“E SUᾹMALIE FAA-NIU ‘A’ATI”-IS THE PLEASURE WORTH THE PAIN? O FETAUI LOU TAUI MA LOU TAUTIGA?

03 April 2016

E le uma le faafetai ma le faamanu i le Atua-ona o lenei foi ua tatou aulia manuia mai lenei Aso Sa-o le Aso lea o Tapuaiga Faitele a Samoa i le Atua Tolutasi Paia-na filifilia e matua e faavae ai lo tatou Malo Tuto’atasi!

Ua mavae atu lena vaiaso sa feagai ai le atunuu ma tiute ma faiva- e le gata i le fatu-aiga tausi, ae o le uta ma le tai-o tiute masani i faiva ma tiute ua totofi i ai, aemaise ai o nai fanau sa alo atu i Taaloga a Tupulaga Talavou o le Tapulega- lea ua tini ma ua taunuu e aunoa ma se mala e afe. 

E ui foi ina po’ia i tatou i mala ma puapuga –o faalavelave e tutupu faafuase’i aemaise ai o le maliu ma le oti ua motusia ai mafutaga pele ma matua-uso ma tuafafine aemaise ai o nai fanau pele- ae o le upu moni- o le tele o tatou tiga ma puapuaga-o le tele foi lea o le alofa ma le agalelei o le Atua e faamafanafanaina ai tatou!

Ia-ia fo’I atu pea i le Atua Poto e Toatasi le Viiga ma le Faaneetaga- e faavavau, faavavau lava! Ia alo maia-o le tatou Talanoaga masani foi lenei ma le ‘aufaitau o lenei nusipepa-aemaise ai foi o le mamalu o le atunuu o loo fiafia pea e faitau I lenei tusitusiga.

Ae o le fe’au tau molimoli lenei e ao lava ina faamanatu atu pea-O lenei tusitusiga- “e le o se tuuaiga o se tasi; e le o se faaleaga; e le o se faaoloataua foi-ae o le fia faatinoina lava o tiute o nusipepa uma o le lalolagi- “o le faailoa atu lea o mea uma o loo tutupu i totonu o lo tatou atunuu-o ona mafuaga; o ai ua pogai ai- ae o le itu e sili ona taua-“o le a se faiga a le Malo o fai i ai”? 

O le ulutala la o lenei Talanoaga- o lena ua tusia matamata-tetele i luga; ma e i ai le talitonuga- o loo manino ma malamalama lelei i le ‘aufaitau! Ae afai e leai- ia –o le a ‘ou toe taumafai e faapulapula atu teisi ina ia saga manino ai le ‘auga o le ulutala ua faaalia i luga.

“Fai mai le ulutala o le Talanoaga-“E suamalie faa-niu aati” –o lona uiga – e te iloa lava le suamalie o le niu i lona pulu-pe a e tago e agi lona pulu i ou lava nifo. O lona uiga-e te le iloa le suamalie pe a o’a i se mele’i-ae te iloa le suamalie pe a ‘ati i ou lava nifo!

O lona uiga-e faatoa e iloa le suamalie o le niu pe a tu’u i lou fofoga! A toe faaupu la ina ia manino atili- ‘e faatoa e lagona le suamalie o le taui o lou afu maligi- pe a e tofo i ai! Ia-atonu ua vae-seugā o tatou talanoa pea i le tulaga pagatia o loo i ai nei lo tatou atunuu.

Ua outou silasila foi ma matou vaai i lona faamaoniga. O lea e ta’ua i Tala Fou i aso uma le anoano o tagata sulufa’i mai isi atunuu ua o atu i nisi atunuu ona o le fiaola mai faalavelave ma mea faigata o loo tutupu i o latou lava atunuu.

Ua tatou vaai tino foi i le teena o i latou e isi atunuu ua sulufa’i ai i ai. Tatou te lagona le alofa i isi tagata ola-ae galo ai ia i tatou-o lea foi e i ai tagata sulufa’i a Samoa i totonu lava o Samoa. Ua tatou vaaia le anoano ua nonofo solo i poletito o faleola ma aisi i tagata.

Ua tatou vaai tino foi i alualu toto o feoa’i solo i le ao ma le po e tau faatau atu oloa i luga o ala tetele ona o le fia maua o se tupe e tausi ai o latou aiga! O le fesili la- aisea ua faapenei ai Samoa? O se tulaga masani lea o Samoa?

O le tali- o lenei tulaga ua afaina ai le atunuu -e mafua mai faiga faatautala ma faiga pi’opi’o a le Malo. Ua iloa e pili ma mo’o o ia faiga pi’opi’o i tupe ma meatotino a le atunuu-ua pogai ai ona matitiva faapenei le atunuu!

E anoano alo ma fanau a le atunuu ua i’u mai a’oga ae leai ni galuega-toe leai foi ma se mea e tasi a le Malo o fai i ai! A tatou tilotilo i le tulaga pagatia ua i ai nei le atunuu-ua matua leai lava se tuaoi!

