LAUGA - “E te tuuina atu ea lou ola ona o a’u”

By Rev. Petaia Setu 30 April 2017, 12:00AM

(Ioane.13:38)

E iai le tautua faa Samoa e ta’ua o le Tautua toto. O le tautua e tuu atoa ai le ola o le tagata tautua mo le puipuiga ma le saogalemu o lona matai.

E le ’alo, e le palaai, e le faafiti, i le faigofie poo le faigata; i le mamafa poo le tigā, i le ola poo le oti; e ola pe oti mo le saogalemu o lona matai. E le faigofie la. O le pogai foi lea o le toe fesili o Iesu ia Peteru – E te mo’i? E sa’o lau tala? E te mafaia? “E te tuuina atu ea lou ola ona o a’u?”

 

MANATU: “E iloa oe i le tulaga o loo e ola ai” 

Mo le faamalamalamaina o lenei manatu, o fea lava o loo e tu (galue/ola) ai, o lou iloa lena o Iesu Keriso. Mo le saga faafaigofieina, e mafai ona fesili faapea – 

• E iloa faapefea lou iloa o Iesu Keriso? 

• O le a le talitonuga o loo e nofo ma oe e uiga i le Atua?

A tali la fesili ia, e tali i le ituaiga tautua o loo e galue ai; e tali i uiga ma amioga o aso uma; e tali i le tulaga o loo e soifua ma tatou ola ai.

 

E le i pine lava ona teva atu i fafo Iuta, ua le mafai e sona faamaoni ona laveai lona matai, ae folafola foi e Simona Peteru lana tautua toto i lona Alii. “Ou te tuuina atu lo’u ola ona o oe.” (f.37)

O la tatou mătua, o le tulitataoina e Iesu o le ofo lea! O le manatu o le lauga, o le olaga le malamalama o loo faamatalaina e le amio ma mea ua faia. E iloa oe i le tulaga o loo e ola ai.

Vaai foi ia Iuta, e aai, momoe, mafuta ma faifai mea faatasi, ae na faaaoga e Satani e auala ai le faalataina ma le pu’eina o Iesu. O lona uiga, pau lea o le malosi ua oo iai le iloa o Iuta i lona Alii. Na te faaaoga le soifua o lona matai e su’e ai ana tupe.

O le Iuta la lea, ua tatou malamalama i lona faalagiga o le faalata.

Faamata e le o lalata ane lea faalagiga ia te oe? Vaai pe le o oe o loo faaaoga e Satani e faataugāina le isi ou uso a tagata? E le o le ola o le isi tagata lena e faamălie ai ou tuinanau? Ioe, e iloa oe i le tulaga o loo e ola ai.

Ua iloa Peteru i lona tala oso. E vae mua i soo se mea. Kama foi ia e mana’o e ‘I am’ i mea uma.

Lea foi e tele lava i soo se galuega le ma’i lea, e fai o tagata o le atunuu, ae faapea foi le tele o le au failotu. E fai lava mea uma i le I am! E ui lava ina sinasina ma tau tootoo mai le mamalu i se saofaiga, e lolo lava i le I am a le faifeau.

O le fesili, o fea o taoto ai le faamaoni o le fai ma auauna a le Atua i tagata? O fea na fai iai le ofo a le soo lea? E le i sesē le tali a Iesu o loo i le faaiuga o lenei lesoni (f.38).

Ua oo i taimi o puapuagā o le Alii. Talofa e, ua le malu le Alii i lana au tautua. Ua le o se manu’a foi i fafo, o le manu’a lava i fale. E ā Iuta e faalata, a o Peteru e faatafatafa. O fea le ola ma ofo? Na faamasinoina Iesu e Kaiafa ma le au ositaulaga sili, ae faamasino e auauna o le maota Peteru. Na I am Iesu i lona soifua mo le lalolagi, ae I am not le soo ua manumanu i lona lava ola (Ioane.18:17).

