Tali le Komesina o Leoleo

27 December 2015

Ripotia e Pai Mulitalo Ale

Fa’aliliu e Maiava

 E leai se mea e ono fa’ato’ese ai fua le Komesina o Leoleo, Fuiavailili Egon Keil, e uiga i le fa’atamo’ega o le Matagaluega o Leoleo. Na saunoa Fuiavailili, o ai lava le leoleo e le fiafia i suiga ua faia, ua tatau loa ona sa’ili se isi galuega e alu iai.

“Leva ona mo’omia e le malo ni suiga, ma o le fa’amoemoe tonu lena o le ‘aumai o a’u,” o le fa’aaliga lea a le Ali’i Komesina i le Sunday Samoan. “Lea ‘ou te taumafai malosi e una’ia le matagaluega lenei ia o’o i le tulaga o iai leole i fafo ma tulaga fa’ava-o-malo. O lo’o taumafai e una’i i luga i se tulaga lelei.

“A le fiafia ai nisi o leoleo i faiga o taumafai iai, atonu o latou tonu na ua le tatau ona toe iai i le Matagaluega.”

O saunoaga ia a le Ali’I Komesina, e fa’afeto’aia ai nisi o tu’ua’iga na momoli mai i se “tusi-fa’alilolilo”  o lo’o faitioina ai ma fesiligia le fa’atamo’ega o le Matagaluega.

O lea tusi sa tusia e se vaega o lo’o fa’amatalaina, o latou o “leoleo o lo’o manana’o e fa’aaoga tatau o latou taimi ma tupe o lo’o totogi ai” ma o lo’o fa’atuatusi lea tusi fa’alilolilo, i le Komesina o Leoleo.

O ata o lea tusi e tusia fa’aSamoa, o lo’o ‘auina atu i le Ali’i Palemia, Tuila’epa Sa’ilele Malielegaoi, le Minisita o Leoleo, Sala Fata Pinati, le Komesina o Sulufa’iga, Maiava Iulai Toma, le Fa’amasino Sili, Patu Tiava’asu’e Falefatu Sapolu, Minisita o Feso’ota’iga ma Fa’amatalaga Tau Tekonolosi, Tuisugaletaua Sofara Aveau, Minisita o Atina’e a le Malo, Lautafi Fio Purcell ma le Fa’atonu o le Samoa Observer. 

I le tusi lea, e tele tu’ua’iga o iai fa’asaga i le fa’atamo’ega o le ‘au’aunaga a Leoleo. O se tasi o ia tu’ua’iga, o lo’o fa’apea ai, o lo’o fa’atama’oe e le Komesina le Magaluega o Leoleo e “pei o se nofoaga fa’amiliteli.”

 “E fa’afefea ona tatou aga’i e loka mai le mamalu o le atunu’u ae o lo’o tausolomua i leoleo ona soli le tulafono,” o se vaega lea o le tusi. “Na matou tauto i le galuega lenei ona matou te manana’o e fesoasoani i lo tatou atunu’u, ina ia saogalemu tagata uma. 

“Peita’i, ua matou lagona, ua fa’atamo’e pei o se nofoaga o se militeri e le Ali’i Komesina, ua galo ai le atunu’u lenei e fa’avae i Le Atua.” 

I lana saunoaga e tali ai i lea tusi, na fa’ailoa mai ai e le Komesina o Fuiavailili e fa’apea; o le Ofisa o Leoleo, o le mea moni lava, o se fa’alapotopotoga e pei o se vaega fa’amiliteri”.

“E malie la, aua a silasila lelei lava i le fa’amatai o iai nei, e fa’atino e pei lava o se militeri,” o lana saunoaga lea.

“E iai le matai-sa’o e faia fa’ai’uga uma, ma afai ua fai se fa’ai’uga, e usita’i tagata uma. A silasila mai i a’u toniga, o toniga fa’amiliteli – e fai le pulou ma o aga na fa’amiliteli, e fa’atulaga vaega ‘ese’ese ma e iai le fa’asologa e avatu ai fa’atonuga, e iai fo’i faiga-fa’avae o le fa’agasologa o tiute fai, e atagia ai faiga fa’amiliteli.

 “Matou te fa’atinoa fa’atonuga, e fa’aaoga fa’a’upuga e fai i le militeli, o lona uiga, o se fa’alapotopotoga e fa’atamo’e pei o se militeli. E tutusa pau i le lalolagi atoa. O le tausia ma le fa’amalosia o le tulafono, e atagia ai galuega ma faiga fa’amiliteli ma o le tulaga lena e fai ai.

