Aloa’ia le tautua a tina-matutua o le ‘Au-Uso Metotisi

DF
By Deidre Fanene, 07 July 2016

O le po o le Aso To’ona’i talu ai, na faia ai se sauniga i le Malumalu o le Ekalesia Metotisi i Fale’ula, e fa’afetaia ai ma aloa’ia le tautua a tina ua atoa le valusefulu (80) tausaga ma sili atu, ae o lo’o tautua pea, e le gata mo le Ekalesia, ae fa’apea fo’i le ‘auai i galuega a le ‘Au-Uso Fealofani. 

Sa taua’aoina atu i tina uma nei, pine-aloa’ia mo le tautua le-fa’alogologo-tiga fa’apea fo’i teutusi o mea-alofa tupe, o se vaega e fa’afetaia ai lo latou sao taua mo le ekalesia. 

E le gata la o le fa’amoemoe lea sa fa’apitoa mo tina-matutua ma la latou tautua, a’o le amataga fo’i lea o le Mafutaga a le ‘Au-Uso Fealofani.

Na fa’afetaia e le Peresetene o le Ekalesia Metotisi Aoao, le Susuga a ‘Apineru Lafai, tina matutua ona o la latou lagolago fa’aauau i le ekalesia fa’apea le ‘Au-Uso Fealofani. 

 “Ua aloa’ia ‘outou uma o tina-matutua o le ekalesia fa’apea le ‘Au-Uso, ona o le ‘umi na’ua la tou tautua i totonu o le ekalesia,” o lana saunoaga lea. 

ADVERTISEMENT

“O le afiafi lenei, matou te fa’apea atu, fa’afetai tele mo galulue lelei ae maise lo tou naunau pea e tautua Le Atua ma Lona finagalo, e ala i Lana Ekalesia ma ana galuega uma o lo’o fa’atino.”

Mo le Koneferenisi, na fa’afeiloa’ia e le Peresetene sui uma ua malaga mamao mai atunu’u i fafo ona o le fa’amoemoe o le ekalesia. 

“Ua outou malaga mamao mai lava ona o le fia ‘auai i lenei aso fa’apitoa ma ‘ou te fiafia ai e fa’afeiloa’i aloa’ia atu i lo tou mamalu,” o lana saunoaga lea.

“O lo tou finagalo lava e fa’aauau pea le tautuaina o le galuega a Le Atua, ae maise fo’i le ‘auai mai i le Koneferenisi o lenei tausaga.

 “Ua fai la tou filifiliga e ‘auai mai i Samoa nei mo le koneferenisi, ae le malaga asiasi i isi atunu’u mo se malologa, ua tu’ua ai le tele o tuatuano’a o le soifuaga nei, a ‘ua outou fa’amuamua lava le Atua ma Lana galuega, e tatalo ai, ia saga fa’amanuia atu Le Atua ia ‘outou uma. 

 “O le aso lenei sa tatou talanoa ai pea i tausaga ua mavae ma e ao ai ona si’i le fa’afetai i Le Atua ona o Lana ta’ita’iga ia tatou uma, ua ia momoli mai ai lo tou soifua ma so matou ola i lenei aso ma le fa’amoemoe. 

 “Mo le ‘Au-matutua uma ua aloa’ia ma fa’afetaia i le aso, ia saga fa’aopopoina pea e Le Atua nisi tausaga se tele i lo tou soifua ina ia fa’aauau ai pea ona tautuina o Ia ma lana galuega e ala i magavai ‘ese’ese o le ekalesia o lo’o outou tautua ai.”

DF
By Deidre Fanene, 07 July 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?