Manatu o le Fa’atonu - Se o le mea tuai lava

MK
By Mata'afa Keni Lesa, 05 July 2016

Sala i le le-fia fa’alogo i tala fou ua ‘aumai nei e uiga i le ‘auai o motu o le Pasefika i le Supa Lakapi.  Ua se tai-taliga fo’im ae talosia ia, ia taunu’u ma mafai ona latou fa’asa’o.

Moni e fia iloa mea tonu o le a tutupu, peita’i, lea lava o lo’o tumau pea lava pea le anoanoa’i o le mau fesili le-talia mai lea tausaga i lea tausaga. Fesili e afua ona o tulaga tau-tupe, o le agava’a o tama-ta’a’alo, nofoaga e fai ai ta’aloga, o pulega lelei ma isi mau gaosa. Lea lava e tumau ia fa’aletonu ma e foliga mai afai lava e le-iloa po’o ai e maua ai ni tali sa’o, o tala ua toe fai nei foi, e ma’umau lava le taimi ma e mautinoa fo’i le le-taunu’u, vagana lava ua iai se tasi e malele ma sauni lelei e fa’atino malelega ma saunoaga e fai so’o. 

Moni o le lakapi e le na o tupe. A o le fa’anoanoaga, o nei aso ua fa’apolofesa le ta’aloga, tiga le tele o le mau fa’amatalaga ae afai e leai ni tupe e fa’atino ai, e pei lava o sumepalo tagitagi. 

Ae fa’afetaia ai pea ta’ita’i ma ofisa e aofia ai ma vaega fa’asalalau o le lalolagi aoao, lea e fa’aauau pea ona leotetele ma lagalaga lea mata’upu.  Fa’afetai lava. O le mea e ao ona finau ai aua e talitonu le mafaufau, o le vaega ogaogao le Supa Lakapi lea e i le itulagi nei a le Pasefika. Lea e talanoa atu i se ‘Au e malosi, mata’utia ma fia-matamata ai, e popoto ma agava’a e ta’a’alo ma e mafai ona tosina iai le anoano e matamata ona o le ta’a’alo mata’ina. Talitonu iai, o lo’o i’inei le taleni lena; e fa’amalulu atu ai pe a ua tetele atu. 

Ae silasila fo’i, afai e fa’aauau pea ona le-amana’ia le Pasefika, ‘upu-‘upu-tetele iai, ma fa’ainaelo iai i le tele o taimi a’o lea lava e fa’aauau ona gaoia atu a tatou tama-ta’a’alo mo tama-matutua ma lapopo’a i na atunu’u, e na o le oso o le le-fiafia. 

A o le mea lena o lo’o tupu nei i le to’atele o tatou. Ua tiga so’o fo’i nai taliga i le so’ona sausau.

Ae silasila fo’i, o taimi uma lava e ta’ua ai ia mea, e oso ai lava le fiafia ma tupu i luga le fa’amoemoe. 

Ae mai lava i le taimi na amata ai le Supa Lakapi – a’o ta’ua o le Supa 10, sa iai lava le le-fiafia ona o le tu’ulafoa’ina. 

Ua tatou fa’alogo so’o i folafolaga, ua tatou iloa fo’i le mau fonotaga sa faia  ma le mau tupe na fa’aalu ai, a’o lea lava e fuamoa se aga’i i luma. Ioe, ua silia i le 20 tausaga e na o le talanoa talanoa ma talanoa. 

ADVERTISEMENT

O taimi uma fo’i o le Ipu a le Lalolagi – ta’ifa (4) tausaga, e laga’ia ai lava lea mea. O le taimi lava e faia’ina ai se ‘au a se atunu’u mauoloa i se ‘Au mai le Pasefika – po’o Samoa, Tonga po’o Fiti fo’i – e iai lava fo’i se tagata i le lalolagi tele e toe fa’aosoa se talanoaga o lea lava mata’upu, e foliga e na ona fa’afiafia ai tatou ona ua laga. 