Afai la ua alu le tamaoaiga o le atunuu ma ana meatotino i le faatautala o le Malo-o afea la e tofo ai Samoa i le suamalie o lona afu maligi? A tu’u i le tau o le soifuaga ma le VAGST-o ai lea e afaina ai? A fua i le mata’utia o aitalafu a le Malo- o ai e totogiina?

ADVERTISEMENT

O le upu moni pe afai e fia talitonu i ai Samoa- o soo se mea lava e fai e le Malo- e faamoemoe uma lava i le atunuu! O le fesili la Samoa- e a le niu lena e te taumafa ai? E suamalie pe oona e pei o laau faasaina? 

O Samoa e masani i le taumafa i niu suamalie faa-niu aati-leaga o Ta’ita’i na favaeina le Malo Tuto’atasi o Samoa-latou te faasili le afu maligi o le atunuu-leaga o le latou mau-‘o le afu o le mea e oona-aemaise ai lava o le afu o le atunuu-e mamala.

A tuu mai la i le taimi nei- e leai ma se tagata Samoa e mafai ona faapea mai –“o loo fetaui lona taui ma lona tautiga; o le pogai- e matua leai ma se manuia o soo se ituaiga- o mafai ona selesele i ai tagata o le atunuu.!

Afai la ua le o toe maua se niu suamalie e tagata o le atunuu-o lona uiga- ua toe o moosu’i mea ia e totoe-o niu suamalie uma ua uma ona inu e le Malo  ma o latou aiga!

Toe tuu ane i ai ma le Manu Ainiu o faiga pi’opi’o ma taupulepulega leaga-ua matua masofa atoa ai le toganiu o mea lelei mo le manuia o le atunuu! O le tuu-a-lalo la i le atunuu-afai e te le o toe taumafa Samoa i se niu suamalie- matou te le fefefe e ta’u atu o tatou lava le pogai!

Ua ‘asa la tatou vaai i le manuia faaauau pea-ae faasili le manuia mo se taimi puupuu! Ia o lea o le a tatou alo atu i le Palota!

A tatou fesili la pe o le a lea mea-o le tali –o le tatou filifiliga faitele lena mo e tatau ona ta’ita’ia lo tatou atunuu ina ia maua ai so tatou manuia lautele-ae le na o latou manuia.

A tatou mafaufau la pe ua fia tausaga o faafoe lo tatou atunuu e lenei faiga-malo-o le tali- o lea ua savali i le 40 tausaga! Ae o le fesili taua lava-“O E MANUIA AI PE LEAI?  E leai se tasi na te faatonuina Samoa o le Ao e mamala- ae o le upu moni lava-o ai e tatau ona sailia lo tatou manuia?

O le tali- o tatou lava! O lona uiga- o tatou e filifilia se faiga-malo tou te silafia ma tatou iloa uma- e manuia ai le atunuu atoa? E faapefea la ona manuia le atunuu atoa? E manuia pe a tu’u taupulepulega leaga a tagata faigaluega o le Malo ma faiga pi’opi’o a le Malo!

Ua savali i le 40 tausaga o fia taumafa le atunuu i ni niu e suamalie faa-niu-aati: o lona uiga- “o ni niu suamalie o le taui lea o lona afu” ae le o le ua falōlō ae fai le ivi o le Malo i le faitau miliona ma miliona o tupe a le atunuu ma taavale taugata na faatau i tupe a le atunuu!

O le niu e suamalie faa-niu ‘a’ati- o le niu lena o lou lava afu maligi- e tatau ona e selesele i ai ma lau fanau-ae le o le pule toatasi ai o le Malo e pei o ni tupe a o latou matua ma ni o latou aiga!

Ae tasi lona- “Faamata e suamalie faa-niu aati lau niu Samoa pe afai e tumau pea ona musu le Palemia e ave lea mataupu i le Faamasinoga e tusa ai ma le fautuaga a le Komiti a Alii Ofisa o le Palemene lea na iloiloina le Lipoti a le Pule ma Su’etusi Sili lea na faamaonia ai faiga pi’opi’o matautia na fai i le SLC ma isi matagaluega ma faalapotopotoga a le Malo?

Ae faapefea le Taavale taugata o le Lexus a le Minisita na faatau i tupe a le atunuu?  O le Malo la e le faapito i le malo-e aofia ai ma outou. O le uiga o le upu Malo- o le galulue faatasi lea mo le faaleleia o mea.

O le Malo e amata i lou nuu. O Faiga-malo lelei latou te faaaloalogia aia tatau a tagata ma tausi le tulafono. O le ‘Faimea tonu’ -o lona uiga ia faailoa faaiuga uma a le Malo i tagata.

O le ‘Faimea tonu’ o se faiga lea e taofi ai faiga pi’opi’o O se Malo faa-temokalasi o se malo sa’oloto lea. O le Faimea tonu o le i ai lea o le aia tatau e te iloa ai pe faapefea ona fai faaiuga a le Malo. O le Mautali atu o lona uiga e “tali outou ta’ita’i ia te outou.

O lona uiga o tupe a le malo- ia faaaoga mo le manuia o tagata uma. E noatia Taitai i mea uma latou te fai. E mafai la ona e una’ina latou ina ia tali atu e ala  i lau palota.

03 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?