Le-fiafia se Faifeau ona o se ‘fa’ai’uga e le-sa’o’

LT
By Lanuola Tusani Tupufia, 12 May 2016

O lo’o sa’ilia nei e se tasi o Faife’au o le Ekalesia Fa’apotopotoga Kerisiano i Samoa (EFKS), se fautuaga fa’aleTulafono, ona o se mata’upu na ia ta’ua, o se “fa’amalologa le-sa’o” mai le ekalesia ua 18 nei tausaga o tautua ai.

O le Susuga a Ali’imau To’iaivao (FS) ma le Faletua o Salome, sa la ta’ita’ia le lafu-mamoe i le afio’aga o Samamea i Fagaloa, ae fa’ailoa atu iai ua tatala le latou feagaiga ma le ekalesia e aunoa ma lo la silafia. 

Na fa’ailoa mai e Ali’imau i le Samoa Observer, sa alu le la fa’amalologa e ono masina, o le tulaga masani lava mo faife’au o le ekalesia, ae fa’ate’ia i le fa’ailoa atu, ua fa’amalolo moni la’ua mai le galuega.

Ona tusi mai lea i le Komiti a le ‘Au-Toea’i’ina mo se fa’amalamalamaga, ui sa iai lava ona masalosaloga, atonu o se fa’ai’uga lea ua faia ona o se ‘ese’esega i se malaga, na mafua ai ona tuli-‘ese la’ua ma lona faletua mai le va’alele.   

E o’o mai lava i le aso, e le’i maua lava se fa’aaliga a le Faife’au mai le Komiti a le ‘Au-Toea’i’ina.

O le mafuaga lea na aga’i ai loa mo se fesoasoani fa’aleTulafono mai le kamupani-loia (le Summit Lawyers Law firm).

“’O le mea tonu lea ‘ou te mo’omia, ia aloa’ia o matou tagata ma fa’afofoga mai i sa matou fo’i fa’amatalaga,” o le fa’aaliga lea a le faife’au.

“E lagona ai lava le fa’anoanoa ona o fa’ai’uga e fai e Toea’i’ina e aunoa ma ni feutaga’iga ma isi ua a’afia, ia avatu fo’i sa matou tala i mea na tutupu.

“E ao lava ona manatua lelei, o nei mea uma e matua tele ai lava a’afiaga o o tatou aiga. E le o se tulaga fa’apea, na o lou savalivali atu lava ae saunoa mai, ua uma ‘Oe ma alu loa e malolo.

Na fa’aopoopo mai fo’i, talu lava ona tupu o lenei mea, sa taumafai lava e fia maua o se tali mai le Ekalesia. Na i’u ai lava ina na misia le ta’otoga o lona faletua i Niu Sila ona o le tau sailiga o se tali o le mata’upu. 

Ina ua iloa e le ‘Aulotu, na faia ai e nisi o aiga e to’afa pe to’aono se tusi e talosagaina ai le Ekalesia, ia toe silasila toto’a i le latou fa’ai’uga, ina ia toe tu’u se avanoa i la latou fa’afeagaiga.  

Sa saunia fo’i ma tu’uina atu i le Komiti a le ‘Au-Toea’i’ina, se tusi mai le loia o Su’a Alex Su’a, o le kamupani loia ua ta’ua i luga. 

ADVERTISEMENT

I le tusi a Su’a, sa fa’amanino atu ai nisi o vaega o le Fa’avae o le Ekalesia ae maise fo’i le Fa’avae o le Malo o Samoa ua fa’apea ona afaina i le fa’ate’aina o faife’au. 

O se fa’ata’ita’iga, sa fa’ailoa atu ai e Su’a, le solia e le Komiti a Toea’i’ina o le vaega 9 o le Fa’avae o Samoa, i le le-tu’uina atu o le aia-tatau i le faife’au o Ali’imau, e tali mai ai i tu’ua’iga na faia fa’asaga ia te ia. 

Ae mo le Fa’avae o le Ekalesia, na ta’ua e Su’a, o le fa’ai’uga e fa’ale-aogaina pe tatala ai le osiga-feagaiga a le Faife’au ma lana ‘aulotu, sa faia lea e aunoa ma se feutaga’iga pe talanoaina fo’i i se fonotaga ma le ‘aulotu. 

Na fesiligia Ali’imau e uiga i tu’ua’iga ua faia, ae saunoa le fa’afeagaiga, e isi se tama’i-vevesi na tupu i luga o le va’alele ina ua ulufale mo le malaga aua le la fa’amalologa i Niu Sila. 

Sa ia fa’amanino fa’apea, e o’o atu i luga o le va’alele, ua leai se avanoa i le vaega o le va’alele mo a la ‘ato-ta’ita’i, ma sa talosagaina ai se tasi o le pasese, pe mafai ona ‘ave’ese ana ‘ato mai le vaega o le nofoaga lea mo la’ua. 

“E le’i fiafia le ali’i lea o le pasese ma palauvale ai loa i lo’u to’alua,” o le fa’amaninoga lea a le faife’au. 

“Ia atonu ua ‘ou vavevave teisi fo’i, na ‘ou tago ai toso mai le ‘ofu o le ali’i lea ona o lana tala na fai i lo’u to’alua, pau lea.

“Na o’o atu le ‘auva’a ma fai le latou fa’ai’uga, fa’apea ona o a’u na amata-mea ae latou te le’i iloa le mafuaga o le vevesi, ma fai mai ai loa ma te tu’ua le va’alele.

“Na ma usita’ia lava le fa’atonuga na ‘aumai, ia atonu fo’i ua momoli-sese e nisi i le Komiti a Toea’i’ina, fa’apea o a’u lava na sese ma fa’atupu le vevesi.” 

Saunoa fo’i Ali’imau, mulimuli ane, sa fa’atonu ai o ia e se tasi o le ‘Au-Toea’i’ina, ua tatau ona fo’i mai i Samoa e tatala le latou feagaiga ma le ‘Aulotu ona o le mea lea na tupu i luga o le va’alele.

“E leai sa’u mea mea-sese ua fai, ma o le mafuaga lava lea ‘ou te fai atu ai, se’i fa’afofoga mai i sa matou tala,” o lana fa’aaliga lea. “Pau lava lea o le tatalo mo le Komiti, ia su’esu’e mae’ae’a lenei mea ma ia atoatoa fa’amatalaga a itu uma a’o le’i faia o se fa’ai’uga.” 

Na ta’ua fo’i, ina ua taliu mai i Samoa, ua uma ona fa’aleaogaina le latou feagaiga ma le ‘aulotu i Samamea ma fa’atonuina ai, e tu’ua le ekalesia. 

Na fa’aopoopo mai fo’i, sa fa’ananau lava e fa’amamā lona suafa e ala i lona fa’amalamalamaina o le mata’upu i le Komiti a Toea’i’ina.

E le’i mafai ona maua o se fa’aaliga mai le Komiti a Toea’i’ina, e uiga i lenei mata’upu.

LT
By Lanuola Tusani Tupufia, 12 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?