Tolopo le Faamasinoga e faasaga i moliaga o le Minisita

By Lanuola Tusani Tupufia 18 May 2016, 12:00AM

O se faamasinoga e faasino i ni moliaga e sili atu i le sefulu e faasaga i le Minisita o Leoleo-o Salā Fata Pinati, e faasino i le Faiga-Palota Lautele ia Mati, ua toe tolopo se’ia aulia Iulai. Na teena e le Minisita lona nofosala i ni moliaga e 17 na faaulu e le isi sui faatu o le Itumalo o Gaga’emauga Nu. 1-o Salā Me Iose McCarthy

I totonu o le Faamasinoga Faa-Itumalo ananafi, na talosagaina e le loia a le Minisita o Ruby Drake le Faamasinoga ina ia toe tolopo le fofogaina o lea mataupu ina ia tuuina atu ai ia te ia se taimi ia lava-e faailoa atu ai i tagata molimau. Na toe ta’ua e le tamaitai e faapea o pepa na tuuina atu i le itu tagi na tuai le taimi na faao’o atu ai i le Aso Faraile ma ua le maua ai sona taimi e faafesootai ai ana molimau. E le’i teena e lea loia le talosaga ina ia toe tolopo le fofogaina o lea mataupu ae na ia faailoa atu e faapea o lea tulaga e pogai mai le le femalamalamaa’i. 

Na talia e le Faamasino o le Faamasinoga Faa-Itumalo o Vaepule Vaemoa Vaai lea talosaga. 

Ae ui o lea, sa fia iloa e lea alii pe to’afia ni molimau o loo fuafua loia e vala’au. Na matauina e le Faamasino e faapea o le itu tagi e tusa ma le 20 ana molimau ae o le a valaau e le itu tete’e ni molimau e itiiti ifo i lo lena aofaiga.

“Ona o le maliega- o le a tumau pea ona sa’oloto le itu tete’e se’ia aulia le aso 11 o Iulai i le aso 22 o Iulai mo le fofogaina o lea mataupu,” o le faaaliga lea a Vaepule. Na ia poloaiina foi e faapea o pepa o le faamasioga ia faao’o atu i le Faamasinoga i le Aso Faraile.

Tuala Iosefo 

E tusa ai ma se isi mataupu e ese ai-o le isi sui faatu o lea lava itumalo o Gaga’emauga Nu. 1, o Tuala Iosefo Ponifasio-na auai i le Faamasinoga ananafi. E iva moliaga tau faiga pi’opi’o ma le tau faasese o loo faasaga ia Tuala-a le toatele o sui o lona itumalo.

Na ia teena e le nofosala i ia moliaga.Mai le taimi mulimuli na tolopo ai, sa faailoa atu e Tuala i le Faamasinoga e faapea o loo ia sailia se faatagaga e faaulu ai se talosaga e faaleaogaina ai moliaga e faasaga ia te ia. Ae o ananafi, fai mai Tuala ua le mafai ona ia faauluina se talosaga-talu ai o lea faatoa taliu mai nuu mamao ma na te mana’omia se taimi faaopoopo.

“Sa ‘ou taumafai e saili se taimi ae ua le mafai lava ona ‘ou faia ina ia talafeagai ma le taimi,”o le faaaliga lea a le sui faatu. Na ia talosagaina le Faamasinoga mo se taimi faaopoopo e faaulu ai lana tagi ina ia faaleaogaina ia moliaga.

Ae ui o lea, sa teena e Mrs Drake lea o loo fai ma sui o itu e lua-lea talosaga. Sa faamanatu atu e lea Tama’ita’i i le Alii Faamasino o Vaepule e faapea na fai le talosaga a le itu tete’e ia Aperila e faaleagaoina ai le tagi ma teena ai le umi o le taimi na tuuina atu i le itu tete’e..

Sa talosagaina e le loia e faapea ia tuuina atu se taimi faaopoopo se’ia aulia le Aso Lulu-ina ia mafai ai e ia ona vave iloa mafuata o le talosaga-a’o lei toe valaauina lea mataupu i le Aso Faraile. Na talia e le Alii Faamasino o Vaepule le talosaga ina ia taatia le lafo e faaleaogaina ai se’ia o’o i le Aso Lulu..

By Lanuola Tusani Tupufia 18 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>