To’ai i fanua, tama-fanau iloga, o fetu-pupula o le musika

By Sarafina Sanerivi 07 July 2016, 12:00AM

Na amatamata malie a i se tulaga fa’ale-iloga i le amataga, o nai taleni masani lava i totonu o le aiga ma fa’asolosolo atu ai loa le fa’aili o le OZKI Band ina lauiloa i le lalolagi.

O nei la, e iai sa latou tala fiafia e fia momoli atu i le mamalu lautele o le atunu’u e fiafia e fa’afofoga ma tu’uina atu fo’i le lagolago mo latou. O le a faia sa latou ulua’i fa’aaliga, o se koneseti muamua i Samoa nei, i le afiafi a-taeao i le fale-kalapu o le Ace i le taulaga.

Na amata lava lea fa’aili e se ‘auso-to’alua, o ‘Auimatagi Gaberiel Pa’ese Si’a Fa’amausili ma Galumalemana AJ Pa’ese Si’a Fa’amausili.   

 “O le OZKI na amata i ‘Ausetalia a’o le’i malaga mai i Samoa nei i le 2011,” o le fa’aaliga lea a ‘Auimatagi Gaberiel.

“Ma amata malie mai ai lava, ma o le taimi nei, lea ua iai le sui lona tolu o ‘Ete.” 

O le fa’aili na fa’aigoaina e le tua’a (tama) o le ‘au-uso lea, le afioga a ‘Auimatagi Le’aumoana Si’a Fa’amausili.

“OZ, o le fa’apu’upu’u o Ausetalia, lea na amata ai le fa’ailil ma le ‘KI, o le fa’apu’upu’u o le Kiwi, le mea na matou fananau ai.” 

Na fa’aosofia lava le fiafia o le ‘auso i musika, mai pese-Lotu a’o laiti lava, o le fa’aaliga lea a Galumalemana AJ. 

 “Na amata lava mai lotu i le aiga soso’o ai ma le falesa,” o lana fa’aaliga lea. “E masani tele le matou toea’ina ona fa’apea mai, e to atu le pese o le lotu-afiafi, i aso ua mavae.” 

“O le mea lava lena na amata ai, ma fa’aosofia ai loa le fiafia e fa’alautele le taleni. Na amata mai le falesa ma le tuputupu a’e sa a’oa’o pea ina ia iloa fa’aaoga le taleni ma fa’asolo atu ai lava.” 

Ua tele taimi sa fa’afiafia ai le fa’aili i Samoa nei i tausaga ua mavae, peita’i, o le latou ulua’i koneseti lea i Samoa nei, o le a faia i le po a-taeao.

O se finagalo na a’e ina ua mae’a le fa’afiafia i se fa’aipoipoga sa faia i le vaiaso talu ai.

“Ua leva lava ona matou manana’o e fai se matou koneseti i si o tatou atunu’u nei,” o le fa’aaliga lea a Galumalemana AJ.

“E masani ona matou fa’afiafia i Samoa nei, ae o le taimi nei, ua nonofo uma matou nei i fafo. O Gaberiel i ‘Ausetalia; o Josh e nofo i Niu Sila ae na o ma’ua ma ‘Ete e nonofo i Samoa nei. Ae o lea fa’atoa iloa le avanoa lea ina ua matou fa’afiafia i se fa’aipoipoga i le fa’ai’uga o le vaiaso talu ai. A ua leva lava ona matou fa’afiafia i Samoa nei.” 

Na fa’ailoa fo’i e le sui lona tolu o le fa’aili, le ali’i o Josh Iopu Masi mai le fa’aili a le Three Houses Down i Aukilani, ua matua fiafia lava ma ua talotalo fo’i ia taunu’u manuia le fa’amoemoe i le afiafi a-taeao. 

 “Samoans are observers, I mean they like to party, but they mostly observe the brand when they play, but at the same time, they really appreciating the band. 

“E lagona lava le fiafia pe a toe fo’i mai i Samoa nei,” o le fa’aaliga lea a le sui ta-kitara o le fa’aili.

“E fia faia se galuega fa’afiafia mo Samoa ma ona tagata ma fa’ailoa atu fo’i a matou taleni. Atonu fo’i e una’ia ai tupulaga o le atunu’u i se tulaga lelei. E fa’amalosia ai latou ina ia fa’amalosia so’o se taleni ua foa’ina e Le Atua. O se fiafiaga le toe o’o mai, e lagolago atu i o’u uso i’inei aua ‘ou te iloa, o Samoa lava le ‘autu o mea uma, na amata atu ai fo’i ma o le va’ai atu i le aga’iga’i pea i luma i tausaga uma, o se fiafiaga sili lea mo a’u nei ma matou uma.” 

