E le tatau ona fa’afaigaluegaina fanau - Ruta

IL
By Ilia L. Likou, 14 February 2018

O le fa’afaigaluegaina ai o fanau ma le leai o se galuega a matua mo le tausia lelei o lo latou ola tuputupu a’e o se fa’afitauli e ao ona silasila toto’a i ai ma ia fa’agata loa.

O lea le finagalo o se faiaoga ritaea i a Ruta Lealaitafea-Westin mai afioga o Malie, Sala’ilua ma Riverton, Utah Amerika.

I le silia ai ma le 20 tausaga o faiaoga i Amerika o lona talitonuga e ao lava ona taofia nei faiga i fanau.

O lona taofi, e le  tatau ona fa’afaigaluegaina fanau ae ia tausia ma ave i a’i latou le tausiga e tatau.

O lana maitau , ua tele le suiga ua i ai nei le atunu’u aemaise ai lava le fa’atupula’ia ai lea o fanau o lo’o ua va’aia i luga o maga’ala i le taimi o le po o lo’o o latou fa’atauina vaega ese’ese mo le tu’uina atu i fanau.

 “O le matuai sese lava o lenei faiga fa’alealofa o lo’o ua tu’uina atu i le fanau ma ua tatau ona fai i ai se fuafuaga tatau. 

“O le tele o nei fanau o lo’o ua una’i e matua e fa’atino galuega nei o le fa’atauina atu o oloa i le mamalu o le atunuu i taimi o le aso aemaise lava i le po.

“Ae tatau ona o tamaiti nei i le aoga ae le tatau ona tu’ua i  luga o le auala e fa’atauina oloa ma nisi lava  vaega e ono atagia ai le ola o le fanau ua tu’ulafoaina.

“O le fanau e tatau o le taimi lenei o lo’o i totonu o potu aoga ae le’o luga o le auala i so’o se taimi o le aso.

“E mana’omia i latou e nonofo lelei i aiga, ma fesoasoani i aiga i le a lava le taimi o le aso.

“O le  isi itu e ao ona silasila lelei i ai a manuia taumafaiga a fanau mai iunivesite nei e mafai ona fesoasoani i aiga i so’o se itu lava aemaise o lenei vaitau i le taugata o le tau o le soifuaga o lo’o ua i ai nei.

O le galuega faito’atele a tagata uma aemaise matua le una’i o fanau i le aoga.

“Ia e pei o lea lava le tulaga e tatau ona i ai, ma silasila ai matua i lenei taimi aemaise o le taumafai ai lea ina ia tulei pea ma tulei pea fanau ina ai manuia lo latou ola tuputupu a’e.

O lea lava le agaga e tasi na fa’ailoa e i latou o lo’o galulue mo le taofia o sauaga i totonu o aiga i Samoa nei, o le S.V.S.G.

I ripoti talu i le ‘a’afia ai o nisi o fanau i faiga faigaluega a matua ma ‘a’afia ai lo latou soifua, o se fa’anonoaga tele lea mo i latou lava.

O lea le fa’amoemoega tele o lo’o ua  fa’aata mai pea i le tele o fa’alapotopotoga o lo’o galulue mo se Samoa saogalemu aemaise o le tete’e atu ai lea i le tele o sauaga o lo’o ua feagai nei ma le atunuu.

O le oti ai o se tamaititi 15 tausaga mai le afio’aga o Satapuala o se fa’anoanoaga lea  i le to’atele aemaise ai le Fa’alapotopotoga mo e Puapuagatia.

I se Pepa o Fa’amatalaga na o latou ta’ua ai le taua o le galulue  fa’atasi o itutino e tete’e atu ai nei faiga  i totonu o aiga, nu’u ma le atunu’u.

Ona o le tula’i mai pea o sauaga i totonu o aiga o lea ua i ai le Numera Fesoasoani 800-7874 e mafai ona feso’ota’i ai mo so’o se fa’afitauli.

O le si’itia ai o sauaga i totonu o  Samoa ma le Pasefika atoa o lo’o fa’atuputeleina pea e o’o mai i le taimi lenei ma o lo’o ua fautuaina ai pea le galulue fa’atasi o tagata uma ina ia fa’aitiitia ma fo’ia aua se lelei i le aga’i atu i le lumana’i.

I totonu o Kiribati o lo’o ua fuafua nei i le fausia ai o se nofoaga e to’omaga ai i latou o lo’o ua ‘a’afia pea le ola ma le soifua i lea tulaga aemaise lava i tinā ma fanau.

