O LA’U TALA FO’I

20 May 2016

1. Matauina i Tala Fou le matua teena e se tasi o tamali’i o Sogi-le Afioga a Nanai Lui Tokuma-le finagalo o le Palemia-ina ia latou tuua Sogi. Fai mai Nanai-“ua latou mautala o le a fai e le Malo se fale talimalo tele iinei.

O le eleeleele lenei na tuuina mai e o matou matua- matou te nonofo ai e faavavau. E tele a matou tupe ua alu i le tau atiina a’e o matou aiga ma o matou nofoaga i le tele o tausaga…! O le mea lea-“matou te le o ese mai iinei”!

O le mea lea-soia ona e faalavelave ia i matou! Faafetai i lau lapataiga e tatau ona matou o ese. Ae o se mea lenei matou te fia faailoa atu-“e leai sou iloa poo se malamalama lava e tasi e uiga i lenei fasi eleele.

O le mea lea-tuu ai pea i matou. O le 30 aso lea na tuu atu e le Palemia e o ese ai tagata Sogi mai lea nofoaga-ua leva ona uma ma e le toe maua nisi avanoa. E le’i ta’ua la e Nanai poo le a le isi gaoioiga a le Malo e soso’o ai-o Nanai lava ia- e matua tete’e lava i le faatonuga a le Malo ma- latou te le tuua foi Sogi.

“Mo le silafia e le Palemia-o le eleele lenei na tuuina mai i lo matou tamā ua maliu- o Tokuma Torurae e Mataafa ua tuumalo-le ulua’i Palemia o lenei artunuu,” o lana saunoaga lenei i lo’u tamā-“Alu e nofo i lena eleele ma lau fanau- ua le mafai e le Malo ona toe totogi atu mea o loo nofo aitalafu ai i lou tamā.

Ina ua talosagaina la Nanai e faamanino mai lea tulaga-fai mai a ia-: ‘na sese ona molia lona tama i le maliu o le isi tagata faipisinisi’ ‘Na faasalaina o ia i le oti’-o le faaaliga lea a Nanai. “Ou te manatua lelei lava le taimi na faatofa mai ai lo matou tamā ia i matou- ma ona lima ua lokia i filifili-ma le maea ua faamaulu i lona ua-ma le ‘ie sa ufiufi ai ona mata.

A o savali atu o ia i le mea e sisi ai-e to’alua ni alii Saina na taufetui atu ma ta’u i Leoleo-o i latou na fasiotia lea alii faipisinisi-ma o lea na faasaoina ai le ola o lo’u tamā. Na toe faasa’olotoina lo’u tamā….ma o le pogai lena na ofo atu ai mo ia- lenei fanua e avea ma taulaga o le filemu.

ADVERTISEMENT

Sa le mafai e le malo ona totogi se taui tupe mo le mea na fai i lo’u tamā-ma o le pogai lea na tuuina atu ai ia te ia lenei fanua…..! Afai la o lea-o le a le pogai o le tau aveese o nei tagata soifua mai Sogi? O lē fea e taua? O le fale talimalo poo soifua o tagata? O le a sou taofi? 

2. Matauina foi i Tala Fou ni taavale fou se tele a le Faalapotopotoga o le Malosi Faa-Eletise-fai mai o le tau atoa e $1.7miliona. A silasila la i lenei tupe-e le o se tupe laititi-ae a fua i le auaunaga mo le atunuu atoa-faitalia lava oe pe o lelei pe o leaga!

A toe tilotilo foi i lenei tupe tele ua faaalu mo nei taavale fou-o le fesili-o fea e aumai ai lenei anoano o tupe? E mafai ona faapea o ni tupe maua masani mai ana auaunaga i le atunuu? E mafai ona faapea o ni tupe ua faasaoina ona o lea ua totogi  e le atunuu le aitalafu a le Faalapotopotoga, le tau o suau’u ia o loo aumai e vili ai le eletise-ae toe totogi foi e le atunu a latou lava pili molī?

Afai e tele le tupe ua faaalu i nei taavale fou-faamata o le a faaleleia ai lana auaunaga i le atunuu atoa-e pei o le pe soo o le eletise ma le fiu e logo atu le Ofisa pe a motusi uaea eletise-ae leai lava se tali lelei e aumai-ona taatia ai lava lea o ia uaea eletise ua motusi?

Afai la ua fai mai le MInisitaa e le o ni taavale mea taalo poo ni taavale tutu’u-o lona uiga- o le amio lea a le aufaigaluega a le EPC le faaaoga o ia taavale mo tuuga? O le a sou taofi?

 Ua maua foi i Tala Fou fai mai ua fai le lautusi fou mo le Kolisi o Avele. A toe faaupu ona faapea lea o lea ua fai se amataga fou mo Avele. O lona uiga-o lea ua fai aiaiga ma feagaiga i le va o le Malo, Matua o Tamaitai A’oga ma le Alii Pule ma le mamalu o Faia’oga.

O lea foi lautusi fou-fai mai e tele tapu ua faata’oto-ma o le matau i ai-o le mamafa o ia aiaiga-ua i luga nei o matua- aemaise ai o tamaiti a’oga! Aisea? Leaga o se tasi o ia aiaiga e faapea e toe tupu mai loa nisi faalavelave e pei o faalavelave talu ai nei na faatupu e le Kolisi o Avele-o le a tapuni tumau loa le Kolisi!

Ae faapefea la tamaiti a’oga? O le tali-fai mai e leai se tasi o ia tamaiti a’oga- e mafai ona toe talia i se isi lava a’oga! O lona uiga la- e toe tupu mai loa se faalavelave-ona fo’i loa lea i le aiga e fai le maumaga ma alu e fagota ma tautua le aiga ma le nuu!

O lona uiga la-o le a uma le fia tama mamafa a ua leai se mea e mafai! O le mea lea-“o le tuu-a-lalo- e le toe sau faalua se manuia-ae e faatamala i le taimi nei-e te le toe maua!

Ae talofa e i le pologa o nai matua-talu ai-ua moni le upu a le atunuu-“Ua lavea fua Foaga ae le’i fai misa”! A’o ai e mafua ai? O outou lava le fanau-ae na ala ona ave outou i le aoga- ina ia outou maua le poto ma le aoaoina-ina ia manuia ai outou aiga-ma a outou fanau i le lumana’i! O le a sou taofi?

20 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?