Sauni Eleni e toe fa’afo’i tagata sulufa’i i le vaiaso fou

By Ilia L Likou 03 April 2016, 12:00AM

O lea le tulaga manino o lo’o ua i ai nei le tele o tagata sulufai atu i le atunu’u lenei o Greece ma e o’o mai le taimi lenei e le’i iloa lelei ma lava se tali maumaututu pe fa’aauau pe leai fo’i.

 O lea fuainumera tele o lo’o fa’atupula’ia e o’o mai i le taimi lenei ma ua fa’ailoa mai nisi o faiga fa’ailoga lanu i le to’ai taunu’u atu ai o tagata sulufa’i i totonu malo tetele nei.

O lo’o ua fa’ailoa mai o le tele o tagata sulufa’i o lo’o uia atu tuaoi o Greece o lo latou fa’amoemoe tele o le o’o atu ai lea i Siamani, aepeita’i o lo’o ua amata nei ona punitia nisi o tuaoi aua le sopoia ai lea mo nisi o atunu’u.

O le taimi lenei o lo’o ua to’atele o lo’o nonofo pea i tuaoi e pei ona i ai Marcedonia ma Greek e talia ai se taimi e tatala ai aua lo latou savalia ai lea o vaega tetele o Europa lea o lo’o fia malaga i ai mo ni Sulufaiga ona o taua ma fevaevaeaiga o lo’o feagai ma o latou atunu’u.

O ripoti talu ai o lo’o ua ta’ua ai le tele o nisi o Setete i totonu o Europa ua amata ona o latou silasila i nisi o vaega e mafai ai ona o latou taofia le so’ona uluafale atu o le ‘au sulufa’i i totonu o latou atunu’u.

Na fa’ailoa mai e le Guadian e fa’apea na faia ai se palota i totonu o Suiteselani ma nisi o vaega o Siamani aemaise o le ogatotonu o Europa ina ia fa’ataunu’uina faiga ma se alafua tatau ma le maioio lelei ina ia fa’asaina ai tuaoi o setete tetele nei ona toe ulufale atu i ai se tagata sulufa’i.

O se faiga ma se naunauta’iga o atunu’u ia ina ia tau taofiofi tagata nei aua lava lo latou saogalemu aemaise o le malu puipuia ai lea o i latou i le agai atu ai i le lumana’i.

E le’i mamao atu na fa’ailoa mai ai e Croatia e fa’apea ua taofia tagata sulufa’i ma le ulufale atu i o latou atunu’u .

O se tulaga fa’atupula’ia lea vaega a’o taumafai atu ai le to’atele o tagata sulufa’i e sosola ese ona o taua ma le leai o se sa’olotoga o lo’o feagai ai.

I le taimi lenei e silia ma le 2,000 le au sulufa’i e amata mai tagata matutua se’ia pa’ia tamaiti o lo’o i lea laina fa’atalitali mo se fesoasoani i le malulu ma le timu o lo’o feagai ai ma nei atunu’u.

O ni ripoti a le Fono a Malo ‘Aufa’atasi i le amataga o le tausaga ua mavae na matua’i manino lelei mai ai le  fetogia’i ai o tu’u’aiga a ta’ita’i o Amerika ma Rusia, ma tu’ua’ia ai e le isi le isi ona o le taua fa’a’umi’umi i Suria ma le fa’afitauli o tagata-sulufa’i ua alia’e mai ai.

O saunoaga a Peresetene Obama ma le lauga a Peresetene Putin o Rusia na soso’o ai, sa laualuga ma faoa le tele o le taimi, i le tatalaina o le Fono Fa’aleTausaga a ta’ita’i o le lalolagi. 

Na fa’amalosia Obama i se taumafaiga e puipuia ai le va-fealoaloa’i lelei peita’i,  na matua iloga lona tu’ua’ia o Rusia i lona ta’u-so’o i lana lauga, ona o lona puipuia o le malo o Suria, lona ave-fa’amalosia o Crimea ma fa’atinoga e lagolago ai fitafita fa’atupu-fa’alavelave i Ukraine.