O ata vaaia ia o le tautua pepelo, tautua le alofa, tautua faalialia i luma o mata o tagata. Talofa e, ia Iesu, ua moni ai le pese, ua fasia le gata ae pupula ona mata. E le i mafai ona vivini moa seia atu tolu ona faamau le pepelo o le ofo a Peteru. Atonu e feololo le soo lea i lo tatou.

Ua fia ni au folafolaga e le o faataunuuina i lau fanau, i lou tamā, i lou tinā, i lau uo, i lou aiga? Ae faapefea lau galuega, lou nuu, lou itumalo? Faapefea au folafolaga i le atunuu, i le ekalesia, ma le Atua? Samoa e, aua e te manatu māmā i se mea ua e tautino e fai. Ia faautauta foi i a tatou lafoga ma upu tatou te tautatala ai, auā ua fai mai Iesu, “o au upu e ta’uamiotonuina ai oe, o au upu foi e faaolaina ai oe” (Mata.12:37). 

Vaai ane i totonu o lou aiga, ma lou siomaga, poo mafai ona iloa ai Iesu Keriso i lou olaga i au mea o loo fai. O le ola ofoina atu mo Keriso ma lana galuega, ua le o se mea faigofie.

Atonu e faigofie lava i le tagata, e le o ia te ia le alofa ia Iesu ma lana galuega. Tatou te pu’ea i foliga o galuega a sea tagata, i auala a le lalolagi, ma uiga faale tagata o loo pulea ma taitaiina ai lana auaunaga. A o oe ma a’u, ia vaai i le tapenaga alofa ma le faamaoni ua fai e le Atua mo oe ma lou aiga. Ua le o se moa na togi ae u’u le ‘afa, leai.

O le soifua ua tuu atoa mai o le Atua e ola fiafia ai oe ma lau fanau, e ola saoloto, ma ola mălie ai tagata uma, e ala ia Keriso Iesu i luga o le satauro. Soo se galuega ua tatou faia, ia faia ma le loto atoa ma le faamaoni, o lau ofo lena; o lou ola lena, ia mafai ona ola ai se agaga i totonu o lou aiga, o lau aoga, lau galuega, lou nuu, ma le siomaga loo e soifua ma ola ai. “…auā na faia e outou i sē aupito itiiti o o’u uso nei, o a’u lea na outou faia iai.”  (Mata.25:40).

’Aua le ofoofo tetele i mea e ‘ai e le matagi. A o le faaolaina o se agaga, e le mafaia e le matagi. E le o le ofo fia tele ma le ofo fia lelei, ona sau lea faatietie i tumua’i o isi tagata. E iloa lava oe, i le tulaga o loo e ola ai.

E le o fia silasila mai le Atua i ni tamaoaiga o le lalolagi ua maua i lau ofo alofa, vaganā se agaga se tasi ua ola i lou ola. Fai mai le tusitala, ua tagi lotulotu Peteru. (Mata.26:75). Ioe, ua māasiasi, ua salamō ina ua lagona le faamaoni o Iesu i la latou mafutaga. 

Samoa e, tatou te manaomia ni taitai totoa i le amiotonu; ni auauna e le fefefe e faailoa le finagalo moni o lo tatou matai Sili. Ua fia vaai i ni tautua, e le palaai e finau mo le soifua lelei ma le ola manuia o o tatou tagata, i totonu o aiga, nuu ma itumalo, galuega ma faalapotopotoga, i le malo ma ekalesia.

Ua uma ona tuuina mai e le Atua lona soifua e ala ia Iesu Keriso, mo OE. A o oe, ma a’u, o fea o loo tatou tutū ai? E iloa i fea sou faamaoni ma so’u alofa i le Alii lo tatou Faaola? O lelei lau faalogo? O le fesili tuu sa’o a Iesu ia te oe i aso uma, 

“E te tuuina atu ea lou ola ona o a’u?”

 

Amene

7737063/7783782

By Rev. Petaia Setu 30 April 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>