O TIA O LE VAVAU I LETUI

05 August 2016

Mai le Tusi o le “Suaga a le Vaatele”

O le nuu lenei e faafeagai tonu lava ma le nuu tuai o Aveavai i luga o le sami. O Aveavai e pei ona ta’ua i luga, na faatama’ia e le Afi o le 1726. E le o toe vaaia lenei nuu i ona po nei- aua ua lilo atoa i le Lava. O le ala savali i Aveavai-o se ala matagofie-aua e le fitā e pei o le ala i Anini. E te savali i le laulelei ma le paolo o le vaomatua i taimi uma. E te muamua taunuu i le Papalaulelei lamolemole e pei o le kapeta uliuli-ona e faalogoina lea o le fati o galu ma le gogolo o le Pupū.

E te vaaia pe a e taunuu- le moana sausau e leai sona tulu’iga. O iinei e fagogota ai le nuu o Letui. O se nofoaga e to’afilemu-e le uma le fia vaai i le mata’utia o galuega a le Silisili Ese. Sa matauina e lua lava fili o lenei nofoaga, o le “namu” ma le “suavai”-ae mafai lava ona e moe i luga o le Papa Laulelei- i soo se taimi e te loto i ai.Ou te manatu ana moe Iakopo i le Papa Laulelei, ailoga e tasi sana miti na fai? E lua ni ana o loo i Letui, o le ‘Ana Pe’ape’a’ lea e taatia lava i tafatafa o le Ala Taavale, ma le ‘Ana o le Sau’ai’-lea e tau maomao ese i le ituala i tai.

ADVERTISEMENT

O le loloto o le Ana Pe’ape’a e 60 mita ma e tumu i manulele e igoa o ‘pe’ape’a’. E le toatele nisi ua o’o i le Ana o le Sau’ai, ma e le o iloa foi poo ai le igoa o le Sau’ai-a’o anafea na nofo ai i lea nofoaga. O le mea lea-e sili ona to’atele tagata latou te iloa le “Ana Pe’ape’a”

MATᾹVAI I SAFUNE: O totonu-ga-lemu  o lenei nuu- e i luga o le sami-lea o loo i ai le vai o le “Mataolealelo.” O se vai e logologoā ona tala-ona o le malūlū. O soo se tagata ese lava e faamalū ai-e seāseā lava ona sao ai, ae gasegase tigaina ona o le malulū. O se vai e puna mai lalo-ma o se puna ailoga e mate. E i ai le vai-inu, le vaega e faamalū ai tama’ita’i faapea foi ma alii. E le o se vai e soona fai ai ni taelelga-aua e i ai ona tapu.

O le igoa le vai lenei- e pogai mai se talatu’u e faapea: “Na alu Sina i le isi aso-ao nonofo ona matua i Maugaloa- i le mea e igoa o ‘Vaiolei’a’-e asu vai. Ina ua fo’i ane-sa alu ane ma le ‘tama’i tuna’ e fai ma ana fagafao. Ona tausi lava lea e le teine lenei I’a. Ua vave ona tupu tele le i’a. Ona ave lea  ua tu’u i le tanoa ma’a. Ua tupu pea le i’a-ma ua ave ai loa tuu i le tanoa tele. E le’i umi ni aso- ae le ofi. Ona toe ave foi lea ua tu’u i le Vaiolei’a, peita’i-ua le lava foi.

Ona amata loa lea ona tau mulimuli le I’a ia Sina i soo se mea e alu i ai. Ua iloa e Sina o lana fagafao o le meaola-ae amio faa-tagata. Ua amata foi ona iloa e Sina-o fea lava e alu i ai-e mata’itu lava e le Tuna. A nofo toatasi le tamaitai i se mea- e ese lava amio a le meaola e fai ia te ia. Ua amata ona fefe Sina i le Tuna-ona sola ai lea. Peitai-sa tuliloa lava e le Tuna-ona amata ai loa lea o le tuligasi’a- se’ia pa’ia le mea o i ai nei le vai o le “Mataolealelo.” Fai mai le Tala-o iinei-na sa’i ai le tamaitai ma faapea ana upu-“A o mata ‘ea la o le alelo”. Ona maua ai lea o le igoa o le Vai-o le “Mataolealelo.”

PAIA- O le afioaga lenei o se nu’u e i gauta o Safotu ma Samauga-i le Itu o Tane. O se aai matagofie e faataamilo lona atu-falega i totonu o le aai. O totonu o le aai o loo tu ai se maupu’epu’e o loo tu ai se fale e tasi. O lea maupu’epu’e fai mai le mau a le nuu-o iinei tonu lava- na tūtū ai le ‘ava lea na se’i e Mausautele. O le igoa o lea ‘ava’ o le “Tolua’i’ava” lea fai mai sa falala ona ‘ata i luga o le sami-ma sa malolo ai tautai i lona paolo-ma fai le latou ‘aleaga.

(E faaauau pea)

05 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?