“O faiga mata’utia nei e toe ono una’ia ai tatou i tua i aso o le pogisa, ma se lalolagi le nofo-filemu,” o le saunoaga lea a Peresetene Obama.    

O faiga mata’utia ia e aofia ai malo malolosi e le manana’o e fa’aaoga tulafono fa’ava-o-malo ma taumafai e sa’ili le filemu e ala i le malosi fa’aMiliteli, o lana lauga lea.

“A fua i le ituaiga malamalama lea, e tatau ona tatou lagolagoina ta’ita’i fia-pule ma le-alolofa pei o Bashar al-Assad  lea e fa’aaogaina paelo-pomu e fasiotia ai le anoano o tagata-nu’u e leai ni agasala, e mafua ona e sili atu le leaga o tulaga o iai isi itu,” o ana lafoga ia na foliga sa fa’atutu ia Peresetene Putin.  

I se taumafai e foliga o se tali e te’ena ai Obama, na vi’ia ai e le ta’ita’i o Rusia le ta’ita’i o Suria ma fa’apea, o lo’o tula’i lea ali’i mo le filemu ma o lo’o mo’omia e ana fitafita ni fesoasoani e fa’afetauia ai fitafita a Malo Isalama o lo’o avea ma fa’amata’u i le itulagi – ui o fitafita o Assad i le tele o taimi, o lo’o fetaua’i pea ma vaega fa’atupu-fa’alavelave o lo’o naunau ia soloia mai lona tofi, ae le o fitafita a Malo Isalama. 

“O lo’o matou ila, o se mea-sese tele le le-galulue fa’atasi ma le malo o Suria ma ana fitafita lea o lo’o finau malosi e fa’afetaui faiga-fa’aTerorisi,” o le tali lea a Putin.

Ae i se lafoga na foliga o se tamafaiga a Putin e fa’asese ai Obama e uiga ia Suria, na ta’ua ai e le Peresetene o Rusia, le faia “ o se faiga mautu fa’ava-o-malo tu’u-fa’atasi” e fa’afetaui ai Malo Isalama, ia aofia ai le Fono o le Saogalemu o le Lalolagi Aoao e “tu’u-fa’atasia” ma fa’atonutonu se osofa’iga fa’aMiliteri.    

E le o manino mai i le taimi nei, se tali a le Iunaite Setete o Amerika ma ana pa’aga, i lea manatu o Putin. Ae na fa’aalia i tusitala ma vaega fa’asalalau e Peresetene Francois Hollande o Farani, na te talia lea mafaufauga mo se “tu’u-fa’atasiga tele” ae maise fo’i se fa’ai’uga a le Fono o le Saogalemu a le Lalolagi, ae ia fa’amalieina lava tu’utu’uga e lua: o se taofiga o le fa’aaogaina o pomu ma “se taimi fa’atulaga e alu-‘ese ai Assad.” E le’i fa’amalamalamaina e Hollande lona finagalo, i se taimi tonu e tatau ai ona alu ‘ese Assad.  

O ana saunoaga e uiga i fitafita a Malo Isalama mai isi atunu’u, lea ua mautinoa le naunau e fa’atupu se vevesi i Europa, na ta’ua e Putin: “E le mafai ona tatou tu’ua nei tagata solitulafono ua toto-lima e toe fo’i i o latou aiga ma atunu’u e ono fa’aauau ai pea o latou uiga ma amioga fa’aTevolo. E leai se tagata soifua e mana’o e tupu se mea fa’apena, e sa’o a’u?”

E le’i lagona e Putin le saunoaga a Obama fa’apea – lea fa’atoa taunu’u mai i Niu Ioka le ta’ita’i o Rusia mai Moscow. Peita’i, o le finauga i le va o le to’alua lea, ua lau-silafia lava. I le faiga masani lava e tausisia ai pea le fa’aaloalo, na saofa’i ane ai i le va o ta’ita’i ia e to’alua, le Failautusi Aoao o Tupua Ban Ki-moon, i le taimi o tamafataga o le aoauli, lea na saunia e Ki-moon mo nisi o ta’ita’i maualuluga.   

