Fai se amataga fou

SS
By Sarafina Sanerivi, 04 January 2017

“E aoga mea na tutupu e toe fotua’i ai se moemoe fou mo lenei foi tausaga.”

O lea le finagalo o le taule’ale’a ia Malu Ualesi mai le afioaga o Faleula. 

Na ta’ua e Malu, a’o tatou iai i le amataga o lenei tausaga, e taua lava le toe tu ma tepa i futia ua sola ma a’oa’oina mai ai la tatou folauga o lenei foi tausaga fou.

“O le tausaga fou lenei, e tatau lava ona tatou toe to manatu i fa’aletonu o le tausaga ua mavae atu ina ia mafai ona tatou maua mai ai ni lesona taua aua foi le aga’i i luma o le ola.

“O le olaga lenei o lo’o agai pea i luma e le’o tumau lava i se mea e tasi. E taua lava la le tagai ini fa’aletonu sa faia ma mea na tutupu i le 2016 e toe timata ai le upega aua le agai i luma.

“O iina tatou te maua ai ni manatu ina ia fa’aleleia ai o tatou olaga.”

O Malu o lo’o faia le faiva o le tausi aiga i le taimi lenei. 

Ma o lona fa’anaunautaiga o lo’o iai, o le fa’alelei lea o lana tautua ma ia fa’aaoga tatau lona talavou e tautua ai lona aiga.

ADVERTISEMENT

“E sili lava le fa’aaoga tatau o le malosi manu o maua. Tatou te le’o iloa po’o le a le mea e tupu a taeao, ae o lo’u manatu, e sili le fa’aaoga tatau o le malosi ma le talavou i le taimi nei ina ia maua ai se manuia o aiga.

“O lo’o talavou lava le ola i le taimi nei ma o le fa’anaunautaiga ina ia fa’aaoga tatau mo fe’au a le aiga.”

Na ia fautuaina foi ona uso talavou ina ia fa’aaoga tatau le malosi ma taleni mai le Atua.

“E tofu lava le tagata ma taleni mai le Atua. E ese’ese foi a tatou tofiga ma tiute e tofia ai i tatou.

“Ae o le mea taua o le fa’amaoni ma ia ola finafinau.

“O a’u ia o le faiga lava o meaai a le matou aiga ma galue i le ma’umaga. O a’u foi o lo’o nafa ma le va’aiga o fanua o lo’o galulue ai lo matou aiga.

“E tele lava fe’au ma tiute i totonu o aiga e tatau mo le tupulaga.” 

Na ta’ua foi e Malu, e sili lava ia te ia le olaga i nu’u i tua ona o lo’o mamalu ai pulega a alii ma faipule.

“E leai lava se vevesi ona o lo’o lalo o le va’aiga a alii ma faipule.

“E le taitai foi iai nisi e fa’atupu fa’alavelave i nu’u i tua.”

SS
By Sarafina Sanerivi, 04 January 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?