SE’I O TA TALANOA - “FILIFILI NA O FAIPULE E ALOLOFA MONI I LE ATUNUU”

04 March 2016

O se faiga-malo e naunau e fai le finagalo o le atunuu- e le tatau ona i ai se tagata pi’opi’o e to’atasi-aua o le lago mate lava lea e tasi- e maumau ai le suau’u manogi! O a la ituaiga o faipule latou te mafai ona fai se malo faapenei?

O la’u tali- afai o a’u ou te faia to’atasi le filifiliga –e le tatau ona toe aofia ai se tasi o i latou nei o loo tulai mai nei-leaga ua pei o le La pupula a latou amio! A outou silasila i le toatele e pei ona tatou vaaia i aso nei-o fea e aumai ai lea tamaoaiga?

Na o le Atua na te silafia mea uma. Tusa pe o le totogi e sefulu afe i le vaiaso-e le mafai lava ona e faia ai ni mea uiga ese e pei o mea ia ua vaaia i le taimi nei.

Aisea? A fua i le tau o le soifuaga ua i ai nei, fua i le tau o le eletise, fua i le tau o le suavai, fua i le VAGST, pili o a’oga a le fanau-toe fua i le faa-taumafaina o itumalo pe a fai ni o’o i itumalo-o le upu moni-e le mafai lava ona tatou faia ni mea tetele faapena e pei o mea ia ua vaaia nei ma silasila nei  i ai.

O lona uiga la- e le tatau lava ona toe i ai ni tagata faapenei  i aso uma o totoe o le olaga nei-aua o le ‘afu- e taumafa lauulu ai le atunuu.

Ou te manatu- e lelei pe a silasila toto’a i sui tauva ua faatutu mai ma fesili i ai poo ai o i latou e alofa moni-o ai e le’i ta’uvalea, o ai e manatu faapito, ae sili ai ona fesili i ai-pe o ai ni sui e tutusa o latou loto- ma finagalo o Toa magumagu na faavaeina le atunuu i fatia ua alu, o taimi ia e le’i o’o ai Samoa i se mativa masaesae e pei ona i ai nei. Silasila toto’a i sui matitiva poo sui e le lava le tamaoaiga-aua o sui matitiva na- a faamanuiaina-e alolofa moni i le atunuu-aua sa matitiva foi latou, sa fia-‘a’ai, fiainu, ma fiaola faatasi ma le atunuu.

A saofagā la lea ituaiga lena o sui i upufai o malo-e malamalama lelei lava pe a talanoaina le mativa i totonu o le Palemene-aua sa mativa. E finau mo le manuia o tagata uma- a le na o lona lava manuia.

Na te faamuamua le manuia o tagata o lona atunuu ae faamulimuli sona lelei. Afai o se sui tauva e maumea-e le faigata ona toatele i latou e lagolagoina -leaga o loo ia te ia le tamaoaiga i le taimi o le Palota.

ADVERTISEMENT

Ae o le fesili-e i ai se tasi na te lagolagoina pe ana mativa faatusatusa i le isi sui tauva? Ia manatua foi-e ala ona mamulu atu se mea e tasi mo oe -ona o lea e alu i le palota, ae ana le alu-toe afe mamulu atu se mea e tasi mo oe.

A lua fetaui- e le talanoa atu ia te oe leaga e ese lava lona lalolagi-ese si ou tama’i lalolagi! A maua atu foi oe o e savali i le ala-e alu lava lana taavale. Ae peitai- o lea ua oulua talanoa nei ona o le palota. Ua faatu atu nei lana taavale ona o loo fia maua lau palota.

A’o si sui mativa, tusa lava pe leai sana tupe -e talanoa atu lava ma agalelei atu i aso uma. Afai foi e i ai sana taavale- e faatu atu lava i taimi uma-pe mafai foi ona e fai i ai e avane lana taavale se’i ave ai lou atalii ma’i i fea ma fea.

Ae ia manatua lava le itu e  aupito i taua lenei-e leai se tagata maumea na te faaalu se tupe e aunoa ma le toe totogi atu. O lona uiga la- afai e manuia i le palota se tagata faapena -ae i ai sana pisinisi-e toe faa-sikuea uma lava tupe na faaalu.

Ou te le fia ta’ua la le auala e fai a’i, ae ou te fai atu- o le mea moni lava lena e fai -e toe faaola mai ai tupe na faaalu.

Soia ona toe faalogo i leo o ia tagata faa’ole’ole ma le le alolofa- ae sagai ane e filifili le malo e te toe manuia ai-se malo na te aloa’ia-o  oe o le tagata soifua; se malo na te faamuamua lou finagalo ae tuu lona loto-se faigamalo faamaoni na te puipuia lau aia tatau.

O le ituaiga lena o faigamalo o loo matua manaomia tele mo Samoa i le taimi nei. Le ituaiga lena o faiga-malo e fetaui lelelei ma finagalo o tua’a ua mavae-fai mai -o se malo e manuia ai Samoa ae le o se malo e manuia ai na o taitai ae tautau fagu o le lautele.

O isi foi itu e lelei ai ituaiga o faigamalo faapena-e usita’i i le mea e mafuli i ai le toatele.

O lona uiga- a tulai mai se faiga-malo faapena e naunau i le amiotonu- e maua uma lava mea pi’opi’o –ona amata loa lea ona avatu uma i luma o le Faamasinoga ae se’i faafofoga Samoa.

A saili atu la ae faamaonia-fai loa lava le amiotonu ma velo i Tafaigata. O le ituaiga lena o Malo tatou te manuia ai-aua foi o loo naunau e fai le finagalo o le atunuu ae le o lona loto e peiseai o ni a latou mea. Ia manuia tele le Faiga-Palota Samoa!

04 March 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?