O lea nofoaga o le a tele se sao aua le a’oa’oina ai o i latou o lo’o ‘a’afia ai aemaise le tulaga o le silasila ma ia iloa auala e mafai ona foia ai nei faiga fa’alealofa.

O lea atumotu o le Pasefika o lo’o ua fa’amauina le  to’atele i i latou o lo’o ua ‘a’afia ai i nei sauaga.

E tusa ma le $US160,000.  le tau aofa’i o lenei fale.

I Samoa lava ia o lo’o ua amata ona galulue nu’u ma  afioaga ta’itasi i le fa’atauaina o le vala’au mo tagata uma laa ina tete’e atu i sauaga.

I Asau i le motu tele i Salafai e pei ona ripotia muamua atu ua matua’i sa tapu tapu ai le fa’ao’olima ai o le itupa o ali’i i le itupa o tama’ita’i.

O le moni ai o lea faamatalaga, o se tasi e maua ua ia faatino ia sauaga o le a faateá ese mai ai ma le afio’aga.

O lea mau sa faamaonia mai e le afioga i le sui faipule o le itumalo, minisita foi o le Matagaluega o Fa’atoaga ma Faiga faiva ia Lopaoó Natanielu Mua, se tasi o matai i totonu o le afioaga o Asau.

“O tamaita’i o se mealofa taua lea I lenei lalolagi,” Lopao’o.

“O tama’ita’i e le gaoia ae galue punouai ia maea lelei ona faatino se galuega”.

“O le ala foi lea e ala ai ona taua le itupa o tamaita’ i totonu o le afioaga o Asau. “E le gata i lea matou te sailia ma faatino mea uma ina Ia o matou mautinoa le saogalemu o tamaitai mai o latou tai toalua”.

“O le tulafono e fou ma ua ogatasi lea ma le ave o le faamuamua a le Matagaluega o Tinā ma Tamaitai Atinae o Nuu ma Agafesootai ia taofia le sauaina o tamaitai faapea fanau i totonu o aiga”.

“O lea ua tele na agai polokalame faalauiloa ia Samoa atoa uma ma ua tatau nei loa ona amatamea i totonu lava o aiga ma nuú.”

“E amata mai iai tatou ua taua o ulu o Aiga ma matai o afioaga, afai lava tatou te molimauina ia faiga le talafeagai e ao ona tū malosi i tatou i le foia ma taofia nei faiga le manuia o loo aliae mai totonu o aiga”.

Sa agai le saunoaga a le afioga i le Minisita le ooga lava o nei faafitauli, “E iu ai lava na uma le soifua o se tasi o le aiga ona ua lagona le lē amanaia o le tina ona o le faaauauina pea e le tama ona uiga saua.”

“O se tasi lea o vaega o le a aafia ai le soifua o le tina e ala I le taumafai I mea sili i totonu lava o lona aiga ma lona lava afioaga o loo aumau ai”.

“Ua tatou oó i le taimi ua tatau ai ona lagona e le itupa malosi le taofia ai o le faia pea o sauaga faasaga i tamaitai ma fanau aua e iai lona aafiaga lautele i le tagata”.

Sa taua e le afioga ia Lopaoó le faatulai ese ai o se tasi o le itupa malosi pe afai ae maua ma faamaonia o loo ia faia lava nei faiga e ala lea I le sauaina o le itupa o tamaitai ma fanau I totonu lava o latou aiga.

Sa faamama foi le saunoaga ale afioga I le minisita e le manaomia e o tatou tagata ona aumai mai tagata e fafo e unaia pe faamalosiau ia faaaupegaina tina I soo se agavaa.

“O le tamaitai samoa lava ia e soifua mai lava ua iloa lana aganuu ma aga galuega ma lona sao I lona aiga ma lona nuu faapea ai ma le Ekalesia”.

“O le matou afioaga e iai le aualuma ma e fono lava I latou o loo vaaia le aualuma ma saofaiga a matai”.

Ua outou silasila la iai o loo matuai faatauaina lava e lo matou afioaga o Asau le sao o le itupa o tamaitai”.

“O loo tele foi lo latou sao i le faia lea o faaiuga ma atinae I totonu o lo matou afioaga aua matou te talitonu e tutusa uma tagata uma”.

