Te’ena se tusi-fa’ataga o Woodroffe

12 February 2016

Ripotia e Lanuola Tusani Tupufia

Fa’aliliu e Maiava 

 

Ua te’ena nei e le Sosaiete a Loia Samoa, le tu’uina atu o se Tusi Fa’amaonia e fa’atagaina ai le Loia lauiloa o Leulua’iali’i Olinda Woodroffe, e fa’atinoina ai galuega fa’aLoia i totonu o Samoa. 

I se tusi na maua e le Samoa Observer, o lo’o sainia ai le Failautusi o le Sosaiete a Loia, o Tafailagi Peniamina, o lo’o ta’ua ai, e le o usita’ia e Leulua’iali’i ma ana pa’aga le tulafono. 

O lo’o ta’ua i le tusi lea o le Aso Lulu, 10 o Fepuari 2016, le fa’ai’uga sa faia e le Fono Fa’atonu a le Sosaiete a Loia Samoa, i lana fonotaga i le Aso 05 o Fepuari 2016.

“Talu ai le fa’aauau ai pea ona e le usita’ia o a tatou Tulafono (Tulafono a Loia ma le Fa’atinoga o Galuega Fa’aLoia 2014) ae maise lava le vaega 33 (2),” o le fa’aaliga lea a Peniamina i le tusi.

“…i le fonotaga a le Fono Fa’atonu i le Aso 05 o Fepuari 2016, sa talanoaina ai le mata’upu ua ta’ua i luga ma fa’ai’ugafonoina ai, o le a le tu’uina atu ia te ‘Oe ma lau Pa’aga o Annette Woodroffe se tusi-fa’amaonia e fa’atinoina ai le galuega mo lenei tausaga 2016.”  

Na tautu mai fo’i Tafailagi, ua fa’afia ona talosagaina e le Fono a Loia ia Leulua’iali’i mo le fa’amalieina o le tulafono peita’i, e na o “tali tu’u-fofoga” sa tu’uina mai “e fo’ia ai lou le-usita’ia o le Tulafono”. 

“Peita’i e o’o mai i le aso, e te le o amana’ia lava lea tulaga ma leai ai lava se fa’atinoga e silafia ai e le Fono, ua amata fa’atino ni la’asaga e soloia ai lou le-usita’ia o ia tu’utu’uga.” 

Na fa’amautu mai fo’i e le Failautusi, o le a fa’amatu’uina atu lava ia Tusi Fa’amonia pe a taua’aoina e le Fono a Loia Samoa, se fa’amaoniga o le usita’ia o le tatou Tulafono”.   

O ananafi ina ua fesiligia Leulua’iali’i e nofo-mau i Niu Sila, sa fa’aali mai lona le fiafia ma ia fa’aleaogaina ai le fa’ai’uga a le Fono a Loia ua fai.

Na faigata ona ia talia lea fa’ai’uga, ma fa’apea ai, e le-sa’o ma le-amiotonu lea fa’ai’uga ua faia, ua le amana’ia ai aia-tatau a tagata o lo’o tula’i ai mo a latou mata’upu ma fa’amoemoe tasi ia te ia, ae maise ai fo’i, ua silia i le luasefulu tausaga o ia fa’atinoina galuega fa’aLoia i Samoa nei.

“O a’u nei o le tagata-nu’u Samoa e iai le Tusi-Folau Samoa ma tele taimi sa nofo ai i Samoa,” o lana fa’amatalaga lea na tu’uina mai i le Samoa Observer ananafi.

“E iai lo’u fale i Samoa fa’apea le Ofisa. A’o ai e iai sana pule e te’ena ai a’u mai le fa’atinoina o o’u tiute? E ‘ave la’u fa’amuamua i mana’oga o tagata o lo’o fa’amoemoe ia a’u mo le fa’atinoina o le amiotonu mo latou ma sa fa’atuatua tasi ia te a’u i le tele o tausaga ua alu.”

Na fa’asasao le le-fiafia o Leulua’iali’i, ona o le taimi ua tu’uina atu ai lea fa’ai’uga a le Fono a Loia Samoa, ma ta’ua ai, e iai nisi o ana mata’upu “tetele” e tatau ona fa’atinoina i le vaiaso fou.

