Aiga

SS
By Sarafina Sanerivi, 04 January 2017

O le finagalo o le tama ia Kerisimasi Ioane mai le afioaga o Malie, o le fe’au aupito lava ona taua i le olaga o so’o se Samoa, o le tausiga lea o lona aiga.

Na fa’aalia mai e le tama ia Kerisimasi i Fofoga o Samoa i le aso ananafi, po’o a lava feau ma tiute ese’ese, o le aiga lava e tatau ona ave iai le fa’amuamua.

Na ia ta’ua foi lona agaga fa’afetai tele i le Atua ua aulia ma le manuia mai lenei tausaga fou. 

“Ua tuana’i atu foi leaga ma fa’aletonu o le 2016 ae o le taimi lenei o le aga’i lava i luma ma ia suia ma fa’aleleia olaga mo le lumana’i.

“O le mea taua lava ia i le olaga o so’o se Samoa, o le fa’aleleia lea ma le atina’eina lea o aiga.

“O le tausiga lava o aiga le mea e taua ma ave i ai le fa’amuamua.”

Na ta’ua e Kerisimasi, e le’i leva ona toe tau amata si o latou aiga i Malie, ona sa latou nonofo ai i Eva i le aiga o lona to’alua i Eva.

ADVERTISEMENT

“O matou sa matou nonofo i Eva i le aiga o lo’u to’alua. Ae o a’u oute sau mai iinei le afioaga lenei o Malie. Sa matou nonofo la i Eva, ae o lea foi ua maua mai le avanoa matou te omai ai ma mafuta i si o matou aiga iinei i Malie. 

“O lea la fa’ato’a tau amatamata atu si o matou aiga iinei ona o lea sa nonofo i Eva. Ia o le olaga a ia i Samoa, e sui lava le tausaga, ae tumau lava mea e fai. 

“O uta lava ia le vao le feau tele a aiga e fai. Pei o le tele lava o aiga o lo’o fa’amoemoe lava i fa’atoaga aua meaai a le aiga ma maua mai ai mea e tausi ai le aiga. 

“O le tele lena o feau a tagata e fai i le aso, na’o le faiga lava o feau i le ma’umaga.

“O lo’o lelei lava le olaga i Samoa i lenei vaitau. O le atina’eina lava o aiga le mea e taua. O le faigata lava o le tau sailiga o mea’ai aua o le mea lava lea e naunau ai ina ia maua ni meaai e tausi ai le aiga. 

“Aua o a’u ou te faigaluega, ae o lea ua fa’aaoga lenei aso malolo e fai ai sina fe’au aoga mo le aiga.”

Na ia ta’ua foi, e masani lava ona fa’atauina atu fua o a latou fa’atoaga i le tele o taimi ma maua ai se fesoasoani mo ia ma lona aiga.

“O le tuagane lava o si o matou tina o lo’o feagai ma le va’aiga o le ma’umaga. Ae pei o lea ua fesoasoani malosi ai i galuega i uta i le ma’umaga manu ua maua sia avanoa.”

Na ia ta’ua foi, nap au lava lona fa’anaunautaiga i lenei foi tausaga fou ua amata, o le fa’aleleia lea o lona aiga ma una’ia le fanau i le aoga. 

“O le fuafuaga mamao lava o lo’o iai ia una’ia le aoaoga a fanau. O fanau o le lumana’i lea o aiga ma nu’u. A lelei lava ona fa’afailele o latou olaga, e fa’apena foi ona fa’aeaina.”

SS
By Sarafina Sanerivi, 04 January 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?