I le taimi o lana fa’amanuiaga, na saunoa ai Ban Ki-moon: “E leai se mea e ta’u o se taumafa-fua,” i lona taumafai e tata’i mai ana malo-fa’aaloalogia, ia fesoasoani i Malo ‘Aufa’atasi ina ia  ‘ausia “Fuafuaga Tau Atina’e Fa’aauau” aua le tafi’esea o le mativa ma le fia’ai i le tausaga e 2030.

Na fa’afetaui ipu a Obama ma Putin ina ua mae’a le fa’amanuia a Ban Ki-moon.

I lana fo’i fa’amanuia, na vivi’i ai e Obama le matai Samoa o Tupua Ki-moon ma fa’apea: “Ua tatou feagai nei ma lu’itau mata’utia i lenei vaitau, lu’itau e fesiligia ai lo tatou malosi e galulue fa’atasi.” 

Mulimuli ane i le aoauli, na tutu-fa’atasi ai Obama ma Putin mo le pu’eina o ata a’o le’i faia se fono ua fiu e fa’atali, a le to’alua lea, e 95 minute. Na fa’atalofa i le amataga ae le tautatala, ae le’i fa’alauiloa maia fa’amatalaga o a la talanoaga sa fai.   

I lana ulua’i saunoaga, na fa’apatapata ai fo’i saunoaga a Obama ia Saina ma lona sosolo atu i le Sami i Saina i Sasa’e fa’apea Iran ma lona lagolagoina o Assad, ae maise fa’asaina o fa’asalalauga a Amerika e ‘aumai i tagata Iran.

“O le alalaga ‘E fasiotia Amerika’ e le maua ai ni galuega pe saogalemu ai fo’i Iran,” o le fa’aaliga lea a Obama. 

Na ta’ua fo’i, o lo’o malamalama lelei lona mafaufau, ae tatau ona mafaufau lelei i sauaga o faia e le malo o Assad i Suria, lea ua mamafa ai fetaua’iga ua silia nei le fa tausaga. 

“Tatou to manatu i le amataga o lea vevesi,” o le saunoaga lea a Obama e uiga i fetaua’iga i Suria. “Na tali atu Assad i solo-tete’e filemu, e ala i le fa’ateleina o le fasiotia o tagata ma avea ai o se si’osi’omaga o fevaevaea’iga ma taua mata’utia.”   

O vevesi nei ua le mafai ai e le anoano o tagata Suria ona talia o Assad e avea ma o latou ta’ita’i, o le fa’aaliga lea a Peresetene Obama. E tutusa lelei lava, o le toe fa’aopoopo atu lea a Obama, o se fa’amamaluina lava o tulafono fa’ava-o-malo, ua mo’omia ai le Iunaite Setete e tali fa’amalosi atu i osofa’iga a Rusia i Crimea a Ukraine. 

 

Na ta’ua e Obama, e iai so’otaga tau-tamaoaiga a le Iunaite Setete i le itulagi lea ma e malamalama lelei i tala-fa’asolopito ua leva a Rusia ma Crimea fa’apea Ukraine. 

“Ae le mafai ona matou nofoa’i a’o fa’aauau pea ona lepeti ma fa’aleaogaina le sa’olotoga fa’aleTagata ma aia-tatau a se atunu’u i ona ‘ele’ele ma fanua. O le fa’avae lena o le maliega na tu’uina atu e le Iunaite Setete ma a tatou pa’aga ia Rusia. E le o se mana’o e toe fo’i ai i se Taua Fa’amaligi-toto.” 

Na fa’ailoa e Obama i le fa’alapotopotoga fa’aVa-o-malo, na te mo’omia le malosi fa’afitafita aupito malosi ma mata’utia i le foga’ele’ele.  Ae tusa lava po’o le a le malosi ma le mata’utia o fitafita fa’amiliteli, pe malosi fo’i tulaga tau-tamaoa’iga, e  le mafai e le Iunaite Setete o Amerika na o ia, ona fo’i fa’alavelave a le lalolagi, o lana fa’aaliga lea. 

Sa ia ta’ua fa’apitoa le taua i Iraq, lea e ui ua silia i le selau afe fitafita ma alu ai le fia-tiliona o tupe, ae le’i mafai ai lava e Amerika ona fa’afilemua lea atunu’u.

