O le mana’oga mai se fai faatoaga mo se tane
O le suavai o le puna lea o le ola ma le malosi, a leai la le suavai e faafefea la ona fai se tatou galuega?
O le faafitauli lea na faaalia mai e Dee Vaa, 45 mai Faleasiu uta ina ua maua se taimi e fa’atalatalanoaina ai ma le Fofoga o Samoa i le aso ananafi.
O Dee e sau mai se aiga e 9 tagata ma e toatasi lava e faigaluega, ma o le mafua’aga o le mea lava o loo latou faamoemoe tele ai aua se fesoasoani mo le aiga o le faatoaga lea.
O le lenei tama e 45 tausaga e tele lava le latou faatoaga i le latou fanua i faleasiu, ma o le mea muamua lava lea mo i latou o le galue i aso uma.
“O le mea lava lea matou te faia i aso uma, galulue i totonu o lo matou faatoaga.”
“Ae e ui i lea, ona e lua o matou faatoaga, e eseese lava taimi matou te galulue ai i nei faatoaga e lua.”
“Ae e tatau lava ona matou galulue ai i aso uma.”
Mo se faaiuga, na faamatalaina e Dee ona o le leai o se suavai o le ala lea e faafaigata ai i ai matou ona faatino ina lo matou galuega i aso uma aemaise lava i le tau aumaia o vai mai le tai le aai i le latou faatoaga.
“E le gata i lea ae se’i taga’i ifo le auala e aga’i mai i lo matou faatoaga ona ua fai si lau leaga.”
“E le mafai ona osofia e taavale lenei auala ona o le lau leaga e leaga ai pau o taavale aemaise ai o le tau o pau taavale i lenei taimi ua matuai taugata lava.”
“O le ala lea e tau aveina ai a suavai i paelo ma faguvai mai le auala e oo mai i lo matou nofoaga.”
“O se mea faigata ona tatou te manaomia ina lava le suavai i taimi uma lava ona o se tasi lea o mea tatou te manaomia i aso uma.”
Na fa’aauauina le saunoaga a Dee ina ia faaalia mai ai lona mana’oga o le fia maua ina lea o sana tane aua e umi lava faatoa oo mai le suavai a le malo i lo latou nofoaga.
“Ua na o se tane lava o loo manaomia, ma o le mea lava lea na matou manaomiaina lava. O le manaoga lava lea sa ave i le nuu aua aiga o loo manaomia ina ni tane, ae e ui i lea sa maua tala e maua uma tane a aiga na talosagaina tane.”
“O le utu ina o vai ma tauaveina e leo se mea faigofie, o isi taimi e faavaivaia ai i matou e galue.”
“Ae o loo ou talitonu lava i vavega e i ai lava se mea e tupu i se aso ona o loo ou tatalo lava ina ia maua so matou tane, ia talosia iai a tali mai ota tatalo.”
Na faamatalaina foi e Dee le aoga o le suavai mo i latou.
“Na ou taua muamua, matou te faamoemoe tele lava i le suavai e le gata mo i matou ae mo lo matou faatoaga, ae afai ae maua so matou tane e le gata o se faamama avega lea mo i matou ao mea toto foi.”
“Ua leva ona matou mananao matou te nonofo i nei ina ia mafai ona vaaia lo matou faatoaga ae ole faafitauli lava lena mo lenei pito, eleai se suavai.”