ADVERTISEMENT

O le tasi o ia mata’upu, e a’afia ai le Faife’au o Kerita Reupena lea na te molia i le tulafono, sui o le Fono a le ‘Au-Toeai’ina a le Ekalesia Fa’apotopotoga Kerisiano Samoa.

O le isi fa’amasinoga, o le finauga a Maria Kirita Pune ma le Pulega o le Samoa Stationeries & Books.

Na ta’ua e le loia, e matua mata’utia le matuitui o lea fa’ai’uga ua latou faia nei.

“’Ou te le’i solia se tulafono,” o lana fa’aaliga lea. 

“O latou uma lava nei, o lo’o fa’alagolago i se tulafono e le matua sa’o atoatoa na fa’atoa pasia i le tausaga talu ai. O ananafi (Aso Lulu) na fa’atoa ‘aumai ai le fa’aaliga lea ae o lo’o latou silafia lelei lava, ‘ou te alu atu i le vaiaso fou e tula’i mo tagata o lo’o fa’alagolago ia a’u, lena ua iai i Samoa i le taimi nei.”

Na fa’ailoa mai fo’i e Leulua’i, o tagata o lo’o tula’i mo a latou fa’amasinoga, e aumau i Niu Sila, Ausetalia ma le Iunaite Setete o Amerika.

“O faiga le-amiotonu ia ua le-mamafa ai ia latou aia a tagata o lo’o ‘aumai le fa’atuatuaga i le latou loia, ma o se tulaga matua mataga lava ma le-aloa’ia,” o lana fa’aaliga lea. 

“O le le-amana’ia o tiute ma faiva o se tasi o a latou pa’aga fa’aLoia, o se tulaga mataga tele ma maulalo…a o le a fa’ata’atia i le taimi nei ona o le manatu alofa i nisi o tagata matutua o lo’o ‘ou tula’i mo latou – pau lava le mea ‘ou te mana’o ai, o le malosi ‘ou te tula’i ai i le vaiaso-a-sau e tali i talosaga sa ‘ou galue ai i vaiaso e lua ua tuana’i atu.” 

Sa fesiligia le tama’ita’i loia pe leai se isi e mafai ona suia o ia, ae tali mai, e le manana’o ana pa’aga i nisi loia, vagana lava ia e feagai ma a latou mata’upu.

 “E leai sa’u mea-sese na fai. Pau le latou tala na fai mai, ‘ou te le o nofo i Samoa e va’ai lelei la’u kesi ma tagata o lo’o ‘ou tula’i e fai ma sui, e mai Ausetali, Niu Sila ma Amerika.

“E leai ma se tasi o latou nei sa fa’asea pe faitio i taimi sa latou mo’omia ai ni fa’amatalaga… e iai fo’i lo’u ofisa i Vailima ma Niu Sila.” 

I lalo o le Tulafono a Loia ma le Fa’atinoga o Galuega 2014 i le vaega ee, o lo’o talanoa i le muta’aga o aia a loia e amataina ai se pisinisi fa’aloia  tuto’atasi a le loia lava ia. 

I le vaega (33) 2, o lo’o fa’apea ai, “o se loia e mo’omia le aia e fa’atinoina ai tiute fa’aleTulafono e avea ai o se loia, pe o se faiga-pa’aga pe ta’ito’atasi fo’i, e tatau ona talosaga i le Fono a Loia Samoa mo le tu’uina atu o se tusi fa’amaonia e fa’atino ai lea tulaga ma e tatau ona fa’amalieina le Fono a Loia, o ia

 

• (a) ua fa’amalieina mana’oga o le vaega (1);

• (b) e tusa ai ma le vaega (3), sa nofomau i Samoa mo se umi e le i lalo ifo o le tolu (3) tausaga mai le taimi tonu sa talosaga ai; ma 

• (c) e tatau ona iai i Samoa e va’aia lelei le pisinisi i se tulaga maumaututu, po ua faia fo’i ni fuafuaga talafeagai e fa’amalieina ai le Fono a Loia, mo se ua talafeagai tomai ma agava’a e nofomau ai e va’aia lelei lea pisinisi; ma  

• (d) ua lava le malamalama ma le agava’a i le tagofia o tupe o lo’o teu-fa’aMavaega e tusa ai ma mana’oga talafeagai uma mo tupe ma teugatupe fa’apea.

12 February 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?