TALOFA E SAMOA-UA AMATA ONA MANUNU MA MASOFASOFA LOU FAAVAE POPO

23 May 2016

E faatalofa ma faafeiloa’i atu Samoa i lenei taeao fou-ma e talitonu le faamoemoe-o loo maualuga pea le aoina o le masina i Aiga ma latou Tama-o Tama ma o latou Aiga-Tumua ma Pule-Itu’au ma Alataua-Aiga i le Tai ma le Vaa o Fonoti!

O ou Paia sautua-fafafa na Samoa! E faatalofa atu foi i Ta’ita’i o Ekalesia e fia-o loo faa-fale-le-malu i tulimanu e fa o Samoa-aua le tau-asuina o le vai o le ola-mo finagalo o loo galala mo le Upu Moni o le Faaolataga!

Ia alo maia-o le tatou talanoaga masani foi lenei-i Aso Sa ta’itasi uma! Ae pei lava ona tau logologo atu pea-o lenei tusitusiga-e le o se faaleaga-e le o se tala fatu fua-poo se faa-oloataua-ae o le fia faailoa atu lea o mea o loo tutupu i lo tatou atunuu-e ala i se isi faiga e ese ai faa-talanoaga- mo lo outou silafia- e tusa ai ma a outou aia tatau!

Ia-alo maia! O lena ua i luga le ulutala o le tatou talanoaga-ma e talitonu le faamoemoe-ua manino ma malamalama le ulutala-ma ailoga e toe moomia se isi faamalamalamaga?  Fai mai le ulutala-“Talofa e Samoa- ua amata ona manunu ma masofasofa ou Faavae Popo!

O a la ou faavae popo Samoa? Ia-pule lava oe ma lau tali- ae o la’u tali e faapea:-O lou Faavae Popo Samoa-“O lau Aganuu ma ou Talitonuga Faa-Kerisiano”  Ia- o le fesili e faapea-“O le a lau aganuu? O le faa-matai! E a le faa-matai?

A tatou silasila i le Faiga-Palota mai le amataga o le Malo o Samoa-sa filifili e nuu ma itumalo- o latou lava sui faatu mo le tofi Faipule o le latou Itumalo! O le a le tulaga ua i ai nei? Ua aveese. O ai na aveeseina?

O tulafono na fai e le faiga-malo! O le a la le mea ua tatou vaaia? Ua taofi e isi sui faatutu isi matai o latou nuu mai le tauva i le faiga-palota! Ua avatu le aganuu e faalafi ai mea sese ma faiga pi’opi’io!Aisea?

ADVERTISEMENT

Ua pule aoao le faiga-malo i le faiga o le palota a le atunuu! Aisea? E mafua ona ua fai Vaega Faa-Upufai! O le a la le tulaga ua o’o i ai? O  toe i ai se finagalo o le nuu poo le itumalo i lo latou sui faatu! O le a la le ata ua tatou vaaia nei?

O le tali-toetoe lava a leai se itumalo e le’i aafia i ni faiga faatosina leaga ma le pi’opi’o-e pei ona faamaonia i le tele o faamasinoga sa fai! O outou silafia la Samoa le faalumaina o lau Tu ma lau Aganuu?

Silasila a molia sui faatutu i le Faamasinoga ona o faiga sese ma faiga pi’opi’o i le Faiga Palota talu ai nei-ae o ane avatu le aganuu mamalu a Samoa e ufiufi ai mea leaga ma le pi’opi’o? O ni faiga ia e tusa ai ma talitonuga faa-Kerisiano ia o loo faavae ai le Malo o Samoa? 

E mafua i se a? Leaga o le sini a soo se vaega faa-upufai i le lalolagi atoa-ia maua le paoa i taimi uma e o’o i le faavavau-na te pulea ai se atunuu! O le a la le taunuuga o nei mea uma?

O faiga pi’opi’o ia e faitau miliona ma miliona tupe a le atunuu ua maumau ai-ae le o mafai ona molia i le Faamasinoga e saili ai le amiotonu-e pei ona faia i tagata lautele o le atunuu!

A tatou tilotilo foi i le Faavae o le Malo o Samoa na fai e matua-fai mai e faavae i lana aganuu ma talitonuga faa-Kerisiano-o lea foi o le a taumafai e toe teuteu-ina ia maualafia ai le faatinoina o isi fuafuaga e soli ai le faavae na faata’oto e matua! Ia- o le ta’utinoga lenei a o tatou matua na faia le Faavae o le Malo Tuto’atasi o Samoa.  

I LE SUAFA PAIA O LE ATUA, LE E ONA LE MALOSI UMA LAVA, LE E ALOFA E FAAVAVAU-“Ona o le pule aoao i le lalolagi e i ai lea i le Atua ua na o Ia lava-e afio i mea uma lava ma o le pulega e faaaogaina e tagata o Samoa i totonu o tuaoi na faasino mai i Ana Tulafono-o se tofi pa’ia tuu-faasolo.

Ona ua faaalia e Taitai o Samoa le tatau ona avea Samoa ma Malo Tuto’atasi e faavae i luga o talitonuga faa-Kerisiano ma tu ma aganuu a Samoa. Ma Ona o le Fono Faavae, e avea ma sui o tagata o Samoa, ua na faafinagaloina ia fausia se faavae mo le Malo Tuto’atasi o Samoa.”

Samoa-e le faatonuina oe-ae afai ua uma ona faata’oto e matua ua mavae e ala i le Faavae- lou Faavae- e le o se upu e avane ai-ae o le upu moni Samoa-o lea ua amata ona manunu ma masofasofa lou Faavae i luga o Talitonuga Faa-Kerisiano ma lau aganuu.

23 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?