Manatu O Le Fa’atonu - Samoa e; tu’u i tai le va’a-tele

MK
By Mata'afa Keni Lesa, 19 May 2016

Na o se manatu lava. Le a le mea e le lua’i teu ai lo tatou lotoifale ona fa’atoa popole ai lea i nisi moa-folau e ono avea ma fa’amata’u i lo tatou atunu’u? 

E mafua se tala, ona o le taimi mulimuli nei na matou iloiloa ai le tulaga lea, na agiga ai, o le to’atele o pagota o iai nei i Tafa’igata ma Vaia’ata, e le o ni tagata o se isi lava fa’atuatuaga ‘ese, a’o tagata o le ekalesia e aupito to’atele tagata o le atunu’u nei e lolotu ai.    

Lona uiga, e iai le mea mata’utia lea e tupu i ta’ita’i o le atunu’u – e aofia tonu ai lava ma ta’ita’i o ekalesia – o le taumafai lea e taofia le ofi mai o isi ekalesia ona ne’i avea ma fa’amata’u pe ono a’afia ai fo’i le filemu o Samoa.

Fai lava si fa’anoanoa ona o le fa’a’ele’elea-fua o ekalesia Kerisiano, ua totoso atu ai i ia finauga talu ai lava – i la matou matau – e matua noa se a’afiaga o le fa’aKerisiano i ia mea. O le mea lea e tupu, e mafua ona o ta’ita’i ua tau le pua ma lafo i fa’afitauli o aso nei.   

O le fa’aKerisiano e alofa, e fa’apalepale ma onosa’i – e le pei o isi ekalesia e matua ita-fa’amoemoe lava i tagata-Kerisiano. E iai le agaga e fa’afiafia ma talia so’o se tasi ma fa’ailoa atu fo’i, o le alofa o Le Atua, e matua mamao lava ma silisili’ese, nai lo se isi lava tagata soifua. 

O le mafuaga lea o le maniti o tino pe a manatu i le mana’o o nisi o le atunu’u e toe iloilo lo ta Fa’avae, e fa’amalosia ai ma fa’atumauina pea le sa’olotoga o ekalesia Kerisiano ia avea ai, ia tau lava o le ekalesia aloa’ia i Samoa nei. 

E mautinoa lava o se fa’ai’uga aupito fa’apopole-tagata lea o fa’ai’uga-sese uma ua tatou lafo i ta’ita’i o aso nei latou te faia. Ae na fa’apei ona faia o lea mea? Fa’afefea ona nofonofo ae tu’u pea lea mea e fai?   

Ua fa’alogo, o lo’o fuafua le malo e aloa’ia tu ma aga fa’aKerisiano ae maise a’oa’oga fa’aleTusi-Pa’ia, e avea ma ekalesia aloa’ia i Samoa.

Na fa’ailo lava e le Ali’i Palemia, Tuila’epa Sa’ilele Malielegaoi lea tulaga, i le fa’amanatuina o le 50 tausaga o le Fono a Ekalesia So’ofa’atasi i le vaiaso talu ai, lea na saunoa ai, o Samoa o se atunu’u e fa’avae i le fa’aKerisiano e o-fa’atasi ma tu ma aganu’u fa’aSamoa. 

A’o lea la ua fa’alautele mai e le Failautusi a le Fono Aoao a Ekalesia So’ofa’atasi, le Susuga a Ma’auga Motu, i lana saunoaga i le Leitio a Niu Sila e fa’apea, na te le taliaina le fa’atuatuaga Isalama ona e ono tula’i mai ai se fa’amata’u i le atunu’u.  

 “Matou te le o matua mamao-‘ese, leai,” o le saunoaga lea a le Faife’au o Ma’auga, e fa’amautuina ai lona finagalo na fa’aalia. “O lo’o matou naunau lava i le puipuia o o matou tagata mai a’afiaga ia, ui e to’atele lava nisi o tagata lelei ae o lo’o iai lava nisi e matua mata’utia lava i tagata nei, ne’i o’o mai, ona afaina ai lea o le to’amalie ma le saogalemu o le atunu’u.” 

ADVERTISEMENT

E ono lamatia le filemu o Samoa pe a o’o mai le fa’atuatuaga Isalama? Sole!

Afai lava ae tula’i mai se fa’amata’u, e mautinoa a, e afua mai i totonu, i le lotoifale.

Anoanoa’i le ‘au-fa’amalosi-teine, o fasioti-tagata ma isi mau amioga mataga i totonu o le atunu’u nei, ua fa’asolo ina fa’amata’u ai ma lepetia le filemu i aiga, nu’u ma le atunu’u. Se mau tagata-gaoi, fufula-ola le pule le-uma ma mau pagota sosola e afaina ai le fifilemu ma le soifua lelei o aiga.

Ioe, ua tausaga o tupu pea ia solitulafono ma fa’aletonu.

O le to’atele o i latou taualoa o lo’o feoa’i solo i le taulaga, o tagata aupito pi’opi’o e fa’afoliga o ni tagata lolotu, a’o matua kila-makoi lava. E o i lotu i Aso Sa. Ma avea latou ia o fa’amata’u ma’oi’oi i le atunu’u nai lo se isi lava ekalesia i tua atu.

A’o le a la lenei fa’aletonu ogaoga?  

Ae ao lava ona tatou manatua i le taimi nei, ua pei fo’i Samoa o isi atunu’u o le lalolagi, ua fa’asolo ina avea o se nofoaga ua tele tagata ‘ese’ese o iai, e ‘ese’ese tu ma aga ma amioga, ae maise o talitonuga ma fa’atuatuaga, ma ua ta’ua Samoa o lo latou atunu’u, pei lava fo’i o isi Samoa la ua nonofo ma aumau ai i isi atunu’u. O le to’atele o tagataj ‘ese’ese nei, e iai lava o latou talitonuga ma fa’atuatuaga pe a o’o loa i mea nei o lotu po’o ekalesia. 

E ao ona tatou fa’aaloalogia latou ia, ‘ave le fa’aaloalo e fa’atagaina ai latou e vivi’i ma tapua’i sa’oloto e pei lava fo’i ona tatou manana’o tatou ia faia mo le afe ma afe o isi Samoa ua aumau i isi atunu’u ‘ese.

Leai lava se e te’ena le tulaga o Samoa, o se atunu’u Kerisiano ae maise fo’i e matua matilatila ma manino lea va’aiga, i so’o se mea e aga’i iai – ona o le lapopo’a ma maululuga ma le tele o falesa i afio’aga ma alalafaga.   

Ioe, o lo’o lelei lava le Fa’avae o iai nei.

O lo’o tilofia ai le tofa-mamao ma le utaga-loloto a tua’a sa fafauina le mea silisili e manuia ai lenei atunu’u. O lo matou talitonuga, e sili ona ta’atia ai fa’apena le Fa’avae aua le soifua filemu ma le saogalemu o Samoa.

Fa’alua atu so matou leo, e foliga mataga ai le Fa’aKerisiano ona o mea o lo’o tau-enoeno mai nei e ta’ita’i ia o le ekalesia.  Ae ofo ai fo’i ona o lenei lava atunu’u, o se atunu’u Kerisiano sa tatau ona sili atu mea tatou te faia. Ae aisea lava o le a taumafai ai e fa’aleleia se mea e le o leaga? 

O le a sou finagalo? Tatala mai le ‘ato-ponapona!

Talosia ia maua se Aso Tofi filemu ma ia Fa’amanuia le Atua ia Samoa!

MK
By Mata'afa Keni Lesa, 19 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?