Fa’amavae i loimata Sogi ma matua-fa’aleAgaga

SS
By Sarafina Sanerivi, 05 July 2016

E le faigofie le fa’atofa atu pe tu’ua fa’apo-o-evaga se mafutaga ua mafanafana ua lalata i le 40 tausaga talu ona fa’avae. 

Mo le Susuga a le Toea’ina Fa’atonu o Kerisiano Soti, le faletua o Laumata ma le nofo-a-alo, o se Aso Sa o loimata ma lagona e tumu i le fa’anoanoa, ina ua fa’amae’aina ai la la tautua sa faia i le 38 tausaga, a’o avea ma Fa’afeagaiga o le Ekalesia Fa’apotopotoga Kerisiano Samoa i Sogi.

“O lagona masani ia, pei lava fo’i o isi pe a fa’amavae atu i tagata sa latou galulue fa’atasi mo se taimi ‘umi,” o lana saunoaga lea. 

“E fa’anoanoa ai lava ona o le a misia tagata uma i lenei a’ai, ae ona o tulaga lava ia o faiga-fa’avae a le Ekalesia, e ao lava ona usita’ia.”   

O se aso fo’i e toe tepa taula’i ai i le taimi umi sa iai i Sogi, e manatua ai le amataga mai ma le faigata sa fa’afeagai ae maise fo’i o itu lelei sa ‘ausia.

“O le aso (Aso Sa), ua toe to-manatu ai i le taimi na ulua’i taunu’u mai ai i Sogi, i le tausaga e 1978, ma tagata uma sa talia fiafia ma tausia ma’ua ma le fanau,” o lana saunoaga lea.

“O le to’atele o le ‘au-matutua ua maliliu ma le to’atele fo’i o isi toea’i’ina ma ‘olomatutua ua matou le toe fa’atasi; ma o se fa’anoanoaga tele lava lea ona ua le-‘auai i lenei aso ma le fa’amoemoe. 

“Ae ‘ou te talitonu lava, o lo’o ‘auai-fa’atasi mai o latou agaga i lenei aso.” 

O le toe-tepa i aso ua mavae ma le galuega sa feagai ai, na saunoa ai le Toea’ina, e tele lava lu’itau sa fa’afeagai. 

“O le mea masani lava i so’o se fa’alapotopotoga ma so’o se mea i le ola nei,

“E iai lava lu’itau ma fa’afitauli e tutupu mai, peita’i o ia lu’itau, e tofotofoina ai lo tatou fa’atuatua ma tilotilo ai fo’i i le tulaga e fo’ia ai ia fa’afitauli.

“A’o le aso la, e vi’ia ai lava Le Atua, ua Na faia mea silisili mo ma’ua ma le fanau. Na ia ta’ita’i mai ma’ua i’inei ma fesoasoani mai i to’atuga ma fa’afitauli. E fa’afetaia ai lava Lona Alofa ma e tumau Lona Vi’iga ona o Lona Alofa le-mavae ma Lana lagolago.” 

ADVERTISEMENT

I le tele o lu’itau sa feagai ma le Toea’ina, na ta’ua lava, o le fa’afitauli ‘autu lava sa latou feagai, o le taimi na fa’atonuina ai tagata-nu’u o lo’o aumau i Sogi, e tu’ua le nofoaga lea.

“I le matou fa’atoa taunu’u mai i Sogi, sa i Sogi lava le falesa a’o le taimi nei la, ua lua falesa ona ua matou si’itia atu i Falelauniu. 

 “Peita’i,  o le to’atele o tagata o le ekalesia, e manana’o e nonofo latalata  i le nofoaga sa masani ona soifua ai, ona e latalata i le taulaga. Sa faigata lava le si’itia atu i se isi nofoaga ‘ese, e ‘ese fo’i lona si’osi’omaga.” 

Na ta’ua fo’i e le Toea’ina Malolo Manumalo, o ia sa tatau ona penisiona ina ua mae’a le Fono Tele a le Ekalesia i Malua i le tausaga nei. 

 “Ae talu ai, sa galulue pea le matou ekalesia i le fausia o le falesa fou lenei i Fugalei ma le isi i Falelauniu, na ma manana’o ai lava e fa’atali se’ia mae’a lelei mea uma ma sologa lelei le galuega, ona matou fa’amavae loa lea ma malolo-penisiona.”

Na fa’ailoa fo’i e Kerisiasno, o le avea ai o se Faifea’u Penisiona, e le fa’apea o le a le-fa’aauauina ai lana tautua mo le ekalesia. 

“O le a matou o, po’o fea lava o le a matou nonofo ai – po’o le nu’u o lo’u to’alua pe o lo’u nu’u fo’i, o le a fa’aauau pea ona fesoasoani ma fai lo’u sao i le ekalesia o iai ma ‘auai pea i le galuega a Le Atua,” o lana saunoaga lea. 

O le Ekalesia i Sogi, sa avea lava ma aiga lona lua o le Toea’ina ma le Faletua, aua o lo la nu’u lea ma le aiga mo tausaga e 38 ua mavae.

“Sa ma galulue ma nonofo ai i Sogi i le ‘afa o o ma olaga ma ua avea lava o lo matou aiga ma le nu’u, mo a’u ma lo’u to’alua ma le ma fanau,” o lana saunoaga lea. 

“E fa’anoanoa lava ona o le a misia latou nei, peita’i ane, o se vaega lava lea o le fa’avae o Ekalesia ma e ao lava ona usita’ia.” 

Ui i lea, a ua fiafia fo’i le Fa’afeagai o Kerisiano, o le a maua o sana malologa ma mafuta atoatoa ai ma le to’atele o o la alo ua iai. 

 “O le a fa’atali pea, po’o le a le finagalo o Le Atua o totoe mo a’u nei ma le aiga.” 

E le gata o le Fa’afeaga taulaga a le Ekalesia i Sogi, a’o le Faife’au Toea’ina o Kerisiano, sa avea fo’i ma Ta’ita’ifono o le Fono a le ‘Au-Toea’i’ina ma le Failautusi o le Fono a le ‘Au –Toea’i’ina.

O lo’o momoli atu fo’i lana fa’afetai tele ia latou uma sa fesoasoani atu i so’o taimi a’o feagai ai ma le tautua sa faia i le Ekalesia i Sogi. 

Malo Lava Tautua ma ia Manuia Tele le alo atu i le malologa.

SS
By Sarafina Sanerivi, 05 July 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?