Ia manuia aiga
O le galue malosi auā se manuia o fanau ma le aiga o le naunataiga taua lea i le olaga o Ielu Itamua o Toamua ma Falelauniu.
I le fa’atalatalanoaga ma le Fofoga o Samoa ma Ielu sa ia fa’aalia ai o ia o lana fanau ma si ona to’alua o loo nonofo i se tasi o fanua e patino i se aiga faipisinisi i Samoa.
O laua o loo la vaaia le fanua ma le pa mamoe o le la’ua galuega lea ua mafai ai ona la maua ai se alagātupe e tausi la la’ua fanau laiti ma fesoasoani ai foi i nai o la matua i Toamua.
O le talitonuga foi a lea tamā o le vaitaimi lenei se e tusa lava poo le a le galuega e maua o le itu taua ia maua ai se seleni e tausi ai aiga ma fanau.
E tau atu le vaega a le Fofoga o Samoa o loo galue mai Ielu i le moaina o le vao o le fanua i le mutinitini o le la.
“Ua fai si leva o o’u faigaluega i le pisinisi lenei ae sa ou amata mai lava i le faleoloa ona o le aiga e fai foi le latou faleoloa i le taulaga.
“Ae o lea faatoa tasi le tausaga talu ona tofia au matou te omai si o’u to’alua ma si ma fanau e nonofo iinei.
“O le ma’ua matāfaioi o le vaai lelei o le fanua ma faamatagofie le fanua ma vaai lelei mamoe.
“I le taimi o aso fiafia na o le ma fanau ma lo’u toalua na o e fai aso fiafia i Toamua ae o a’u sa ou faamuli atu iinei ona e le mafai ona tuu tia’i le fanua.”
Sa ta’ua foi e Ielu o le vaitau lenei ua fai lava si taugata o le soifuaga.
“Soo se galuega lava e maua e le tagata e ao ona galue ma le faamaoni ona ua fai lava si taugata o le soifuaga.
“Ua le gafatia e tagata le tau o le soifuaga lea ua i ai i le vaitau lenei.
“E sui lava tausaga ae o faafitauli o loo tumau pea.
“Ua le o gatasi le tau o le soifuaga ma le tupe maua a nai tagata ia.
“O a’u ma si a’u fanau e $250 lo’u totogi e maua ma i a te a’u o loo ok matou ona e toalaiti si matou aiga ae o nai isi tagata e fālō lava le $120 i totonu o le aiga toatele.
“O le olaga ua leai se mea o toe faigofie ma ua tele foi ina vaivai ai tagata ae o lou talitonuga a e alofa i lou aiga e mafai lava ona e tausia I mea e maua I ou lava lima.”