Olaga mafatia o se aiga mai Safata

DF
By Deidre Fanene, 28 February 2018

O se olaga faigata ia Olevia Taitasi.

O le tauagata o le soifuaga ma le lēai o se tamaoaiga o nei mea e lua ua avea ma auala ua tau le mafai ai e lenei tinā ona tauave nei puapuaga.

O Olevia e to’alima nai ona alo mai le afioaga o Lotofagā Safata.

I le la’ua fa’atalatalanoaga ma le Fofoga o Samoa sa ia fa’ailoa ai o se tulaga faigata tele le tausu’eina o se suavai.

O le iai ai o se fale le ta’ua i se tualaga le lelei, ma lana tama fa’ato’ā 17 tausaga le matua o lo’o tausia le aiga, o ni avega fa’aopoopo lea i luga o le lenei tinā 38 le matua o le soifua.

Sa ia ta’ua o nisi o aso e leai ai se mea e na te maua e fafaga ai ma tausi ai lana fanau.

Sa ia fa’ailoa fo’i o le totogi o lana tama lea e 17 tausaga le matua i le vaiaso e na o le $70, ma e le taitai lava lea mo le fa’asoasoaina i le tausiga o le aiga.

“Na matou fa’atauina mai ni paelo i le vaitaimi o le Eveni i le tausaga e 2012, e fa’atatau lea a iai se fa’aletonu i le vai, o lea e iai paelo nei e tua iai auā le la’uina mai o le vai, e fa’aaoga.

“O le avega mamafa le tau su’eina o se suavai, ma o le mafua’aga lea e mana’omia tele ai se tanevai e fa’afaigofie ai ona sefe ai le vai.

“Ae peita’i e le gafatia fo’i le tau o se tane vai ona e fai si tauagata ae e le lava le tupe maua.”

Ua lima tausaga talu ona fa’aaogaina e lenei aiga se fale eli (se’i tulou) ma o lana miti, ia sau ia se aso e fai ai se fale le ta’ua fa’aneionapo.

ADVERTISEMENT

“Ua matou mana’omia lava se fesoasoani i le itu lea o le fale le ta’ua.

“Ona o ituaiga fale fa’apenei e ono lepeti ai le soifua maloloina e le gata i le fanau ae fa’apea ai le aiga atoa.

“O lo’u atali’i e na te va’’aia le pa povi a se tasi o toeina , e tolu aso e faigaluega ai ma e na o le pau lea o le alaga tupe lea e maua i le taimi nei .

“Ma e le mafai ona lava e le tupe lea e maua e le atali’i ona fausiaina se fale le ta’ua lelei ma mama ma soifua maloloina.”

O le popolega tele o lenei tina o lana fanau ona o lo’o laiti lava, ae peita’i e leai se fale lelei ma se nofoaga mautu e nonofo ai, o le mafua’aga lea e popole ai.

“E toa’lua tamaiti o lo’o ao’oga, o le isi e 10 tausaga a’o le isi e 6 tausaga ma le isi to’alua laiti ei lalo atu.

“Ua leva ona iai le fuafuaga ma le tamā o aiga e toe fa’aleleia le fale, ae ona o le fa’aletonu i le itu tau seleni o lea ua taofi ai lenei fuafuaga, ae o lo’o iai ni apa ua uma ona iai.

“A o’o mai mala fa’alenatura ona matou o lea i le fale o lo’u uso matou te nonofo ai ona e le saogalemu lenei fale i taimi fa’apea.”

O lo’o ia augani mai mo se fesoasoani.

“O lo’o iai le matou togala’auaina ma le fa’atoaga e tua iai mo se tupe fa’aopoopo, ae ona sa matou pisi lava i le maliu o si o’u tamā sa le maua ai se taimi e asiasi atu ai i le fa’atoaga.

“Afai ae maua se taimi avanoa, a le alu i le fa’atoaga ou te alu i le aoga a si a’u tama o lo’o i le vasega amata.”

Sa fa’aalia e Taitasi o le tasi o fa’afitauli tele o lo’o mafatia ai latou o le tau lea o le soifuaga ua tele ina matitiva ai le to’atele o tagata Samoa.

“Ua le mafai ai ona tausi le fanau ona o le taugata o tau o oloa ae laiti totogi o tagata faigaluega.

“E le taitai gafatia e le $70 tala ona fa’atau se tane vai, toe fai le fale aemaise ai le fanau i aoga ona fai nei mea uma.”

DF
By Deidre Fanene, 28 February 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?