Faateteleina finauga tau Eleele

SW
By Staff Writer, 16 April 2016

O se vaega o matai o loo finau mo le malu puipuia o eleele faale-aganuu i totonu o Samoa ua siitia le tulaga o le latou finauga. 

O le vaega lea na tuuina atu se faaseā i le Faletupe o le Atiina A’e o Asia (A.D.B.) i le 2014 ona o popolega i le pulea o eleele faale-aganuu ma ua siitia le latou faaseā ma tuuina atu i le Compliance Review Panel (C.R.P), o le tulaga aupito i maualuga lea o faiga tau feeseeseaiga i totonu o le A.D.B.

Na faamaonia lea tulaga e le Fofoga o le latou Vaega, o Fiu Mataese Elisara, o lea faaiuga na fai i lenei vaiaso talu ai le faatiga o ni uiga faatuai faaumiumi a le Office of Project Facility (O.S.P.F) a le A.D.B mo le sailia o se vaifofō.

E tusa ai ma ia tamalii, o le taualumaga tau le fo’ia o faafitauli e o’o mai i le asō “na te le o mafai ona fo’ia” o latou atugaluga autu e pei ona faaalia manino i totonu o le latou faaseā. 

I totonu o le latou ulua’i faaseā-sa faaalia ai e Fiu, Lilomaiava Dr. Ken Lameta, o Vaimoso, Telei’ai Dr. Sapa Saifaleupolu,o Samatau ma Leulua’ialii Tasi Malifa, o Afega, lo latou matua faanoanoa e uiga i le vaevaega ta’ito’atasi, faatupeina ma le pulea e tagata ese o eleele faale-aganuu. 

O latou atugaluga na tulai mai ona o le taumafaiga a le A.D.B.Technical Assistance (TA) mo Samoa ina ia “Siitua le Faaaogaina Tau Tamaoaiga o Eleele Faale-aganuu.”

O le latou finauga e faapea o lea galuega tele ua faatinoina e aunoa ma ni feutanaiga lelei ua faia i le salafa o Samoa. 

E tusa ai ma lea vaega, i lalo o le faagasologa o galuega tetele ua faaigoaina Promoting Economic Use of Customary Land, sa una’ia e le A.D.B. ni suiga tau eleele ma vaega tau tupe i totonu o Samoa e faafaigofie ai ona lisi eleele faale-aganuu ma faaaoga ia lisi e avea ma vaega faaopoopo mo faaunegatupe.

E mana’o le A.D.B. e faatu se faiga e ui atu i se tagata e pule toatasi na te mafai ona faalautele le lisiina atu o eleele faale-aganuu, e aunoa ma le fesiligia o isi sui o le aiga,” o le faaaliga lea a le vaega i tototnu o se pepa o faamatalaga.

 “E tusa ai ma ia faiga toe fuata’ina, o le a mafai ai ona faaaoga le feagaiga o le lisi e le tagata e ou le lisi e maua ai ni tupe faa-aitalafu mai se faletupe. 

Ae peitai-afai e le mafai e le tagata e ou le lisi ona toe totogi le faaunegatupe, e mafai e le faletupe ona pulea le lisi, lea e ono aafia ni vaega-eleele tetele o eleele faale-aganuu mo le tele o tausaga.

Sa faailoa atu e ia tamalii e faapea o le lisiina o fanua i tagata mai fafo mo ni vaitaimi umi, ma resitalaina nei lisi i lalo o le Faiga e igoa o le “Torrens System tau le resitalaina o pule o fanua e ala i le Tulafono o le Resitalaina o Fanua ma Suafa 2008 (LTRA) e le o aloa’ia i lena faiga le pulea toatele e le aiga, ona mokesi ai loa o ia lisi i faletupe ina ia maua ai tupe a i latou e teuina faafaigaluega, ma tapu ai tulafono faale-aganuu faapea foi ma le Faavae o Samoa.” 

