Manatu O Le Fa’atonu - Lagona fiafia o le Olimepeka

By Mata'afa Keni Lesa 30 July 2016, 12:00AM

Ae sa’o lelei, pei o le ‘emo o le mata le alu a le taimi. E le’i leva na’ua, na o le fa tausaga talu ai i le tula’i mai o le tamaloa o Usain Bolt, feta’ua’ina i so’o se tulimanu e o’o i totonu o maota ma laoa, ae maise ata o le tamaloa aupito saoasaoa i le lalolagi, na salalau solo mo tagata e maimoa iai. 

E le’i vasa’i lava, e le’i to-lelei ane le manava a ua toe o’o mai fo’i Ta’aloga o le Olimepeka.  Tele tausaga ma masina, o vaiaso fo’i ma aso o fa’atalitali a’o lea ua toe o’o mai, ua fa’aosofia ai moega-luaga, le agaga o le fiafia ma le ‘oli’oli, ona o Ta’aloga a le Olimepeka 2016, i Rio.  E tapena lenei tusitusiga, a o le taimi tonu lea ua aga’iga’i malie atu sui o le ‘Au a Samoa aua le fa’amoemoe lea i Brazil.   

O le amataga o le vaiaso nei, na momoli ai fa’amanuiaga a le Ali’i Palemia, Tuila’epa Sa’ilele Malielegaoi, fa’alae’i’Au atu ina ia matou tu’u uma iai lo latou iloa ma le malosi, aua lava se pine mo Samoa.

“E le-faigofie le ta’amilosaga lenei ma e fa’apena lava i taimi uma e faia ai ta’aloga,” o lana saunoaga lea. 

“E matua ‘ese mamao mai isi tauvaga uma sa outou ‘auai ma e matua faigata atu i so’o se tauvaga e faia i totonu o le Pasefika i Saute.

“O le mea moni, e o’o mai i le taimi lenei, e le’i maua lava se tatou pine talu ona tatou ‘auai i ta’aloga a le Olimepeka ma o i’ina e ta’u mai ai le faigata o nei tauvaga.” 

Moni lelei Tuila’epa, ae pe ono iai se suiga i lenei tausaga, o le mea lena tatou te le-iloa.  

Ae le fa’apea o le a nofonofo ai pe tuli’aupu ma o le tulaga-lua. Lea lava na fa’amanatu iai e Tuila’epa, ina ia tausinio i le mea e gata ai ma finau i le manumalo. 

Sa ‘au-ato atu fo’i le lu’i a le Palemia i fa’alapotopotoga ma vaega ‘ese’ese tau- ta’aloga, ae maise lava faia’oga, ina ia tula’i mai. 

“O le lu’i mo ‘outou o faia’oga, ia to’a’aga e koleni lelei ‘au-ta’a’alo,”o lana saunoaga lea. “Ina ia matua selau-pasene ai le talitonuga, o le a maua ni a tatou pine pe leai fo’i a’o le’i aga’i atu mo tauvaga nei.” 

A va’ava’ai atu i le ‘au i lenei tausaga, e faigata lava ona fai o se tala ma le mautinoa, pe o le a maua nei sa tatou pine.  

O lea mea ua iloa nei, o se taimi fiafia tele lenei mo sui o le ‘Au ae maise fo’i o latou aiga. E mautinoa lava, o le taimi o le sauniga amata e tatala ai ta’aloga, o se taimi aupito fiafia lea ma mimita mo latou. 

Ae tu’u ea? O le Olimepeka le mea, o ta’aloga aupito maualuga lea i le lalolagi.  E le so’ona tauva ai se tagata-ma’i, au e faigata le ‘auala ina ia o’o iai. O tagata-ta’a’alo uma o le a savavali i totonu o le malae mo Ta’aloga, o le a soifua pea e fa’amatala ma fa’amatala pea le faigata, le finau ma loimata sa latou fa’afeagai a’o taumafai, ina ia o’o i Rio. 

E le tau-fa’ailoā, o le tumutumuga lena o miti ma mo’omo’oga a so’o se tagata-ta’alo, ia avea ma sui o lona atunu’u i tauvaga tetele fa’apea.   

Ae mo Samoa uma ua avea ma sui o le atunu’u, ua talafeagai lelei,  aua ua tauia lo tou tautiga. E momoli atu ai a matou fa’amanuiaga mo ‘outou uma, o mama na. Pe pine pe leai, pau la matou tatalo, tu’u atoa ia lou fai-mea-mafai.  Mai le filemu o lou atunu’u o Samoa, o le a matou alo e tapua’ia lo tou alofaiva.

‘Ese ai mai le ‘Au a Samoa ua i Rio, o le a fa’apea fo’i ona fa’afiafiaina le atunu’u aoao, e maimoaina ‘au-ta’a’alo aupito lelei i le lalolagi, a’o finau ai i vaiaso e lua o muamua. 

O se tauvaga mata’ina, o le fa’aaliga o le maualuga ua iai le malolosi ma le tomai tau-ta’aloga ua masani ona va’aia i Ta’aloga a le Olimepeka.  O le fa’amanatuina o le taunu’uga manuia o ta’aloga, fa’amanatuga o le manumalo aoao e le tau mo’omia ai po’o fea le atunu’u e sau ai, ae fiafia fa’atasi i le taunu’uga manuia o ta’aloga.

Ia manuia le fa’ai’uga o le vaiaso ae maise le alofaiva o le ‘Au a Samoa. O mama na!

By Mata'afa Keni Lesa 30 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>