Fa’asoa fa’afitauli

IL
By Ilia L. Likou, 08 January 2018

O le ola feso’ota’i o le isi lea poutu taua o fa’avae o aiga.

O lea le saunoaga Silao Tuliatu 35 le matua o le soifua o Faleula Uta.

O lona talitonuga e taua tele le matafaioi o matua i le fa’afaileleina o olaga a le fanau.

E talitonu Silao o fa’afitauli o lo’o ua tutupu mai i totonu o aiga i lenei vaitau, ona ua mafua mai i le le lelei o le feso’otaiga i le va o matua ma fanau.

“Tele fa’afitauli ua alia’e mai i totonu o aiga i lenei vaitau, ma o le mafua’aga o nei fa’afitauli ona o le ofi mai o auala fa’atekonolosi aemaise le galo ai o le fa’avae sa fa’apena ona ta’iala ai o  olaga mai a’o laiti.

O Silao Tuliatu e to’atolu ona alo ma ua na’o ia foi le o lo’o faigaluega aua le tausiga o lona aiga.

Na ia ta’ua o le sese lava o le fa’avae e fa’avae’ina ai le olaga o le fanau i le taimi lenei, o le a a’afia ai o latou olaga tuputupua’e mo a taeao.

“Ua tatou vaaia le tele o fa’afitauli ua tutupu mai i Samoa nei iluga o auala o feso’otaiga.

“Ua pule lava le tama ma le teine talavou i lana ia mea e fai i latou taimi avanoa ae galo ai le talanoa lea ma fa’asoa ma matua.

ADVERTISEMENT

“O nisi foi o matua ua soona pisi i le sailiga o seleni mo le tausiga o aiga ae galo ai le fa’asoa ma le fanau i lo latou olaga.”

Na ia saunoa foi o le tekenolosi ua iai nei ua fai lea ma fa’amuamua i le fanau nai lo’o le mafuta ma talatalanoa ma matua.

“I aso ua mavae, e tele lava ina maua mai le fanau o lo’o ta’aalo i  fafo o le fale ma nisi o fanau o le nu’u.

“A’o le taimi nei, ua tele lava ina fa’asaga i le telefoni i le aso atoa aemaise foi pe a alu i luga o le auala tele.

“Ou te iloa ua mafuli le fanau i nei mea ae leiloa le a’afiaga o nei mea o le a a’afia ai o latou olaga i se taimi oi luma.”

Na ia ta’ua foi ua fai lava si tele naua o le sauaga fa’asaga i tinā i lenei vaitau i Samoa nei.

“Ou te iloa o i latou lava o lo’o faia lea tulaga o i latou o ni tagata e le o i ni lotu.

“O le isi mafua’aga e ala ai ona tupu so’o lenei mea mataga ona o le leai o se fa’aalo’alo i a’oa’oga na omai ai i le ava lea I le va ma tuafafine.”

Na ia saunoa foi, o le fofo o nei mau fa’afitauli o lo’o i totonu lava o tataou tagata taito’atasi.

“O le tali lava o nei fa’afitauli, o le toe fa’a mamafa lea o le a’oa’oina o le fanau i le fa’avae na tatou omai ai.

“O le fa’aalo’alo sili lena mai le aganu’u Samoa, o le fa’aalo’alo lea o le va ma tagata matutua, aemaise le va ma tuafafine.

“Ma i tatou matua, ia tumau lea i le fa’avae i le faiga o lotu afiafi a le aiga, e talatalanoa ai i le fanau, ia pei o le fuaitau ‘A iai Iesu i se aiga o se aiga fiafia lea,” saunoaga a Silao Ropati.

IL
By Ilia L. Likou, 08 January 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?