Manuia lau Malaga Taulapapa Fesola'i Fa’amanatu!

By Ilia L Likou 07 January 2018, 12:00AM

O le aso ananafi toe sauniga o le tinā i a Taulapapa Fesola’i Talailelotu Fa’amanatu Nielsen lea na fa’ataunu’u i le malumalu o le Ekalesia Fa’apotopotoga Kerisiano Samoa , Moata’a.

O le Susuga i le Fa’afeagaiga i a Semikueva Epati na ia ta’ita’ia le lotu o  lona toe sauniga.

Na saunoa le afioga i le Ali’i Palemia e fa’afetaia le tautua matavela o lenei tinā mai le tele o tausaga aemaise ai le auaunaga fa’ateine Tausima’i i le atunu’u.

Na ia fa’afetaia ai fo’i le sao taua a le tinā i so’o se itu na mafai ona ia fa’atinoina a’o soifua mai  o ia.

O le Aso Faraile, 22 Tesema  o le tausaga ua mavae na ‘amia ai e le Atua lana ‘au’auna i a Taulapapa Fesolai Talailelotu Faamanatu Faletoese Nielsen.

O se tinā ua iloga lana tautua i le atunu’u e ala i le Foma’i Tausisoifuai i le silia ma le 50 tausaga o lona soifua lea o lo’o avea ai o ia ma Peresetene o le fa’apotopotoga e o’o mai le taimi lenei.

O Taulapapa ua 84 le matua o lona soifua ma na soifua mai i le Aso 3 o Setema 1933 i le afio’aga o Moata’a.

O ona tua’a o le Susuga i le Fa’afeagaiga i a Kenape Tu’u’u Faletoese ma Fa’api’omalo Asi Vatau ma ua maliliu uma.

Na fa’aipoipo atu o ia i le tamā i a Fainu’ulelei Etuale Osasa Nielsen ma e to’afitu o la  alo lea e aofia ai Farah, Fa’api’o, Edna, Junior Etuale, Fa’amanatu Jr, Pasila ma Edwina.

O lea lava lona sao taua e o’o mai lava i le taimi lenei o lo’o iloga ma logo malie pea i le to’atele o tagata o le atunu’u aemaise o ona alo.

Na fa’aleoina e se tasi o ona alo i a Ulutautogia Etuale i le fa’atalatalanoaga ma le Samoa Observer le fa’anoanoa ona o le tu’ua ai lea o le mafutaga ma le tinā.

“O si o matou tinā e tele ona uiga e fa’agalogata ai o ia i totonu o si o matou aiga, e amata mai lava ma le mafutaga ma le tamā o le aiga se’ia o’o mai i a’i matou le fanau.

“E ote tele, ma e pei o lana a’upega lea e fa’atonu ai matou i aso uma pe a va’ai mai ua matou fa’aletonu i totonu o le aiga.

“O se tinā e loto alofa i a’i matou, aemaise lana galuega e pele i a te ia.

“O le olaga atoa lea o lo matou tinā, o le avea ai o ia ma teine foma’i tausisoifua, na matua’i  ave uma ai le fa’amuamua o lona soifua i taimi uma, mai lava le amataga o lo la aiga ma le tamā, soso’o mai  matou le fana ma a matou fanau ma e o’o mai lava le taimi lenei o lo’o aveavea’i ai pea.

Na ia fa’ailoa ‘o lo matou tinā o se tagata e fiafia e tatalo’

“O ona matua e faife’au ma o se tinā e tautua lotu ma e alofa tele i lana Ekalesia o le E.F.K.S.” Ulutautogia.

“E fiafia tele i le tatalo... e le galo oe Mama.

O Taulapapa o se tasi o Tiākono matua o le E.F.K.S. i Moataa’a.

“O le a o matou misia o ia, ae alu ia Mama ia manuia lau malaga!

Na aoga Taulapapa i le Aoga Tulaga Lua i Saleimoa se’ia o’o i Malifa ma faasolo atu ai Papauta i le tausaga e 1950.

E tele nisi o fa’ailoga taualoa o lo’o ia umia e le gata mai atunu’u i fafo ae o Samoa nei fo’i.

O le tausaga e 1956 na avea ai o ia ma Teine Tausi Soifua Fa’amauina ma o Savai’i i nisi o falema’i fa’ale-itumalo na muamua galue ma auauna  ai le atunu’u.

O le auaunaga fa’aTausi Soifua i Samoa lea o lo’o Peresitene ai Taulapapa na fa’amanatuina i le masina ua mavae le atoa ai o le 100 Tausaga o la latou tautua i le atunu’u.

O se agaga fa’afetai lea i le afioga i le Ali’i Palemia, Tuilaepa Sa’iele Malielegaoi i lana saunoaga i lea aso taua.

O lana fa’amalo na ave i a’i latou na mua i malae ma fa’auau mai lava le tautua matavale i le taimi lenei lea e aofia ai ma le tinā i a Taulapapa.

“E le uma pea le agaga faafetai, pe a manatu i lenei aso ma le faamoemoe, ua tatou potopoto mai ai, o le faamanatu lea o le 100 tausaga o le tautua ma le auaunaga faa-Tausi Soifau i totonu o si o tatou atunuu,” Lana saunoaga lea.

“Tatou te manatua ai lava ma le loto faafetai tele i le Atua, ona o i latou o e sa mua’i asa le gāsū o le taeao. 

“O faletua ma tausi, o tina ma tama’ita’i o augafaapae faapelepele a aiga, afioaga ma alalafaga, i latou to’agaogao, loto tetele sa mua-i-malae i le faatinoina o lenei auaunaga. 

“I latou sa gasea ma le le faalogologotiga, le fefefe ma le solomuli i le faatinoina o o latou tiute ma faiva faa-Tausi Soifua. 

“Amata mai lava anamua, i taimi tonu a o vevesi le lalolagi, i taua tetele i tausaga ua mavae, lea na aafia tele ai ma Samoa. Le taimi a o puleesea si o tatou atunuu e malo mai fafo.

“E manatua foi ma le alofa i latou ia ma Tausi Soifua uma i le faagasolo mai o lenei 100 tausaga ua atoa. I latou ua saga mai i a pouli le folauga, ua tofafa mai tiasa, faapea foi nisi o e ua malolo manumalo, ina ua afu la latou tautua.

“E tautala aso pea lo latou taua, la latou tautua sa tuuina mai mo Samoa ma ona tagata. E ui ina sa to’agaogao le aufaigaluega, sa utiuti foi ma laiti o latou totogi. 

“Sa le lava mea faigaluega e faatino ai la latou auaunaga, ma le lelei auala o femalagaina ma feesootaiga. 

“Sa vaapiapi lo latou silafia o le galuega ma le oo oo lo latou tomai ma le malamalama i le maualuga moomia ona sa le tele ni avanoa e saga tapu’e ma faafailele lo latou silafia i le faatinoina i le lelei aupito silisili, o tiute ma faiva alofilima faa-Tausi Soifua.

“I le faagasolo mai o le soifua ma le tula’i mai o le Malo Tuto’atasi o le atunuu, sa le ‘ela le silasila a Ta’ita’i le ave pea o le faamuamua i vaega ia aua lava se Samoa soifua maloloina.

“Taimi nei, e le o laaloa le silasila a le Malo i le lotoifale o le tafafa ina ia saga faaleleia pea ma siitia maualuga itu tau soifua maloloina ma tulaga tau aoaoga. 

“O le manulauti tauave pea lava pea a lo tatou Malo ia tumau ai pea ona avea Samoa ma ona tagata o se atunuu manuia.

By Ilia L Likou 07 January 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>