“O se tasi lea o itu e lagona ai lava le faágaeétia ma le mitamita ona o le taumafaiga a le afioaga ina ia tafi esea sauaga o loo faia faasaga i le itupa vaivai”.

O loo iai le faanaunautaiga ia avea Asau ma afioga e taulamua ma avea ma faataitaiga I nisi o afioaga ina ia tutu faatasi e tafi esea sauaga.

“Ou te leo fai atu lava I se tasi e tatau ona fai ae o loo ou talosagaina ina ia toe mafaufau I le taua o le unaia o lenei mataupu I totonu o afioaga”.

I lea mataupu sa faailoa ai e le pule o le Matagaluega o Tina ma Tamaita’i Atinae o Nuu ma Agafesootai ia Fuimapoao Beth Onsemo Tuilaepa ia Me 2017 le tagatagai ai o le malo ina ia galulue faatasi ma afioaga taitasi aemaise pulega a alii ma matai ina ia unaia le taofia o sauaga faasaga i tina ma tamaitai.

E le gata i lea ia tuuina atu le faasalaga talafeagai pe afai ae faatino lea ituaiga soligatulafono.

O le afua mai ai o lea manatu mai le tamaitai pule ona o se suesuega sa maua mai I le saogalemu o aiga, ua faailoa mai ai le tele o sauaga sa faapea ona aafia ai soifua o tina ma tamaitai lea ua siitia I le 20% mai le suesuega sa faatino I le tausaga 2000.

O lea sailiiliga e pei ona taua e Fuimapoao, o loo faailoa mai o le 60% o tamaitai sa faapea ona aafia I sauaga ma sa lagonaina lava le fefe.

O lea fuainumera ua toe faamanatu mai ai le tulaga ogaoga o loo iai lea faafitauli i totonu o le atunuu.

Sa toe tomanatu le tama’itai pule i le fonotaga lona 11 o le taupulega mo Tamaitai lea sa faia mai Samoa nei sa faailoa mai ai o le 60% lea sa taua muamua sa o latou taua e leai se tulaga leaga o loo iai I le faaoolima ai o le tama i lona toalua.

“O le latou talitonuga o se vaega lava e soifua ifo ma le tagata ma nofo malamalama ai lava.” 

ADVERTISEMENT

“O loo atagia mai i manatu faaalia o le atunuu o loo iai le manatu I le itupa malosi o i latou o loo iai le faatagana e aoaoina ai o latou taitoalua e faaaogaina ai soo ituaiga auala ina ia iloa ona faaaloalo”.

E lē mafai ona tuúitiitia le faafitauli pe afai o loo iai lea manatu I le itupa o alii ae o le avea lea ma tulaga e faatupulaia ai pea le tulai mai o nei faafitauli I le lumanai”.

“O se mataupu e le nao le malo o le a taumafai e laugaina I le lautele o le atunuu ae e ona suia mafaufauga o tatou tagata I lea lava mataupu ina ia mafai ona taofia nei loa”.

“E amata mai lava I totonu o tatou aiga, o le afua lea o le tapenaina o le soifuaga o le tagata soifua”.

“O le ala lea e tatau ai lava ona tatou aoaoia a tatou fanau ina ia mau i o latou mafaufau ma agaga o le sauaina o soo se tasi i totonu o le aiga e le talafegai lea”.

I le taimi nei o le isi laasaga o loo tagatagai iai o le sainia lea o se maliega ma Ekalesia Soófaatasi ina ia galulue faatasi sui vaaia o le Atua i soo se fata faitaulaga I le tuuina atu o le feau ia taofia sauaga faasaga I tina ma fanau.

I le masina o Iulai i le tausaga ua mavae na saunoa ai le Minisita o Tinā ma Tama’ita’i i a Faimalotoa Kolotita Stowers i le Fa’alauiloaina aloaia o le Su’esu’e mo le Saogalemu i Totonu o aiga, 2017.

 Na ia fa’ailoa ai o  se tasi nei o fuafuaaga taua a le tatou Malo – “O le Suesuega o le Saogalemu i totonu o Aiga,” o le a falauiloa i le aso. 

“O faamaumauga mai lenei Suesuega o le a taialaina ai galuega o le a fuafua ma galulue agai iai, mo le malu ma le taofia o sauaga i totonu o le lotoifale o aiga, nuu ma le atunuu atoa.

