Ia galulue fa’atasi
O le una’ia ai o le ola galulue fa’atasi i totonu o aiga e mafai ai ona fesoasoani i le taugata o le tau o le soifuaga olo’o ua i ai nei.
“Ia o lenei berberque na mafua ona fai ina ia mafai ai lea ona fesoasoani i si o’u aiga.” Le tinā i a Tafaoata Lepule, 57 le matua o le soifua o Vaitele-Fou.
Na ia fa’ailoa i le Fofoga o Samoa o le mafua’aga lea ua mafua ai ona fa’atino le berberque ia e fesoasoani ai le aiga aemaise o fanau o lana fanau o lo’o ua tapena atu le toe amatalia ai o aoga i lenei tausaga.
“Ia o a’u e to’aono lava si a’u fanau, ma ua i ai fo’i fanau o fanau.” O le saunoaga lea a Tafaoata.
“Ou te iloa lava e a’u ia le taugata o le tau o le soifuaga o lo’o ua i ai nei, ma o se itu faigata tele lea i lo’u iloa i ai.
“Ae ao lava fo’i ina ia aua ne’i o tatou nofoa’i aua o le itu mautinoa ia e fa’aletonu ai nai o tatou aiga, ma o le auga lena o le faia ai fo’i o lenei berberque.
Na ia ta’ua o le fa’aiuga o le tausaga ua mavae atu nei na amata ai.
“Ia o le fa’aiuga o le tausaga ua mavae na amata ai si a matou berberque, ma na va’ava’ai atu lea o lo’o alu lelei lava.
“Ia e pei o lea le tulaga ua fa’aauau mai ai e o’o mai le taimi lenei.
“E le fa’apea o le a lava se mafua’aga e pei lava ona ta’u muamua atu e mo le atina’eina o aiga.
“O lea le fa’amoemoe o matua uma ia fa’aaooga lelei fanau, e tutupu ane e soifua a’o’aoina ma ia lava lelei le a’oaiga.
Na ia ta’ua e ono avea le tau o le soifuaga ma fa’afefefe i nisi o vaega e le tatau ona o’o mai.
“Ia e pei o le faigata lava lea , aua fo’i e le mafai ona ‘a’ai ae le mafai ona fai i ai se tonu.
“E le mafai ona o tatou iloa, le auala ina ia fa’aititia ai le tau o le soifuaga ma le faigata ai ona fa’atau mai ni oloa se fia i le $10,
“O le a fo’i le fia ulavavale o le tetele o totogi a nai fanau , ia e le taitai ona lava.
“Ae o lo’u ia tinā e tatou tau fai tatalo, ma tu’u i le Atua.
“O lo’o silasila mai i o tatou mafatiaga ma fesoasoani mai lo tatou vaivai o lo’o ua i ai nei.
“E tutupu vavega pe a lafo’ai i le Atua.