Na ta’ua e le OZKI, e matua tele lava le ‘ese’esega o le fa’afiafia i Samoa nei ma le fa’afiafia i fafo atu.

“E matua mata’utia lo tatou atunu’u,” o le fa’aaliga lea a ‘Auimatagi Gaberiel.

“O o tatou tagata e matua matau-mea lava. O le uiga o la’u fa’amatalaga, e matua fiafia lava i fa’afiafiaga ae aupito sili ona fa’afiafiaina pe a ta-ta le fa’aili, a’o le taimi fo’i lea, e matua talia lelei ma aloa’ia, fa’afiafiaina fo’i ona o le fa’aili. 

 “Ae ona o lea ua i Samoa nei, ua matou iloa lelei le tulaga e o’o iai. Ae ‘ana o se fa’aili ‘ese mai fafo lea e malaga mai i Samoa, e mautinoa e le malamalama i le tulaga lea. E matua ‘ese’ese lava lagona e o’o iai le ‘au-matamata ma le fa’alogo fo’i a le Samoa moni. 

O le sui lona fa o le OZKI, o Eteuati Risatisone Reupena, lea na ‘auai i le fa’aili i le lua tausaga talu ai.

“Matou te tausoga ma tagata nei,” o lana fa’aaliga lea. “Sa ‘ou alu e ‘ave iai le piano i le latou fale i le isi taimi sa fai ai sa latou fiafia i le po lava lea, ma fai mai ai loa ‘ou te alu atu matou te fiafia fa’atasi.”

O Eteuati, o se tasi sa iai fo’i i le fa’aili (na o tama) a le Ekalesia Fa’apotopotoga Kerisiani Samoa a Tanugamanono, lea sa usuina le Vi’i o le Fua a Samoa ma Tonga i le ta’aloga faitaulia i le masina ua mavae atu. O ia o le atali’i o le tausoga o Eteuati ‘Ete, le isi Samoa logologoa o le Laughing Samoans, ma le logologoa i musika, o Igelesia ‘Ete. 

O le mae’a ai o le koneseti i le po o le Aso Faraile, o le a alo loa le OZKI i le isi a latou fa’aaliga tele e soso’o ai.

“E iai le matou malaga e alu i Amerika Samoa, ma fuafua ai loa aga’i i Hawai’i ma le Iunaite Setete o Amerika. 

“E le o toe mamao ae malaga i Savai’i ona e iai o matou aiga i Savai’i, ua leva ona fia o’o iai ma fia faia ai fo’i se fa’afiagiaga i le motu tele.

E le’i leva tele atu, talu ona fa’alauiloaina le CD fou a le OZKI.

E sefulu pese o iai ma e tofu lava le pese ma le fe’au o lo’o momoli atu ai.

 “O se fa’ata’ita’iga, o le tasi o pese o iai, o “O’u mafaufauga”, o se pese e aualofa ai i matua uma lava ma so’o se matua i Samoa nei ma so’o se atunu’u.” 

O saunoaga fa’ai’u mai le Fa’aili o le OZKI, e manana’o ai e momoli atu la latou fa’afetai tele i a latou pa’aga, o uo ma a’iga uma fa’apea le lagolago a le atunu’u aoao, i taimi uma mo latou.

“Matou te le fia ta’ua se suafa ne’i misia se tasi ae matou te fa’afetai tele atu i uo, aiga ma le atunu’u aoao, ona o le lagolago ua tu’uina mai,” o le saunoaga lea a ‘Auimatagi Le’aumoana Si’a Fa’amausili.

“E momoli atu fo’i le fa’afetai ma mo’omo’oga fa’apitoa mo le Kolisi Fa’aFaife’au i Malua, le EKFS i Malie ma le EFKS i Tanugamanono.” 

O ‘Auimatagi Gaberile Si’a Fa’amausili ma Galumalemana AJ Si’a Fa’amausili, e mai afio’aga o Malie, Vaiala, Faga, Lalomalava ma Safune i Savai’i.

O Josh Iopu Mase e mai afio’aga o Levi i Sale’imoa, o Safotu ma Si’umi. O Eteuati Risatisone Reupena e mai afio’aga o Lalomalava, Fusi i Safotulafai, Moata’a ma Lepa.

E amata le koneseti a le OZKI i le 7.00 i le afiafi o le po-taeao. ‘Aua ne’i misia le avanoa lelei lenei e silasila ai ma fa’afofoga i taleni a ia fo’i alo o le atunu’u. 

By Sarafina Sanerivi 07 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>