“O le tapenaga o lenei Suesuega o se galuega na faafoeina i lalo o le Matagaluega o Tina ma Tamaitai, Atinae o Nuu ma Afioaga ma Agafesootai, ina ia toe saili ma vailiili le tulaga o loo taoto ai sauaga i tototnu o aiga, e aafia ai tamaitai, fanau, o i latou e iai aafiaaga tumau o le soifua, matua tausi ma alii. “O sauaga o loo taumafai e tineia i totonu o Samoa, e le gata ina maaleale ma lavelave, ae o se mataupu faalotifale. “O le talitonga foi, e moomia ni tagata e silafia, ma malamalama lelei i le lotoifale o Samoa e faatinoina le suesuega, e aunoa ma se faaituau ma ia aoga lea galuega mo le sailiga o ofo aua le siitia o le soifua manuia o tatou lava tagata. “O le ala lea sa faasafua ai e le Matagaluega le faatinoga i tauofoga masani ma faaaogaina ai le Fatuiupu Consult.

“O le Fatuaiupu Consult o ni Konesale faapitoa tumaoti e i Samoa nei. “O le Fatuaiupu ua oa foi le agavaa ma le silafia i mataupu i totonu o Samoa, ma o latou nei e aofia ai le Tofa ia Maulolo Leaula Tavita Amosa, Musuoaiga Dr Asenati Liki Chang Tung, Afioga Galumalemana Nuufoi Petaia ma Mataafa Dr. Desmond Amosa.

“O le auga autu o le Suesuega, o le aoina mai lea o faamaumauga ma faamatalaga i le tulaga o loo taoto ai. Sa tuufatasiga foi le Komiti Faapitoa e nafa ma le mataituina ma lipoti iai le Fatuaiupu, i le faagasologa o lenei galuega e aofia ai paaga itotonu o le Malo, Ofisa o faamaumauga, Leoleo, Soifua Maloloina, Aoga, faalapotopotoga tumaotim sui o le Ekalesia ma sui o le atunuu. “O lea ua maea le Suesuega; ma ua atagia ai ni faamaumauga matautia, ma le faamoimoi loto. “E ui lava o loo faatino le tele o galuega faalauiloa ma galuega laveai, el e alo le ata o el laau i faamaumauga nei; o loo faaalia i le lipoti, e 1,100 le aofai o latou sa aafia i lenei suesuega, lea ua faapaseneina, e tusa ai o le saiiliiga.

• E le o faaitiitia faafitauli o sauaga i totonu o aiga, o loo faatupulaia. Ua Siitia tulaga o sauaga mai le 46% mai le Suesuega muamua i le tausaga e 2000, i le 60% i le tausga e 2016.

• Mo tamaitai faatalanoaina i le va o le 20-49 tausaga le matutua, e 68% e na aafia i upu/lafoga, mamafa e aafia ai lagona ma manatu, 5% o sauaga i feusuaiga (sexual abuse), 22% sauaga e aafia ai le tino.

• E maualuga sauaga faasaga i fanau, tama ma teine, 89% o fanau teine e aafia, ae 90% fanau tama. Ua aliae mai foi le sauaina o tama ma tina matutua, aemaise i upu mamafa e aafia ai lagona. E fesootai uma vaega nei, aua o sauaga ma amioga paaa, e fanau mai ai isi foi sauaga (Violence begets violence). O fanau e sauaina, e maualuga le avanoa e latou te faatino ai foi sauaga i isi, pe latou te talia foi sauaga o se vaega e masani ai pe tatau, pe a faia e isi ia i latou. E tele foi le aafia o le mafaufau o el tamaititi, pe a molimau i sauaga.

• E 100% o tagata e i ai aafiaga tumau o le tino na faatalanoaina, na taua le aafia ai o i latou i sauaga.

• E itiiti le vaega (11%) o e aafia na lipotia sauaga i se isi tagata, o lona uiga e tele se vaega o ssauaga o tutupu, ae le lipotia. E 76% na tau i aiga poo matua, 27% na tau i ui ae nao le 18% na lipotia. E 76% na tau i aiga poo matua, 27% na tau i uo ae nao le 18% na lipoti i leoleo. I fanau, e 60 sa tau atu i o latou aiga poo matua sauaga naafia ai latou.

• O tane e aupito tatele i le faatinogao sauaga faasga i tina, ma o tama foi e aupito toatele (48%) i le faatinoga o sauaga faasaga i fanau. O tina e sosoo atu a ii le 31% ae 19% isi tagata.

