Aua le avea le vālea o ō, e tātou te vālea atu ai ma tātou

27 May 2018

Tusia Rev. Faalafi Falefatu Enari


O le Faasinomaga lena a Tagaloalagi mo tatou i lenei vaiaso. “Aua le avea le valea o le tagata lelā, ma mea e te valea atu ai ma oe.”

Manaia ia o lenei fuaitau, ona i le nusipepa i le vaiaso nei, e i ai le tala i se taule’ale’a na talosaga i le SLC po o le matagaluega o va’aia eleele o le atunu’u mo se fanua e fai ai sana atina’e, ose ma’umaga. Tusa ma le lua tausaga o fa’ata’amilo ia e le pulega ma le fa’aupuga e leai se fanua o avanoa. Ina ua sui le pulega na toe sau ma lona manatu o le a i ai se suiga. A e leai, o le tali lava e tasi. Manatu loa o le a alu e vaai le Minisita, atonu e maua ai se manuia. 

Lea lā ole a faamatala e le Minisita le la feiloa’iga, “Ua sau nei le taulealea lea ma talanoa mai, se pei a ua ou faalogo i lau talanoa i le taimi foi o u talavou. E sogasoga, e le solomuli, e finau, e toa, e fai le ate, e le fefe e galue.” O le fiafia o le Minisita na fesoasoani a ii le taulealea ma lana mataupu ma lana tala, “Aua ete talitualimaina le faatuatuaga lea ua tu’u atu.” Savali loa i fafo ma lana tali, “Aua ete popole lau Afioga a le Minisita.”

ADVERTISEMENT

Ono masina a e toe tu le alii lea i lona ofisa. “A ou ou. O le a foi le mea e koe magao i ai salakou lea,” faimai le Minisita o ona mafaufauga ia. Fesili atu loa i ai pe i ai se mea o fa’aletonu, a e faimai lana tali, “Se ua ou maga’omia se isi lima sefulu eka.” “A o fea le lima sefulu eka ga ga avaku.” Ole fesili lea a le Minisita. A e faimai lana tali, “Se ua uma ga kokō, ua opo uma i le kalo.” Faiatu loa le Minisita, “Se’i ta o oute fia vaai i lau atina’e.”

Ua te’i le Minisita i le taunu’u atu, oka le mafola manaia mai o le ma’umaga o le taulealea e sa’o lava, ua opo lelei i le tiapula. Faiatu loa lana tala, “Sa ou faalogo e toatele tagata na fai ā latou atina’e ma’umaga fa’apenei a ua le toe faia ona faimai e tele ina gaoia ma ai e pua’a.” A e faimai lana tali, “E sa’o. E gaoia so’o lava lo’u maumaga, koe kele foi iga ai e puaa. O le mea lega ua ou kago ai kokō le isi iku lelā e a’ai ai pua’a, a o le isi piko la le ua kokō e a’ai ai le au gaoi. Mea lega ua magaomia ai e si ou akalii se isi lima sefulu eka. Ua vave le ai a pua’a male fafai a le au gaoi a ua kuai la’u kokō.”

Toe foi mai loa i le Ofisa ma faagaioi e le Minisita ma toe maua ai loa le isi lima sefulu eka, ma fai ai ma le upu a le Minisita i tagata o iai fanua lisi, “Faaaoga fanua, a le o lena, e aveese le fanua ma oe ae avatu i e laute galueina ma faaaoga tatau.

Na ou faitau loa i le tala lea, ou manatua lea o le toeaina o Oka Fauolo i le matou vaitaimi i le kolisi fa’afaife’au i Malua. Masani lava e fai asiasiga ma’umaga a ā’oā’o, a o le tele lava o taimi e le aai ā’oā’o i o latou maumaga ona e tele ina gaoia. Ua tomumumu nei la ā’oā’o, “Leai a se uiga e fai ai nei ma’umaga e maute le o aai ai o la e a’ai ai i ma o.”

Ua logotala nei le toeaina i le faaseā a ā’oā’o. Uma loa le lotu i le isi taeao faimai loa ma le tala a le toeaina e uiga i le tomumumu a ā’oā’o. “Ua ou faalogo ua tou tomumumu toute le o aai i o tou ma’umaga ona e tele ina gaoia. Ia, e leai se mea o le a tou tomumumu ai. A gaoi mai latou a e totō pea outou; gaoi mai latou a e totō pea outou. Aua le avea le vālea o tagata lā ma mea o le a fa’avalevalea atu ai ma ouotu. Fai lau mea e tatau ona fai. A valea mai o, tu’u peai pea e valea ai pea, a e aua le tuu ai o le fai o le mea lelei na ete faia. Tatou ta’ape i vasega.” E le’i toe lagona se tomumumu i le laumua na o ma’umaga ua le na o le selau tiapula a ua ta’i lua, ta’i tolu selau. 

O le Faasinomaga foi lena a Tagaloalagi mo i tatou Samoa, “Aua le avea le valea lā e fai mai ō, ma mea e taute fa’avalevalea atu ai ma tatou. Lā ua i ai Kamupani i le lalolagi ua ave’ese le 5% o le latou polofiti e fa’aagaaga mo mea e gaoia. Pei foi la o le taule’ale’a lea na sulu i le Minisita mo se fanua, e le gata ua totō talo mo lana atina’e, a ua fa’aāgaāga foi tiapula e totō e a’ai ai puaa, ia ma nai fuauli mo le au gaoi. Masalo ua silafia lelei e le tauleaelea lea le muagagana, “O lou taumafai e fa’aagatonu le vale, ete valea atu ai ma oe.” 

Fa’amalumalu mai Agaga o tatou Tua’ā ina ia ulimasao o tatou ala uma i lenei vaiaso. Ia Manuia le usugāfono a le Ekalesia Faapotopotoga Kerisiano Samoa i Malua i lenei tausaga. 

27 May 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?