Na fa’a’ata’ata le fa’afetai a Obama i le tausia o aga-fealoaloa’i masani fa’ava-o-malo, na mafai ai ona taunu’u manuia feutaga’iga a le Iunaite Setete ma isi malo-malolosi ole lalolagi, mo se maliega fa’aNiukilia ma Iran. Ma, i se tasi o ana fuaitau e fa’ailo ai le fiafia, na saunoa ai Obama, ua fa’atoa fa’afetaia ai e le Iunaite Setete lona tulaga i le va’ai mai a Cuba fa’apea sa fa’aseseina i le amataga, ae i lana lava silasila, ua mafai nei ona toe fa’aleleia le va-feagai ai fealoaloa’i lelei i le taimi nei. 

“A’o sologa lelei pea ia so’otaga lelei, ‘ou te talitonu o le a suia e le matou Konekeresi se avega ua leva na tatau ona le toe iai,” o lana fa’aaliga lea a’o patipatia e le anoano o le fono sa iai. “E le mafai ona maua se suiga o Cuba i se po e tasi ae ‘ou te talitonu, o le talanoa ma fefa’asoaa’i, ae le o le manatu fa’auliulito, e lagolagoina ai suiga mo se soifua lelei e mo’omia e tagata Cuba uma.l

Na una’ia fa’afuase’i e Obama tulaga fa’aTemokalasio ma fa’ailoa atu, “e le mautu ni faiga fa’aFitafita ma fia pule to’atasi.” 

“E mafai ona e fa’afalepuipui ou fili ae le mafai ona e fa’afalepuipui mafaufauga,” o lana saunoaga lea. 

Mulimuli ane i lea aso, na saunoa ai Peresetene Wi Jinping o Saina, ma fa’ailo le mea ua ia fa’aigoaina, o le fa’amuamua a Saina mo le filemu ma le maumaututu o ana atina’e lautele.

Sa ia fa’ailoa fo’i a’afiaga ogaoga tau-tupe a Saina, i le fa’asilasilaga o le se teugatupe e tasi le piliona tala mo Malo ‘Aufa’atasi, ma ta’ua ai le saunia e lona atunu’u o se vaega fa’aleoleo mautu mo le tausia o le filemu, e aofia ai le 8,000 leoleo ma fitafita, pe a mo’omia e le fa’alapotopotoga a le lalolagi.   

Ae ui lava i le fa’aletonu o le tamaoaiga o Rusia ma le tu’ua’ia e Malo i Sasa’e o le pule a Rusia i Crimea, ma le pulea sa’oloto fo’i o Ukraine, ae na foliga na fa’ate’ia e Peresetene Putin le taupulega a le Peretene Amerika, i le faia lea o se faiga-fa’afesuia’i o puipuiga ma Iraq, Suria ma Iran e uiga i Malo Isalama ma vaega o lo’o pulea nei vaega o Suria ma Iraq. 

E le’i mamao atu, sa femate’ai lava Rusia ma Amerika, po’o ai ua fesiligia ai, i fonotaga sa faia a peresetene nei e to’alua.

Na ta’ua e Putin, o Assad o se manu-fa’atau-moa taua e tete’e atu i Malo Isalama; ae na ta’ua e Obama, ua tatau ia Assad ona tu’ua le atunu’u ae le’i fo’ia le fa’afitauli o lo’o tula’i ma ii Suria.  

I lana saunoaga, na ofoina atu ai e Peresetene Hassan Rouhani o Iran, se fesoasoani e “fa’afo’i ai le atunu’u i faiga fa’aTemokalasi” i fe’ese’esea’iga e lua, lea ua tula’i mai ai a’afiaga o Suria ma Iran, e ui ia ia fa’ailo lana lagolago i le vaega na ta’ua e Rusia, o se maliega mai le Fono mo le Saogalemu o le Lalolagi.

“Matou te fa’atu atu fa’apea, o le taua e tete’e atu ai i faiga fa’aTerorisi, e tatau ona tu’ufa’atasi i se maliega faiga fa’ava-o-malo ma ‘aua le fa’atagaina so’o se atunu’u e fa’aaoga faiga-fa’atupu-fa’alavelave mo le fa’amoemoe o se osofa’iga ma so’ona aiaina ai mata’upu a isi atunu’u,” o le fa’aaliga lea a lea ali’i o Rouhani.

