Popolega i tupulaga talavou
Fesoloa’i To’alua o Sapulu Faleasi’u.
O le tele o le mau fa’alavelave o lo’o ua tutupu mai le taimi lenei ma ‘a’afia ai le ola o tupulaga talavou, o lea le popolega na fa’aleoina e le tamā i a Fesola’i To’alua o Sapulu Faleasiu.
O lona finagalo, ia aua ne’i avea fa’afitauli o lo’o ua alia’e mai le taimi lenei i tupulaga ma itu e ono o’o atu ai le atunu’u i se isi tulaga e le’o mafaufauina i le taimi lenei.
“O le olaga lava o si o tatou atunu’u , e ao lava ona fa’atonu lelei taimaiti o laiti i ala e ao ona o latou uia ae le’i o’o lelei ina avea i latou ma tagata matutua o lenei olaga o lo’o ua tatou i ai.
“O la’u ia lea mau i lenei olaga, mai lava o avea a’u ma talavou, ia o lea lava le soifuaga na ola mai ai o le fa’alagolago lava i matua aua e aumai ai upu lelei e a’oa’oina lelei ai.
“A otegia mai, ia o le fa’alogo lava ma usita’i, aua e i ai le isi itu ei tua atu pe a le fa’alogo.
“Ae o nei vaitau ua ese lava le soifuaga o lo’o ua i ai nei, ua matua’i leai lava se tulaga fo’i lea o le mafai ai lea ona fesoasoani le isi matua i isi matua.
“O le mea sa’o lava ia o le galuega fai fa’atasi lea a matua ma tagata uma o le aiga, e talanoa e fefa’asoaa’i manatu ma lagona ina ia lelei aiga aemaise lava fanau ma talavou ia i’u ma le manuia.
Na ia fa’ailoa le tele o le suiga ua i ai nei vaitau.
“Ia o lea la’u ia maitau ua i ai le taimi lenei pe a fua atu ai i aso ua alu , ua matuai leaga lava le olaga ua ola ai fanau.
“Ma o se mataupu e ao ona fa’amalosia pea totonu o aiga, aua e pei o aiga e fausia mai ai le ola o le fanau , a o’o na matutua o uiga lava nei e mafai ona o latou avatua i luma o tagata.
“O se itu taua tele lea i a te a’u lava ia, e le tatau la ona o tatou nofoa’i ae ao ina o tatou galulue fa’atasi e foia fa’afitauli.
“Va’ai lava ne’i o tatou tuai, ia ona ma’imau lava lea o lo tatou ola.