SE’I O TA TALANOA

14 February 2016

A FAI ‘EA LE ATUA MA TITI SE’ESE’E O LE MALO?

Tatou te faafetaia pea le alofa ma le agalelei o le Atua Silisili Ese ona ua mafai ona tatou aulia mai lenei Aso Sa i le manuia.

E ui foi ina lamatia lo tatou atunuu i le suiga o le Tau ma uiga o aso, aemaise ai o faama’i pipisi eseese  e lamatia ai le soifua o le atunuu-ae le uma le loto faafetai i le Atua-aua o Ia lava e to’atasi-o lo tatou maluapapa lea i mala ma faalavelave faafuase’i o le soifuaga nei!

E le galo foi mafutaga pele ma matua-uso ma tuafafine-aemaise ai o le fanau pele-ua motusia e le maliu ma le oti. E ui ina tiga ma faigata-ae o loo tatou taunuuga lava lea e tasi-ina ia mafai ai ona tatou ulufale atu i le ola e faavavau-ua uma ona saunia e Iesu Keriso lo tatou Alii ma le Faaola! 

Ae alo maia Samoa- o le tatou talanoaga masani foi lenei ma le ‘aufaitau o lenei nusipepa- e pei ona masani ai i Aso Sa ta’itasi! Ae pei lava ona faamanatu atu pea- o lenei tusitusiga- e le o se tala fai fua- e le o le fia tuua’ia o se tasi-e le o se faaleaga foi pe o se faaoloataua-ae o le fia faailoa atu lea o mea o loo tutupu i totonu o lo tatou atunuu-ina ia mafai ona tatou talanoa faatasi i ai!

Ia o lena ua tusia i luga le ulutala o lenei Talanoaga-ma e i ai foi le taofi-e le o se ulutala e faigata ona malamalama i ai-talu ai –ua tatou iloa le mea e igoa o le fala se’ese’e-poo le fala lea e fetosoa’i solo e tagata Samoa- e nonofo ai ma vele le vao.

E leai la se eseesega tele o le fala se’ese’e ma le titi se’ese’e pe a fua i lo latou faaaogaina-se’ia vagana ai e faapea o le titi se’ese’e e lalaga faa-mafiafia i le lauti ona fusi lea i le tino ma saofa’i ai e fai fe’au! Ae o le fala se’ese’e-o se ituaiga lea o fala papa.

O le titi la poo le fala se’ese’e-e faaoga lava i aso uma-ma o le pogai lea e vave ai ona faaleagaina.

ADVERTISEMENT

O lona uiga la- afai ua fai le Atua ma fala se’ese’e poo le titi se’ese’e o le Malo-o se mea lea e matua mata’utia lava-talu ai e le mafai e se tagata ona avea le Atua ma ona fala se’ese’e-talu ai- a avea loa le Atua ma fale se’ese’e o le tagata-o lona uiga- e ola fua lena tagata a ua oti! Ua mafua la ona fai le Atua ma fala se’ese’e o le Malo-ona o le fai lava o lea mea-pe sese ma lē amiotonu-ae fai mai lava le Palemia-o le tonu poo le faaiuga mai le Atua!

A toe tu’u la i se isi faaupuga-o lea ua tuua’ia le Atua i mea valea ma faiga pi’opi’po ae tatou te iloa lelei- e leai se mea leaga e fai e le Atua!

A tatou toe tilotilo la i faiga pi’opi’o a le Malo e pei ona faamaonia e le Pule ma Su’etusi Sili toe faamaonia atili e le Komiti Filifilia a le Palemene a Alii Ofisa o le Palemene-faatasi ai ma le fautuaga e tuuina atu lenei mataupu i le Faamasinoga, ae o lea lava e taofiofi e le Palemia ma fai mai e leai ni a latou faiga pi’opi’o-o le a la le uiga o lea mea?

O le ta’ua foi o le fasiotia o le isi MInisita e isi Minisita o le latou lava HRPP-na mafua lava ona o faiga pi’opi’o! Ae silasila i le faaupuga a le Palemia fai mai e leai ni a latou faiga pi’opi’o! Afai la o le Malo o Samoa o loo faavae i le Atua  ae o faiga a le faigamalo e le namu Atua-o lona uiga- o lea latou te fai le Atua ma o latou fala se’ese’e!

E fai atu loa le atunuu ta’u mai loa ma le suafa o le Atua- ae a tilotilo ia latou faiga-o le matua fete’ena’i lava ma le finagalo o le ATua o loo faavae ai Samoa. Afai la o lea ua savali i le 40 tausaga o fai lava nei faiga pi’opi’o-o le a la sau lava faaupuga i nei ituaiga o ta’ita’iga? O se mea tatau le ta’u o le suafa o le Atua i mea leaga ma faiga pi’opi’o?

O se faiga lea e manuia ai se atunuu?

O le itu mata’utia la- e tiga lava ona pi’opi’o ma fai mea leaga- ae le uma lava le fiapule aoao ma le faatautala i tupe ma meatotino a le atunuu! O le fesili la Samoa- afai ua fai le Atua ma fala se’ese’e o le Malo-e te talitonu la e faapefea ona maua ni manuia o Samoa? O se mea lea na loto i ai matua ua tofafā mai Tia -sa asaina le gasū o le taeao mo se manuia o le atunuu? O se ata poo foliga ia o se atunuu e faavae i le Atua Soifua!

O le tulaga lea ua i ai nei a fai atu le atunuu ae ta’u mai le suafa o le Atua. O se faailoga lea o ni taitai e ava ma matata’u i le Atua? Ia-o lea foi ua tatou toe alo atu i le Palota-ae o le itu mata’utia- e tiga lava ona latou iloa ua tofu i Seoli le atunuu talu ai a latou faiga-ae le uma lava le fiapule aoao! Silasila ua o’o i tofi e gata i Tamaaiga a Samoa ua tufa solo e pei lava o ni mea a o latou matua! O le fautuaga la i le faigamalo-e tatau ona toe silasila lelei lava i lo tatou va tapuia ma le Atua! E le o se Atua e te taalo I ai!

O manatua Nepukanesa na a’i i le mutia e pei o le manu! Afai la tatou te fia maua se Samoa ua faamanuiaina e le Atua-e ao i o tatou Ta’ita’i ona silasila toto’a i lo tatou  va ma le Atua! 


14 February 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?