Talosagaina e se Kegi le alofa

By Lanuola Tusani Tupufia 03 August 2016, 12:00AM

O se vaega e tusa ma le luasefulu tamaitai talavou ia na faaigoaina i latou lava o le Original Blood Outlaw (O.B.O.) sa to’atuli i o latou tulivae i luma o le fono a Vaimoso ma talosagaina so latou faamagaloga.

Na faatino e ia tamaiti talavou lea talosaga i luma o le Fono ina ua mae’a se fono i le va o le afioaga o Vaimoso ma ni alii Leoleo se to’afa-i totonu o le nuu i le taeao ananafi. 

Sa tofu i latou uma ma ta’utino lo latou auai ma sa auaua’i ona faatoese i matai ona o le faalumaina o le nuu ma tauto ai o le a o ese mai faalavelave. Sa latou folafola atu foi le faata’apeina o o lea kegi o le O.B.O. 

O lea fono a Leoleo ma tagata o le afioaga –o se taumafaiga lea mai Leoleo ina ia feiloa’i atu i nuu i totonu o le taulaga ina ia fesoasoani atu le pu’eina o tupulaga talafou ma ia mautioa ai ua latou o ese mai ia faalavelave.  

O lea vaega o loo filo ai ma tamaiti a’oga ia o loo aooga pea, ma o le toatele ua le o toe aooga ma se vaega toaitiiti o loo galulue i le taimi nei i pisinisi a o latou aiga. I le faagasologa o le talanoaga ma le fofoga o le afioaga, fai mai Aulavemai Tafito Selesele na latou maua e faapea o nisi o sui o le O.B.O.e mai lo latou nuu.  

Na fai e Aulavemai ina ia mautinoa ua fai se gaoioiga a le nuu i lea tulaga ma faamuta lea kegi. Sa to’atuli ia tamaiti talavou i o latou tulivae ma talosagaina se faamagaloga,” o le faaaliga lea a le matai o Vaimoso.

Ua faamagaloina i latou ae mo le faagasologa i luma-a toe tulai mai se isi mea-o le a le toe taaliaina ma o le a feagai loa le nuu ma i latou. Ae mo le taimi nei-o loo faamaopoopo e le nuu faamatalaga ma ua matou maua e faapea e le o i latou uma e mai Vaimoso…ae matou te faatoese atu i le atunuu ma i latou ua afaina-ma faatama’ia a latou meatotino e tamaiti ma matou te ta’utino atu o loo feagai le nuu ma i latou. 

E talitonu Aulavemai ua filifilia e le nuu se komiti faapitoa e leoina alatetele i le po ma tausi le saogalemu ma o soo se tamaitiiti e fealua’i solo i lea taimi o le a auina atu i lona aiga.  Na ia toe ta’ua foi e faapea ua faamagaloina tamaiti talavou maua poloaina ina ia faamuta le O.B.O. “O le a fai se faiga ia i latou ma ua uma ona ta’u i ai o le kegi lea o le O.B.O.ia ‘aua nei toe talanoaina ma o le a aveeseina e atua atu i le asŏ,” o lana faaaliga lea.

“O nsi o le nuu na latou ofo atu le toe valiina o nisi o pisinisi ia na faaleagaina a latou meatotino e le O.B.O. ma o lea autalavou-o le a toe valiina. Ua uma foi ona matou talanoa e uiga i le tuuina atu i tupulaga talavou se galuega tau le atiina a’e latou te faatinoina e faaaoga i ai o latou taimi –e pei o le galue i fanua. 

Sa fesiligia foi Aulavemai e uiga i mafuaga na tuuina atu e tupulaga talavou ua mafua ai ona latou faatuina le O.B.O. E tusa ai ma ia-o se tasi o tupulaga talavou sa na ta’ita’ia lea vaega fai mai o le O.B.O. na faatu e faavae ai ni sootagata i le va o tupulaga talavou mai Vaimoso, Taufusi ma isi lava nuu.

Ae o le mea ua matou maua o lea igoa ua aumai ai se uiga e ese ai ma o le uiga o le igoa e le o atagia ai lea tulaga ma o lea ua la’a ai le nuu i totonu e faamuta lea tulaga. O nisi o tamaiti i totonu o lea kegi latou te le iloa se mea ua latou  i ai mai le mea ua ua o i ai ae ona o le una’i a tagata ae leai se latou malamalama pe o le a lea mea. Ae mo le Ola poo le Oti, fai mai Aulavemai na ta’ua e ia tamaiti e faapea o se igoga puupuu lea e iloa ai latou   Ina ua fesiligi pe ua molia ia tamaiti talavou e Leoleo, fai mai Autagavaia- e leai.

 “E leai se mea faapena na faaalia i totonu o le fono ma Leoleo)” o lana faaaliga lea. 

Na latou o mai lava e saili sa matou fesoasoani e tusa ai ma lenei mataupu ina ia mafai ona faamuta nei kegi. 

E leai se faamoemoe o le nuu ina ia tuuina atu tupulaga talavou i le Faamasinoga ae pei ona ‘ou fai atu-matou te manana’o e faafailelei i latou ma faafeagai ma i latou e ala i o latou matua, ekalesia ma le nuu.

Sa le mafai ona maua mai se manatu aloa’ia mai le Matagaluea o Leoleo ananafi.O le Fofoga o le Matagaluega o Leoleo o Maotaoalii Kitiona Kaoneta o loo i Niu Sila ma sa le avanoa Su’a Muliaga Tiumalu-ina ua fesoota’i atu i ai.  Sa masalomia e faapea o lea kegi a tamaiti talavou ua ave e leoleo i le faagasologa o le latou galuega i le maketi i Savalalo i le Aso Toanai o le vaiaso talu ai.   O se tagata sa tutu e latalata ane lea e le manao e faailoa lona suafa –o se tasi lea o le toatele o tagata ia na suesuega e leoleo ia sa ofu sivili.

Sa ta’ua e se molimau e faapea e sili atu i lo le luasefulu tamaiti talavou na pu’e i le taeao o le Aso Toanai ina ua maua e Leoleo se ofu mumu ia i latou ma sa masalomia o sui o le O.B.O.O se tasi o alii leoleo na feiloai ma le afioaga o Vaimoso ananafi –na ia faaalia o lea feiloaga-e toatasi se tagata ua maliu ma ua masalomia le aafia ai o ia tuulaga talavou.

“Ua o’o mai Kegi i lo tatou atunuu ma ua faamata’u ai le saogalemu o tagata lautele,” o lana faaaliga lea. “E toaitiiti Alii Leole o loo feagai ma le faitau afe ma afe o tagata ma matou te manaomia la outou fesoasoani ma le lagolago..,..tatou te taufai feleagolago ma’i-o le tasi i le isi ma tatou te galulue faatasi aemaise ai lava pe afai o a tatou fanau ua aafia i totonu o nei kegi.”

By Lanuola Tusani Tupufia 03 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>