O Obama na ulua’i tali o tama-matutua o lo’o fuafua e saunoa i le Fonotaga Fa’aleTausaga Lona 70 a Malo ‘Aufa’atasi, lea e fa’a’autu i mata’upu e uiga i fe’ese’esea’iga ma a’afiaga i Suria – o le sosolo-televave o Malo Isalama ma faiga fa’aIsalama ma le tulaga maualuga ua o’o iai tagata-sulufa’i i Europa. 

I le tatalaina aloa’ia o le Fono Aoao, na suia ai le leo o Ban Ki-moon i lona fa’apea: “Ua fa’ateteleina faiga fa’ailoga-tagata, ua mou atu le fa’atuatua ma le-lava onosa’i a ta’ita’i o malo pei ona va’aia ma fa’alogoina e le lalolagi aoao.” 

O ia saunoaga a Ban Ki-moon, lea ua i lona tausaga mulimuli i le failatusi-aoao a Malo ‘Aufa’atasi, e le masani ona tu’usa’o fa’apea.

Sa ia talosagaina ta’ita’i, ia ‘aua ne’i gata lo latou malosi i o latou taimi o iai i Pulega o latou lava atunu’u, sa una’ia fo’i sui-tumau o le Fono mo le Saogalemua o le Lalolagi ina ia fa’agalo o latou ‘ese’esega, talosagaina le “fa’amuta o taua ma le fa’apapaina o pomu” i Yemen, ma fa’ailoa mai atunu’u e lima, ma ia ta’ua, “o latou o iai le ki” mo se filemu i Suria: o Rusia, Iunaite Setete o Amerika, Saudi Arabia, Iran ma Turkey.

Na ta’ua fo’i e Ban Ki-moon, ua silia i le 100 miliona tagata lautele o lo’o mo’omia le fesoasoani, lea ua ofoina atu ai e Malo ‘Aufa’atasi le 20 piliona tala. Na una’ia fo’i le ‘au-mau-mea mo le le-tu’uina atu o fesoasoani e sili atu, ma ia ‘aumaia ai fa’ata’ita’iga: O le tasi-vae-tolu o mana’oga o le fa’alapotopotoga, aua Suria ma Iraq, ua maua mai ae mo Gambia, lea o lo’o iai tamaiti aupito fia-a’ai i le lalolagi, e leai se tupe ua maua mai.  

Na atili ai ana tele ana faitioga i atunu’u o lo’o tapunia pea o latou tua’oi ma fa’asasa tagata-sulufa’i. “’Ou te talosaga atu i malo Europa, ina ia fa’atele lo tou sao ma galuega e fai,” ma fa’amanatu ai ta’ita’i o Konetineta tetele, “ina ua mae’a le Taua Lona Lua a le Lalolagi, o Europa lava sa sa’ili fesoasoani solo.” 

Na ia fa’amanatu fo’i tala lelei se lua. Sa ia fa’afetaia le maliega i mea tau-niukilia  na malilie iai le lalolagi malolosi fa’atasi ma Iran.  O se tala fa’aola-totoga, na ia fa’ailoa ai, ua tutu-fa’atasi le lalolagi e taofia le sosolo a le fa’ama’i o le Ebola. 

O Peresetene Dilma Rousseff o Brazil, na ulua’i lauga i lea tulaga, ma ‘otegia ai atunu’u sa taumafai e fa’asa tagata-sulufa’i e sosola atu i Sasa’e Tutotonu, ma fa’ailoa atu le talimalo ai o Brazil i tagata mai Suria ma Haiti i le taimi nei, pei fo’i ona tatala atu o faitoto’a i tagata mai Europa ma Asia i le 100 talu ai. “I le lalolagi e tumu i mea lelei, o tupe, o fa’amatalaga ma mafaufauga e fetufaa’i, e matua mata’utia lava pe a taumafai e fa’aSasa ma taofia le feafioa’i sa’oloto o fanau a Le Atua,” o lana lauga lea.   

