Fesoasoani e Fa’aauau le To’omaga Mo Ē Puapuagatia

DF
By Deirdre Fanene ma Maiava, 01 April 2016

Ua mo’omia nei e le Vaega o To’omaga Mo E Puapuagatia, sau fesoasoani.

Ua tatalo mai i lou a’ao-mafola i so’o se ‘auala, ia mafai ai ona latou fa’aauau pea le tausiga ma le va’aiga lelei o fanau na a’afia i so’o se sauaga, lea ua fa’asolo lava ina fa’ato’ateleina i aso ta’itasi.

I le isi tolu masina o lumana’i – mai ia Aperila ia Iuni, o le a savalia ai e le Vaega o To’omaga, o maga-ala uma, e tu’itu’i-faitoto’a i maota ma laoa, a’o fa’atinoina la latou Sa’iliga-seleni e ala i le latou Leitiofoni. 

“E faigofie lava la matou mata’upu. O lo’o matou ofoina atu se ‘au’aunaga mo tagata-nu’u o Samoa ma so’o se tasi lava ua mo’omia se fesoasoani,” o le fa’aaliga lea mai le To’omaga. 

Ina ia mafai ona fa’auauina o la latou fesoasoani mo Samoa, ua latou talosagaina ai le lagolago a le mamalu lautele o le atunu’u.

“O le fa’amoemoe lava o lenei Leitiofoni, o le sa’ilia lea o se seleni e fa’aauauina ai galuega fa’atino a le fa’alapotopotoga, i aso ta’itasi.

ADVERTISEMENT

“Lea ua sefulu nei tausaga talu ona tatala o matou faitoto’a ma ua matou fa’asaoina fo’i soifua. 

“Mai lava i se tamaititi na tu’ulafoa’ina i se tina na sauaina, o tupulaga na tau-pule i soifua e o’o i matua sa mo’omia se fesoasoani i le fa’atonutonuina o fanau. 

Na mafai fo’i ona matou tu’uina atu fesoasoani i aiga sa mama’i a latou fanau i le falema’i e o’o i fanau na a’afia i sauaga mataga ma fa’ao’olima iai nisi i totonu lava o o latou lotoifale, ma o’o ai i le tulafono.

 “Moni matou te maua fesoasoani tau-seleni ma fo’ai tupe mai fa’alapotopotoga fa’ava-o-malo, peita’i, o le tele o ia seleni, e lagolagoina ai vaega fa’apitoa mo fa’asilasilaga ma fa’alauiloa mo ‘au’aunaga fa’apitoa mo fanau ma isi vaega...

“E ‘uti’uti lava se lagolago matou te maua mo le fa’aauauina o lenei ‘au’aunaga, e pei o le totogi o le fa’atinoga o le tele o mea ma le totogi o le ‘aufaigaluega, ma o le mafuaga lea o le matou tatalo atu, e ala i lenei sa’iliga-seleni.” 

O lenei Leitiofoni, o le a aofia ai le atunu’u atoa.

“O le matou tu’uina atu ni Pepa o le Leitiofoni i ekalesia uma, o afio’aga ma alalafaga, o pisinisi ma kamupani, o matagaluega a le malo, o aiga ta’itasi fa’apea uo ma ‘aumea-mamae.

O le a aofia ai fo’i lala o le To’omaga mo e Puapuagatia i Niu Sila, Ausetalia ma Amerika Samoa i lenei fa’amoemoe. O sui o afio’aga ma alalafaga i le Vaega a le To’omaga, o le a gafa ma le tufatufaina atu o Pepa o le Leitiofoni i le atunu’u aoao. 

O lau fesoasoani, o le a mafai ai ona matala pea lenei ‘au’aunaga, ma e talitonu, e tele atu nisi  soifua o le a fa’asaoina ma se suiga fou fo’i i se soifua o le a fa’asaoina.” 

DF
By Deirdre Fanene ma Maiava, 01 April 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?