Mana’omia e Fa’afio se galuega
O aiga e tatau ona ave ai le fa’ataua ma le fa’amuamua.
O le talitonuga lea a Fa’aifo Tuapola mai le nu’u o Eva sa fa’aalia i le Fofoga o Samoa ina ua fesiligia i ona tiute e fai mo le tausiga o lona aiga.
E 22 le matua o le soifua o lenei taule’ale’a ma o ia fo’i o se faifa’ato’aga e taumafai pea e galue malosi tusa lava po’o lea le faigata.
“Na’o a’u lava ma o’u matua le matou aiga,” o lana tala lea i le Fofoga o Samoa.
“E leai sesi e faigaluega ae ou te taumfai lava e maua se tupe mai le fa’ato’aga lea ou te galue ai. O mea uma la e maua mai le matou fanua, e fa’atau atu i totonu a o le matou nu’u ina ia maua sina seleni.
“E to’atele a tagata i Samoa o lo’o fa’aaoga tatau o latou ma’umaga e su’e a se tupe ma o se itu fo’i na e faigata ai aua ua to’atele tagata faifa’ato’aga.
“Aemaise a le maketi i Apia, ua to’atele ai tagata e fa’atau atu a latou mea mata ma fuala’au aina, ia a o isi ua nonofo a i vaega o le maketi lae fai a latou fa’atau.
O le tupe e maua e maua e Fa’aifo e fa’aaoga mo le tausiga o lona aiga.
“E alu uma a nei tupe i mea matou te mana’omia,” sa ia fa’apea mai.
“O galuega a o’u a ia lima lea e tausi ai lo’u aiga ma fa’atau ai a matou mea’ai.
“E fua a la la’u seleni maua i a’u mea mata ia e fa’atau atu. A maua a se tupe e lava ai se mea’ai mo le aiga, ia ua lava ma totoe fo’i lena mo a’u.
E le’o taulai fo’i Fa’afoi i sona ia olaga e ese mai lona aiga aua o le taimi nei, ua ave uma lona malosi ma le fa’amuamua i lona aiga.
“Ou te tatalo pea ia manuia lo’u aiga,” sa ia fa’apea mai.
“Aua e le’o se itu lena e mafai ona ou faia i lenei taimi aua e leai ni seleni tetele e maua ia a’u. Ou te mana’omia se galuega e su’e ai sina seleni, o se talosaga ma se miti lena mai lo’u nei tagata.
“E lelei a le ma’umaga ae leai ma sesi o tatou e iloaina pe tumau ai pea ma’umaga aua o lea lava e alu i luma le olaga.
“A fa’apea e alu ai a fa’apea e leai se galuega e maua, e le taitai ona taunu’u lenei miti mo lo’u aiga. E le mafai fo’i ona latou maua fesoasoani i isi itu.
Sa fa’afesiligia Fa’aifo pe iai ni polokalame a le nu’u aua se fesoasoani e maua mo latou ia e leai ni galuega ae sa ia ta’ua e leai ni polokalame ua faia mo lenei mataupu.
“E leai ni polokalame o faia i lenei tulaga ae a fa’apea e iai nisi alalafaga o fai ni a latou polokalame fa’apea, ia fesoasoani mai e avatu fo’i matou se’i matou fa’alogologo atu ai po’o a ni aitia i le tau atina’e ina o matou aiga.
“E ese’ese uma aiga, e iai a isi aiga o lo’o mafatia ma latou taumafai fa’amaoni i le atia’e ina o latou aiga ae e iai fo’i nisi o aiga o lo’o mafatia ae e manana’o e fai e isi le galuega ia lelei ai a latou aiga.
“Ae ou te talitonu a o le auala faigofie e fesoasoani ai i lou aiga, o le su’e o se galuega ma e galue ai lea mo lou aiga.
“O la’u a ia ta’utino atu, ou te fa’amaoni ma ou galue malosi, o le ala lea o lo’o ou talosagaina ai so’o se galuega aua ou te talitonu ou te mafaia ona ou faia.
Samoa, a e silafia se galuega e fetaui mo Fa’aifo po’o sesi fo’i o lo’o fia fesoasoani ia Fa’aifo i lenei itu, o le numera lea o le telefoni e maua ai o ia, 7237220.