ADVERTISEMENT

“’Ou te fa’amalulu atu pe afai e iai nisi o le Ofisa o Leoleo e le ‘auai i le tulaga lea, ae manana’o e fa’afifilemu pea ma fa’atino galuega i le tulaga sa iai i aso anamua anamua lava.

“O la’u lea ‘auala e fa’atino ai le galuega, ua ‘ou faia ni suiga ma o se vaega lea o na suiga. Atonu e le manana’o ai, ae ‘ou te ta’u atu, o lo’o fa’avae nei suiga uma i faiga lelei ma talitonuga e pei fo’i ona faia ai i atunu’u uma o le lalolagi mo le tele o tausaga. ‘Ou te manatu la, afai o lo’o fa’auiga fa’apena e nisi, o fa’atamo’e pei o se nofoaga fa’aMiliteli, ‘ou te lagona, o se lafoga lelei tele ua ‘ou iloa ai, o lo’o aga’i i se tulaga lelei.”  

Na ta’ua e Fuiava, e le tumau ai pea fa’apea le Ofisa.

“E tatau ona usita’i tagata uma, e usita’i ma mulimuli uma i tulafono ma fa’atino lau galuega aua, o le lelei lena. Fa’atino lau galuega ae ‘aua le uma ane ua o’o i le falepuipui pe fa’amalolo fo’i. E lagi ou vi’i e tagata uma. Taumafai e a’oa’o ma fa’atino lelei lau galuega ma ia fai lelei, fa’aaloalo i tagata, fa’atino i le mea e gata ai lou silafia. O le vaega lena fa’amiliteli. 

 “Lea ‘ou te taumafai malosi e una’i le matagaluega lenei ia o’o i le tulaga o iai leoleo i fafo ma tulaga fa’ava-o-malo. O lo’o taumafai e una’i i luga i se tulaga lelei ma o se vaega o lena fa’amoemoe e aofia ai nisi se to’atolu sa lokaina ona o le le-faia o le mea sa’o.

E to’atolu leoleo o lo’o fa’amalolo le-tumau i le taimi nei ma o lo’o molia ona o a’afiaga i faiga-pi’opi’o.

“E na o sina vaega to’aititi lava o lo’o faitio – ae a talanoa i le to’atele o leoleo, o lo’o matua talisapaia ma fiafia i suiga ua faia nei.

“Ua manana’o le malo i ni suiga, ma o le mafuaga lena na ‘aumai ai a’u.

“O le fa’amatai, e to’atasi le mata’i-sa’o e faia le tonu ae fa’alogologo uma isi, pei lava o se faiga fa’amiliteli, afai la o iai se faiga fa’amiliteli, ua leva ona fai i Samoa nei i le tele o tausaga. A silasila lelei i le tatou malo, e iai fo’i vaega ma’oti ma ‘ese’ese, o fa’atulagana na ma le fa’avaesegaina o tulaga ma galuega i totonu o se militeli.

 “Afai e iai ni leoleo e le malilie i tulaga na, ia atonu ua le tatau ona toe iai i lenei fa’alapotopotoga.” 

O le tusi ua ta’ua, ua tele ai vaega ua taula’i iai le silasila a le Ali’i Komesina.

Muamua, o lo’o latou fa’ailoa ai le mafuaga ‘autu o fa’afitauli nei, ona o le leai o se talitonuga ma se manatu alofa i le Matagaluega.

Lona lua, o lo’o fesiligia e le tusi lea, se tasi o ofisa sinia o lo’o tu’ua’iga lona fa’aaogaina sese o tupe a le Asosi a Leoleo.

Lona tolu, o lo’o fesiligia ai amioga o lo’o fa’atino i totonu o le Matagaluega, e aofia ai faiga-fa’aUlugali’i i le va o ali’i ma tama’ita’i-leoleo.

“Fa’amolemole, matou te fia galulue e si’itia le tulaga o galuega fa’aleoleo peita’i, ua lagona lo matou fa’anoanoa tele, ona o le tulaga ua fa’atamo’e ai nei le ofisa o leoleo,” o se vaega lea o le tusi.

O lo’o ta’ua e latou na tusia lea tusi, o lo’o popole, ona e faigofie lava ona molia e se tasi o le atunu’u se leoleo ona o nei fa’aletonu.

“I lalo o le fa’atinoga o galuega a leoleo, e le talafeagai ona e faia o se tulaga e ta’uvalea ai le Matagaluega. A o le tele lena o mea o lo’o ua tutupu nei.”

27 December 2015

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?