• I le fuatia o le tau (economic cost) o sauaga i aiga, faaaoga ai le Tala Faatatau o le Tupe 2013/2014, e SAT$14.7 miliona le tupe faaalu mo le Ofisa o Leoleo ma le Soifua Maloloina, e tali atu ai i sauaga i aiga. A faalauaitele le iloiloga, i si vaega o le tamaoaiga, ua fuatia pe o le SAT$98 miliona i le tausaga, le tau (economic cost) o sauaga i aiga i le atunuu. O le tau aupito i tele e leo mafaia ona fuatia i fuainumera i le taimi nei, o le aafiaga o fanau (tuputupu ae o mafaufau lagona) o faatino iai sauaga, ma olo o molimauina foi sauaga o tina ma isi i totonu o aiga.

“Oute taofi e leai seisi e le faapopoleina i le tulaga ogaoga o loo faamatalaina mai i nei faamaumauga. “E iai foi le manatu e le tatatu foi ona tatou taumafai e tau tuua poo ai e sese, ma ufiufi faamanu gase mataupu faapenei, ae moomia le tatou silasila totoa i totonu lava o tatou lotoifale ma vaai poo a ni aga, amioga ma faia ua tatau ona suiga ma aveaesea e faaosofia ai i le loto o le tagata alofa moni, le talitonga ma le faavae e n ate le taliaina ai se faatinoga e aafia ai le tino, mafaufau / se sauaga i totonu o le lotoifale o lou aiga.

“O lea ua iai le mau mai le suesuega, ele o se aganuu a Samoa le sauaina poo le fasia o tina, fanau ma i latou uma na agai iai lenei suesuega, ae o faiga poo aga lava a le tagata ia e mafua ai. “O le saofaiga a matai, efaapea le saofaiga a le lotu, o lea ua sanuoa mai Samoa – o le fofo lea, aua lava le tafiaesea o sauaga mai totonu o tatou aiga, nuu ma Ekalesia, o loo moomia ai taitaiga lelei mai la outou pito laau ona taimua i le galuega o foia ai sauaga, 63% e faape amai e tatau ona taimua Ekalesia, ae 57% e faapea mai o Matagaluega a le Malo e taimua. “Silasila foi, e muliae lava tagi mai e ua aafia i le Malo, a e muamua sulufai ane i le saofaiga i totonu o aiga, nuu ma Ekalesia.

“O le itu taua, o le tatou galulue loa ma faauau galuega lelei, ma faamapue nisi faiga e silisili atu ona leleo. “O lea fou ua tapena e ala i le galuega soosoo tauau a le tatou Malo. “Faalapotopotoga Tumaoti ma nuu ma Afioga fuafuaaga faatino mo le tali atu i le ogaoa o lenei mataupu, ma e aofia ai le aluega a le aufailotu.

A”o lei sola se faamatalaga ma afe mai se matou upu, e fia momoli atu se faafetai faapitoa i le Fatuaiupu mo le galuega fita i le tapenaina m ale tuufaatasia o lenei lipoti ma le suesuega taua. Faamalo le onosai, faamalo le galulue. “O se galuega le faigofie ona e talitonu o faamatalaga sa feagai ma outou  mai e na faatlanoa emaise e o loo aafia, e tagi le loto ma le mafaufau, ma e aafia ai lava logina pe a faalogo it ala faapenei. “O le mamalu o le atunuu sa faatalanoaina, saofaiga o Sui Nuu, Sui Tamaitai ma e uma sa aofia i vaega eseese o lenei suesuega, faafetai lava ! Faafetai foi i le Poloketi o Avanoa tutusa mo Tamaitai mo le lagolagoina o lenei faamoemoe.

“O lenei fuafuaga, tatou te faamoemoe i le Agaga Paia o le Atua e fesoasoani ma ii fuafuaga ma galuega mo le tafiesea o sauaga i totonu o aiga, Ekalesia ma Nuu. “O le upu a le Tusi, afai e le atinaeina e le Alii le fale, e galulue fua i latou o e o loo atinae. Afai e le leoleo e le Alii le aai, e mataala fua e o loo leoleoina.

I le taulaga o Apia mai lava le taeao se’ia o’o ina po, e molimauina pea fanau laiti e feoa’i solo i itu uma o le taulaga ina ia mautinoa ia mafai e o latou aiga ona maua sina fa’asiliga mai lea aso i le aso aua le ola lelei lea e aofia ai le maua ai o se meaai e tu’u i luga o le laulau.