O nai vaiaso ua tuana’i atu, na tatou va’aia ai ma fa’alogo i le mau fa’amatalaga e uiga i le Pasefika ma le Supa Lakapi lea. O le malaga a le Crusaders ma le Chiefs lea e foufou mo Fiti, ua maua se isi va’aiga fou i le fa’afitauli lava  lea e tasi, ma e foliga ua iai sina fa’amoemoe atonu o se aso e le o toe mamao, o le a maua ai se avanoa o motu o le Pasefika e tu’u-fa’atasia ai sana ‘Au mo lea ta’amilosaga. O se manatu e matua manaia tele. A’o ai e le mana’o ai? 

Atonu ua le-lava fo’i ta’u-so’o, na o le ta’u lava.

Ua ila fo’i le pa’u i le mau pepelo. Ae le na o le Supa Lakapi la e ono fai iai se fa’atatau. O le manatu ma le va’ai a tama-matutua ia i le lakapi i lenei itu o le lalolagi, e matua fesiligia lava ma e fa’aaliga lava i i’uga o ta’aloga. I aso lava la ua leva, sa gafatia lava e ‘Au a le Manu Samoa, o Fiti ma le Ikale Tahi ona finau ma ‘au a tama-matutua ia. Aso nei la, ua matua faigata lava. Talu ai, ua le toe iai se naunau ma ua matua fa’ainaelo lava i ‘Au a le Pasefika, i fesoasoani tauSeleni.  

A manatu i le Ta’amilosaga o le Ipu a le Lalolagi talu ai, i le fia miliona o tupe na maua ai, lea na tele ai lava le sao o ‘Au a le Pasefika ona o le ta’a’alo mata’ina na fia matamata iai le lalolagi. Ae fia ni miliona na tauia ai lenei itu?  E mataga tele, e leai se tasi e fia su’esu’ea. 

O le tulaga lea e o’o iai.

O tupe lava; o taumafaiga lava o se ‘auala ina ia tauva ai pea ‘Au a le Pasefika. O le tulaga lava lea o le a fa’avavau ai pea, o na o le leai o se tupe.

O le ta’ua o lea tulaga, e moni ai fo’i i le fa’aletonu o le leai  oni faiga malamalama ma mautali atu i pulega a malo o le Pasefika lea e mafua ai ona taofiofia le aga’i i luma. O se fa’ata’ita’iga Samoa nei; o lo’o fesiligia pea tulaga o fa’ai’uga-fai ma le fa’ailoa atu i tagata o mea-moni pe a o’o i tulaga tau-tupe e tu’uina atu mo le atina’eina o le ta’aloga. O fa’afitauli nei e mo’omia lava ona fo’ia muamua ma fa’atauaina, pe afai e fia si’itia ma aga’i i luma le lakapi i Samoa nei.   

E fa’amae’a atu ai, o se matua anu-i-lagi se manatu fa’apea ia tu’u-fa’atasi se ‘Au a Samoa, Fiti ma Tonga mo le Supa Lakapi. Ae iai le taua o lea fa’atatau. 

Peita’i ane, e tatau lava ona tofu le Iuni Lakapi ma le avanoa e finau ai ia sa’o i totonu o le Supa Lakapi. Ae talu ai o ‘Au aloa’ia o le Supa Lakapi e mai Niu Sila, Ausetalia ma Aferika i Saute, aisea e tu’u ai ‘Au a Samoa, Fiti ma Tonga e fetaui ma ‘Au pei o le Sunwoldves, le Jaguares ma isi ‘Au fou, e sa’ili ai po’o ai e mauaina avanoa ia? 

Na o se manatu lava, ae ‘aua le taofia lou finagalo. 

Ia manuia tele le Aso Lua Samoa. Fa’amanuia atu Le Atua!

MK
By Mata'afa Keni Lesa, 05 July 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?