Fa’amanatu fiafia i Suetena le aganu’u-Samoa

SS
By Sarafina Sanerivi, 23 August 2016

E le tau tulia se’ia i lotoifale o Samoa ona fa’atoa mitamita lea ma sa’afi i lau aganu’u. Aua po’o fea lava o le salafa o le kelope nei o e soifua ai, ae a manatua pea lou fa’asinomaga ma lou tupu’aga, e le mafai ona fa’agalo.

Mo tama-fanau a Samoa o lo’o soifua ma papa-a’ao i Suetena, e le fa’apea o le motu ma le taula ma tu’ua lo latou atunu’u, ona galo ai lea le mitamita a le Samoa ao-uliuli i ana tu ma aga ma lana aganu’u masani. 

Ua fa nei tausaga o fa’aauau pea ona faia o a latou mafutaga-tu’u-fa’atasi e fa’amanatu ai tia-vavau, o tu ma aga fa’aSamoa i totonu o Suetena.

Ua 19 tausaga o aumau Aiga Esau-Jonnson i Sweden, lea na fa’ailoa maia i le Samoa Observer, la latou mafutaga ma le fa’atasiga mata’ina i lenei tausaga.     

Ta’ua e Aiga, o le fa’amoemoe lava o le fa’atasiga, o le toe fa’amanatu ma fefa’afesoaa’i aganu’u masani a Samoa, e aofia ai le gaseseina fa’atasi o taumafa ma isi o lo’o iai i Suetena.

“Talu ai e fai lava si vava-mamao o le mea e nonofo ai le to’atele o Samoa i Suetena, ua fa’ananau ai lava ina ia matou potopoto ma mafuta fa’atasi, ia ta’itasi i le tausaga, ae maise i taimi o le tau-mafanafana e tele ina malolo ai le to’atele mai galuega,” o le fa’amatalaga lea a Aiga. 

ADVERTISEMENT

O lea fo’i feiloa’iga, o se avanoa lelei mo le vaega-matutua e fa’asoa atu ai nisi o tu ma aga ae maise o aganu’u fa’aSamoa mo a latou fanau, o le fa’aaliga lea a Aiga. 

 “E le gata i lena, a o se ‘auala fo’i e fa’ailoa atu ai nisi o aganu’u i fanau e ala i le fa’amatalaina o tala, o le faia o se fa’aaliga la’ei fa’aSamoa, o pesega ma siva fa’aSamoa ae maise le tau-a’oa’oina o le tatou gagana i nai fanau laiti,” o lana fa’aaliga lea. 

“O le to’atele lava o nei tamaiti e le’i o’o atu lava i Samoa ma o le fa’atasiga la lenei, o se avanoa e feiloa’i ai i isi tamaiti ma fanau a matou nei o tagata Samoa, ia fa’amasani ma fiafia fa’atasi, aua o latou uma lava o Samoa ao-uliuli.” 

Na ta’ua fo’i, o le fa’atasiga i le tausaga nei, sa vaevaeina i ‘au e fa, o Upolu, Savai’i, Manono ma ‘Apolima.

O ta’aloga fa’aleAganu’u isi vaega o lea aso fiafia.

“O ta’aloga e aofia ai tu’uga-taga, o tosoga-maea ma isi ma e to’asefulu-lima ulugali’i Samoa sa ‘auai ma a latou fanau,” o lana fa’aopopo mai lea. 

“O se mea matou te tulimata’ia i tausaga uma ma e fiafia lava ona o lo’o mafai ona matou fa’atinoa ma tu’u-fa’atasi ia mafutaga mo matou ma nai a matou fanau, lea ua matou iloa, e matua mamao-‘ese lava ma Samoa, ma ‘ailoga fo’i a mafai ona o’o atu iai i se aso lata mai.

“E fa’apena fo’i la i nai fanau, ua avea ma a latou mea fiafia i tausaga uma, e talotalo lava ia vave o’o i aso e fa’atino ai.”

O Aiga lava lea e tapenaina ma fuafua nei mea uma o le mafutaga i tausaga uma.

“Matou te matua manana’o lava ia iloa e matou fanau aganu’u ma mea fa’aSamoa, ia fa’alogo i tala o Samoa ma fagogo, ia ‘auai ma a’oa’o le siva Samoa, o le gaseseina o mea’ai Samoa ma isi lava aga masani a si o tatou atunu’u ua masani ai.

O Aiga Esau-Jonsson ua fa’aipoipo i se ali’i mai Sueselani ma e to’alua o la alo. 

SS
By Sarafina Sanerivi, 23 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?