O le tele o i latou nei e feagai ma sauaga mai o latou lava matua pe a le uma ona fa’atau oloa e pei ona tu’uina atu ai latou e galulue ai.

 E tele faigata e ono lamatia ai le soifua o nei fanau ao taumafai ai e saili se seleni e tausi ai o latou aiga.

I nai vaiaso talu ai na maua ai le avanoa e faatalatalanoa ai nisi o fanau o loo faatauoloa i le taulaga mai lava i le taeao seia ia o’o na po ma fesootai atu ai i tagata o loo faasuava i lea afiafi.

O le to’atele o nei fanau o lo’o fa’atau oloa solo i le taulaga e 10 tausaga. O le to’atele lava e fa’atauina pusa afitusi, vili taliga, o pulumu fulu nifo ma isi oloa.

E le fa’atulagaina se taimi e mae’a ai ona fa’atauina ai nei oloa aua e tatau lava ona uma lelei ona fa’atauina ae o le seleni maua mai ai e tuuina atu lea i matua.

I le Ofisa o le Faalapotopotoga o Faaputuga tupe a le Atunuu poo le N.P.F. sa faatau savali solo ai pop corn a Meki. Sa ia taua e sau mai le alalafaga o Malie.

O ia ma le isi toalua o loo taumafai e faatau a latou oloa i lea vaega o le atunuu.

“O lea e faatau au popcorn e tai $2 ma e tatau ona taulia uma au popcorn,” taua e Meki, valu tausaga.

“Ou te aoga ae ona o lea ua tuua la’u aoga o le ala lea ua ou sau ai le taulaga e faatau popcorn nei aua le tausiga o si ou aiga.”

O Meki e sau mai i se aiga e toa’iva lona aofaiga.

“I le tausiga si o matou aiga e fesoasoani le isi le isi.”

“Ou te taumafai lava e faatau ia uma lelei au popcorn aua o le itula e 6 i le afiafi ua tatau ona ou alu i le fale.”

Sa faailoa e se tasi o masaga tamaita’i, Mena ma Kalolina ua masani lava e o i le fale i le itula e 10 i le po.

“O au ma lou uso masaga o loo faatau atu i le lautele pusa afi tusi ma pepa vili taliga mo le $2 tala. 

“O le seleni e maua e tu’u atu i lima o nai o ma matua pe a o’o le fale.”

“Ma te lē faatau oloa i aso o le vaiaso ona ma te o i le aoga,”taua e Mena.

“A ua o’o loa i le taimi ma te o ai le fale ma lou uso ona faatū lifi loa, o se taavale lava e tū mai ia’i maua o le taavale lava lena ma te o ai le fale.”

“Ua ma masani ai lava. Ia mautinoa iai se taavale ma te agai ai i le fale.”

E oo mai i le taimi nei e leai se isi ua mafai ona talia le fesili poo fea tonu e aumai ai nei fanau nei oloa. 

E talitonu le Fofoga o Samoa o matua o nei fanau e iai lava pisinisi o loo aumai ai nei oloa ma faatau e nei fanau i le taulaga o Apia.

I le taulaga o Apia i le po i le nofoaga o loo iai le Marina i Matautu, sa molimauina ai nisi o alo tama laiti e igoa ia Lesi o loo fealuai solo ai, 11 i le po.

Sa fesiligia poo le a lana mea o loo fai i lea nofoaga ae ua leva le po, ae sa tali lea taule’ale’a e lei taitai se po.

“Ua ou masani ai,”  taua e Lesi.

“O le tele o taimi ou te alu ai i le fale ua tā le 12 poo le 1 i le vaveao i le faatauina o faasoa ma vai suamalie.”

“O se tasi lea o auala o loo fesoasoani ai nai ou matua.”

“Ua ou masani foi i amioga a I latou e faasuava. E pule lava i latou ia latou tala o le measili ma taua o loo maua mai ai la’u tupe.”

E ui a i lea o nei fanau e iai o latou manaoga poo miti o loo faanaunau iai ina ia ausia i le lumanai.

“E fia avea au ma fuimū ina ia mafai ou fesoasoani i aiga ua aafia o latou fale i le malaia,”taua e Keli.

Mo Mena ma Kalolina e fia avea i laua ma tamaitai leoleo.

Aisea?

Ia puipui ma saogalemu aiga mai tagata leaga.

IL
By Ilia L. Likou, 14 February 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?