Fa’aeaina pe ā le fa’alogologo tigā

By Vatapuia Maiava 18 September 2016, 12:00AM

E le’i faigofie le amataina mai ai o le pisinisi a le tamā i a Seiuli Hini Kamisi ma le aiga i Faleula-Uta.

O lona talitonuga i le fa’atalatalanoaga ma le Fofoga o Samoa, o so’o se amataga lava e tatau ona i ai se fa’ai’uga po o se fa’amoemoega e taula’i i ai.

O le taimi lenei o lo’o ua i ai le isi o lala o lo la faleoloa i Tafua, ae o Faleula, o lo’o ua fa’atuina ai le Fale Masi, o le faleoloa, ma le isi pisinisi, fufulu ta’avale.

“O lenei pisinisi e le’i faigofie lona tau amataina mai.” Seuli i le fa’atalatalanoaga ma  le Fofoga o Samoa.

“O le taimi lena na’o a’u na faigaluega mo le aiga ma e le’i tele se tupe maua, ma o a’u o se ave ta’avale laititi, ina ua fai le to’alua ma le fanau e pei o i’ina na amata ai loa ona fa’aosofia ai lo’u tagata mo le fa’atinoina ai o vaega nei.

 “Ia na amatamata lava la i sina tama’i faleoloa ma sa matou tau fa’aofiofi ma si a’u fanau ma le to’alua i se potu e tasi ae fa’aavanoa luma nei mo le faleoloa,

“Ia sa le faigofie aua na taumafai lava e saili se seleni, ma o le 2009 lea, ia na tala mai le N.P.F. e $500 ia ma amata ai loa ona fau le fale.

 “Ia sa tau aoao mai fasi laupapa e tau so’oso’o ai le fale nei, ia ma fa’atautau mai ai nai pusaapa, ia ma nai oloa laiti e tau amatamata ai le faleoloa.

 “Ia ua titilo atu fo’i e tatau lava ona i ai se isi vaega e o lua ma le faleoloa e fesoasoani a’i…ia ae le gata i lea o le taumafaiga o tamaiti aoga.

 “Ia o le 2012 ia na amata ai le fale masi i le pito i tua ia o lena na amata mai ai na tau i ai se tupe e o lua ma le faleoloa.

“Ia e le’i gata ai ae na ou toe tilotilo i se isi fo’i pisinisi, ma ua mana’o fo’i e tau fa’atele laititi le pisinisi.

 “Ia na maua mai lava iina nai fa’asiliga laiti, ma ua fa’atuputele fo’i le mana’o mo nisi vaega e maua ai le tupe.

 “Ia ua ou titilo o le pitonu’u nei , ia e mana’omia lava ni itu e fa’afiafia ai, ia ua fau loa le fale piliati, sa fa’atau le laulau piliati, ma fa’atu i le isi pito ae fa’aaoga le isi pito mo le faleoloa.

 “E le’i leva ae toe sau lava le tupe o le laulau lea na fa’atau muamua toe fa’atau ai le isi laulau piliati.

 “Ia ua alualu, ia ua fa’atau le va’afagota, ma e $10,000 lona tau, ma ua amata ona lelei gasologa o mea uma, ae o le fa’alavelave ua tula’i mai i le piliati, ia ua amata ona laulauvavale onana, ae o le mea ua ou popole ai o le fa’alogo atu ai o la’u fanau.

 “Ia ua fai le panikeke , ma o ‘i’ina la na matua’i tele se tupe maua na maua mai ai….mai lava i le panikeke , ia o lea na mafaufau ai lea i le fale masi lenei, lea la ua outou silasila mai ai.

“O le taimi lenei o lo’o ua tilotilo atu mo se Resort e faia i lo matou aiga i Tafua.

By Vatapuia Maiava 18 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>