ADVERTISEMENT

I sana faaaliga i le Weekend Observer, fai mai Fiu e ui lava ina ua latou tuuina atu le latou faaseā i le C.R.P., ae o le a latou tumau pea i taualumaga tau feutanaiga ia ua faatulaga e le alii su’esu’e ma ua folafola mai e le malo e amata ia Me.

I le taimi nei, ua talosagaina le C.R.P ina ia su’esu’eina pe malu puipuia e A.D.B. faiga faavae, pe sa tausisia talu ai e le talitonu ia tamalii e faapea o nisi o atugaluga anoa e tusa ai ma faiga toe fuata’ina talu ai ia o loo aafia ai eleele faale-aganuu –o le a tagofia. 

E talitonu ia tamalii o se suesuega tutoatasi a se vaega maualuga o le pulega ma faiga e fo’ia ai faafitaulu a le A.D.B. e ala i le C.R.P.ua talafeagai ai ona o le maoa’e o le tulaga o loo i Samoa-o le ute lea o faiga faale-aganuu tau le soifuaga ma fuaitau faale-aganuu a tagata Samoa uma, le mamalu o le faiga faa-matai, tiute tauave e faasolo i tupulaga ina ia mautinoa ai le malu puipuia o eleele faale-aganuu, o le faafitauli moni lea e o’o i ai le TAs pe a faoa le pule o eleele faale-aganuu, pe a ta’ua ni nai mea iti e le mafai ona ‘alofia talu ai nei galuega tetele.”

.O se pepa auiliili o faamatalaga a lea vaega o le a lomia atoa ma faasalalau i le Sunday Samoan- o taeao

Ua lasi ona teena e le malo mau a lea vaega.

I le tausaga talu ai, sa ta’utino mai e le Loia Sili muamua o Aumua Ming Leung Wai e faapea o eleele faale-aganuu o loo malu puipuia.

“E mana’o le Malo ia puipuia o tatou eleele faale-aganuu ma e leai se faamoemoe e toe teuteu le Mataupu 102 o le Faavae ina ia faatagaina ai le faatauina atu o eleele faale-aganuu,” o le faaaliga lea a Aumua i le Savali.”

 “O eleele faale-aganuu e le mafai ona faatau atu pe mokesi e tusa ai ma le Mataupu 102 o le Faavae o Samoa. 

 Ae ui o lea, o eleele faale-aganuu e faatoa mafai ona lisi atu pe laisene i lalo o le Tulafono o le Aveina o Eleele Faale-aganuu 1965.”

 “O Eleele faale-aganuu e mafai foi ona ave mo galuega a le malo i lalo o le Tulafono o le Aveina o Eleele 1964. “A mana’o le malo e faataga eleele faale-aganuu ina ia faatau atu pe mokesi, o lona uiga e tatau ona teuteu muamua le Mataupu 102.” I lea taimi, sa faamalamalama e Aumua le taualumaga e toe teuteu ai le Mataupu 102.

 “Ona pau le ala e toe teuteu ai le Mataupu 102 o se lua o vaetolu lea o le vaega toatele o le Palemene e faamaonia ma e ala i le faia o se palota lautele,” o le faamatalaga faaauau lea a Tuatagaloa. 

 “Ma o se lua o vaetolu o le vaega toatele o tagata palota mai se palota poo se pe o se pelepesite lea o loo aiaia e le tulafono mo le toe teuteuina o le faavae ina ia mafai ona pasia.

“O isi lava mataupu ta’itasi uma o le Faavae e mafai ona toe teuteu e le lua o vaetolu o le vaega toatele o le Palemene ae o le Mataupu 102 ona pau lea o le mataupu o loo i ai se mana’oga faaopoopo mo se palota lautele. 

“Ma e mana’o le Malo ia puipuia o tatou eleele faale-aganuu ma e leai se faamoemoe e toe teuteu le Mataupu 102.”

SW
By Staff Writer, 16 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?