O le vai o le olataga lea
O le vai o le olataga lenei o tagata.
A aveesea le vai o lona uiga ua ave ese le ola o tagata.
O lea le manatu o Salu i le fa’atalatalanoaga ma le Fogoga o Samoa i le aso ananafi.
“Ia o i nei si o matou pito nu’u e lelei lava mea uma, ae pau o lea o le leai se suavai.
“Talu lava na matou omai i nei e lei maua lava se suavai.
“Ou te le’o manatua po le a le umi talu na matou omai i nei ae o lo’u lava ia iloa ua fai sina leva tele.
“E fa’apena foi le tulaga o le leai se suavai ona ua fai sina umi e le’o o’o mai lava se vai i nei.
“Toe lava le vai e le’o iai nei ae o lo’o lelei mea uma.
“Ou te fa’ataua a i le vai i aso uma aua o si o’u tinā matua ma na’i o’u tuafafine o lo’o iai ni manaoga fa’apitioa o lo’o fia mana’omia le suavai i aso uma.
O le tausaga foi na te’a nei na iai nisi fa’amanuiaga i totonu si matou nu’u i le tulaga tau tane va’i mai le Red Cross. Ia sa talosagaina ai foi na ave lo’u igoa le lisi peitai na’o a’u lava le aiga e leai se tane vai na maua.
“Sa ou toe alu iai le ofisa ma le fa’amatalaga e maua mai ae lei faia le lotu tamaiti.
“Ia e o’o mai lava le taimi e leai se tane vai.
“O lea foi e mana’omia ia se fesoasoani.
“E lo’o ia le eletise, ma lo’o maua foi mea’ai peitai toe lava o le vai le fa’afitauli o lo’o feagai nei ma si o matou aiga.
“O le tane vai foi e fa’atau le seleni, ia ae o matou nei e leai se seleni. E na le to’atasi lava si o’u atali’i faigaluega ma o ia foi lea o lo’o maua ai le seleni.
“O le tulaga foi lea e mana’o mai ai lava se fesoasoani.
“Ia pei foi na silasila mai toa fo’i mai le la’uga vai ia sau ai foi se alu fagota aua se meaai nanei.
Sa ta’ua e lenei tama o ia le fesoasoani malosi i le atali’i faigaluega.
“Pei na fai atu le taimi ua sola, o le sami lava a maua sina i’a e fa’atau aua se tupe ia ua lava lea ma totoe.
“Matou te mana’omia lava le vai ma o le mafua’aga lena o lo’o ou talosaga atu ai ma le loto maualalo i so’o sesi e mafai ona fesoasoani mai lea itu.