Pe’ita’i e le’o o na’o atunu’u tetele nei o lo’o feagai ma nei tulaga uma ae o lo’o ua i aofia ai ma le Pasefika.

O le tausaga ua mavae atu na  toe fa’afo’i (tipoti) e Niu Sila se tagata mai Atumotu o le Pasefika sa finauina, a ‘ua le-manuia, lana mata’upu e avea ai o ia ma ulua’i tagata-sulufa’i e mafua, ona o suiga o le tau, o se fa’aaliga lea mai e sa lagolagoina lea tama mai le Pasefika i le Aso Tofi.

Na toe fa’afo’i Ioane Teitiota i Kiribati , ina ua leai lava se isi ona lavea’i, ina ua mae’a le mau talosaga toe-iloilo i totonu o le fa (4) tausaga sa finau malosia ai lava, ina ia nofo ai pea i Niu Sila. 

Na finau maua’i Ioane Teitiota, e 39 tausaga o le soifua, e le tatau ona toe fa’afo’ia o ia i Kiribati ona o popolega i le si’isi’i o le suasami ma lilofia atoa ai le atunu’u e 100 afe le aofa’i o tagata, ua avea ai o se tulaga le-saogalemu mo ia ma lona aiga.

Na fa’amautuina fo’i e le Faife’au o Iosefa Suamalie, le toe fa’afo’i atu o Teitiota ina ua le-talia lava talosaga fa’ai’u a loia ma ta’ita’i o tagata-Kiribati sa faia. 

Na ta’ua fo’i e le Faife’au, ua ise tulaga le-mautonu nei le faletua ma le fanau to’atolu a Teitiota na fananau uma i Niu Sila, lea ua fuafua e mulimuli atu i le vaiaso fou, e fa’atasi ma le tama o le aiga i Kiribati.

“O le mea sa matou taumafai iai, o le fa’asaoina lea o sia aiga na sulufa’i mai i Niu Sila ona o le fia-ola talu ai tulaga fa’ao’o-sala a suiga o le tau,” o lana fa’aaliga lea i luga o le Leitio a Niu Sila.     

“O le toe fo’i i Kiribati, e le maua ai se ola-sa’oloto ma leai se fa’amoemoe o iai. O le a toe fa’afo’i tamaiti i le mea e le saogalemu mo latou.” 

O Motu o Kiribati e maualalalo ma e afaina i le tele o fa’afitauli tau-si’osi’omaga e afua ona o fesuia’iga o le tau, e aofia ai afa malolosi, lologa e afaina ai vai-taumafa.

E matua ogaoga fa’afitauli ua va’ai i le taimi nei, ua mafua ai ona fa’atau e le Malo  o Kiribati se 2,000 heta o ‘ele’ele i Fiti, e avea o se fa’ato’aga mo Kiribati pe a le toe talafeagai ‘ele’ele o le motu sa avea ma kolone a Peretania, mo fua o fa’ato’aga.   

O le tausaga e 2007 na o’o ai Teitiota i Niu Sila ma silia ai aso o lona pemita fa’ataga, ae na fa’atoa maua e leoleo i le 2011, ona o se moliaga tau-ta’avale. 

Tausaga talu ai na ioeina ai e le Fa’amasinoga Maualuga a Niu Sila, lu’itau ma a’afiaga o feagai ma Kiribati ona o fesuia’iga o le tau.

Peita’i, na te’ena le mata’upu ona fa’apea, e le fa’amalieina e Teitiota fa’amatalaga fa’aleTulafono e avea ai o se tagata-sulufa’i, ona o le a le feagai ma se moliaga, pe a toe fo’i i lona atunu’u.

Na te’ena ai e le Palemia, o To’osavili John Key le finauga a Teitiota ma fa’apea ai, e vaivai ana mafuaga ma e tatau ona usita’i i tulafono a Niu Sila. 

“’Ou te talitonu e to’atele e alolofa iai ... peita’i ia a’u lava ia, e le o ia o se tagata-sulufa’i, a o le tagata ua ova aso i Niu Sila,” o lana fa’aaliga lea. 

By Ilia L Likou 03 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>