O LA’U TALA FO’I

09 June 2016, 12:00AM

1. Matauina i Tala Fou fai mai –“ua tāpā e le Palemia o Tuilaepa le “faamaoni” ma le “tulaga mamalu”mai ta’ita’i o le atunuu ma tagata faigaluega uma o le Malo”-talu ai ua tuuina atu e le atunuu lo latou faatuatuaga ia i latou!

Fai mai la le Palemia- e manaomia lea tulaga e fai ma taui o le totogiina o lafoga e le atunuu! E manaomia la le faamaoni ma le tulaga mamalu-ina ia mafai ai ona le afaina soifua o le atunuu!

Afai la e tuu atu lea faaupuga i lona ata lautele-ona faapea lea-e le taumate ua maua se lesona a le Palemia mai le anoano o mea sese ma faiga pi’opi’o a lana faigamalo-ia ua matua masofasofa ma afaina ai le atunuu!

O le pine la o se manatu-a tatou toe tilotilo i le ata lautele o faiga pi’opi’o a le faigamalo faatasi ai ma taupulepulega leaga a tagata faigaluega o le malo e pei ona faamaonia e le Pule ma Su’etusi Sili ma le Komiti Filifilia a Alii Ofisa o le Palemene-e faitau miliona ma miliona tupe o le afu  o le atunuu ua maumau ai-ae matua leai lava se gaoioiga a le Malo ua faia-e faasa’o ai lenei faatautala ma le le popoi.

E peiseai la ua manino mai-a pi’opi’o ta’ita’i ona leai lea o se mea a le Tulafono e mafai ona fai ai-ae a gaoi ma pi’opi’o tagata o le atunuu-ona faatoa ave lea  i le Faamasinoga. Afai la e moni ma faamaoni e tolu Vaega faatulagaina o le Malo o Samoa, o fea la o i ai isi vaega e lua-ae o lea e pi’opi’o le tasi o ia vaega?

O le mata’utia la o nei faiga pi’opi’o-o lea ua o mai ai Malo Aufaatasi e taumafai se faiga e fo’ia ai-talu ai-e matua tapu ia faiga e Malo Aufaatasi! Afai la ua o mai Malo Aufaatasi e taumafai e fo’ia lea tulaga-o lona uiga-o lea ua o mai le lalolagi atoa-e tau titina faiga pi’opi’o ia ua sasao faa-afi i totonu o Samoa-ae leai se mea e tasi a le faigamalo lava ia-o fai i ana faiga pi’opi’o!

Faamata e le o se luma maoa’e lea o Samoa talu ona Tutoatasi i le lalolagi atoa-aemaise ai lava o lea e taulamua ai le faigamalo-ma e musu e fai le amiotonu ma le faamasinoga? O le a la le aoga e toe manaomia ai le faamaoni ma le tulaga mamalu? E mafai ona fai ai se suavai a le atunuu? O le a sou taofi?

2. Matauina foi i Tala Fou se ulutala e uiga i se alii aisi aupito i matua o Samoa-o Isaia mai Alamagoto! O lana faaaliga e faapea- e le ‘mana’o ia avea o ia ma avega mamafa i lana fanau’-ma o lea ua alu ai lava o ia e saili ana tupe e fesoasoani ai i lona aiga!

E manaia foi le finagalo faaalia o sia tamā-ae peiseai e le o se faiga lea e masani ai Samoa! O lona uiga i se tasi itu-‘o le a tausi tele o ia e Samoa atoa’.Ae afai la o loo nofonofo solo i le Taulaga ma aisi pe leai foi-i tagata faatau-ia- e pule lava le tagata ia ma lona finagalo e tusa ai ma lona sa’olotoga-ae afai e tausi taita e lata fanau-ae toe alu nofonofo ma aisi solo i le Taulaga-o le upu moni-e i’u lava ina iloa uma ai lo latou aiga- aemaise ai o le fanau-ma afai la o faigaluega lelei lana fanau-o le upu moni fai mai-‘o tala e fai taliga-ma o tala foi e lealea i le matagi!Ae ui o lea-afai o faaaoga ana tupe mo le tausiga o lona aiga-o lona uiga la-o lena foi e aoga lona sao i le tausiga o lona aiga! O le a sou taofi?

3. Matauina foi se tasi o ulutala uiga ese o Tala Fou fai mai –‘ia faamalosia le tulaga o le atunuu ina ia una’ia ai lona tulaga mamalu…..! O lea foi la fuafuaga- e faatῡtῡ foi i le tineia o faiga pi’opi’o-ona faatoa mafai lea ona ‘ausia fuafuaga tau le atiina a’e-e mafai ona faatumauina.

E le gata i lea-o lea foi ua fai mai o faiga pi’opi’o e lamatia ai atiina a’e-ma faavaivaia ai pulega lelei-ae telegese ai ma le tuputupu a’e o le tamaoaiga……….!Afai la e moni nei faaupuga-faafetai la o lea ua silafia e Samoa atoa- le pogai o le tulaga pagatia ua i ai nei Samoa.

O lona uiga la-o le fili numera tasi o soo se galuega lelei mo le manuia o se atunuu-o le tama lava lea o ‘faiga pi’opi’o’ le fili autu! Afai la o le faigamalo e ana nei mea o faiga pi’opi’o-ma o le faigamalo muamua foi lenei a Samoa ua na faia nei mea mataga e igoa o faiga pi’opi’o-o le a la se faiga a Malo Aufaatasi e mafai ai ona matua titina lenei mea leaga o “faiga pi’opi’o”?

E mafai la e Malo Aufaatasi ona tuuina atu lenei mataupu i le Faamasinoga a Samoa poo le Faamasinoga a le Lalolagi? E mafua se taofi ona afai e le mafai e Malo Aufaatasi ona tuuina atu lenei mataupu i le Faamasinoga a le lalolagi-o le upu moni-‘E faavavau amene e le mafai e le faigamalo lenei ona tuuina atu lenei mataupu i le Faamasinoga-e fai i ai le amiotonu ma le faamasinoga e tusa ai ma le faasinoga a le Tulafono!

E mafua ona e naunau le faigamalo o loo i ai nei-“ia o’o mai lava le faavavau o ona pulea le Malo o Samoa-ina ia ‘aua lava ne’i aliali i luga-a latou faiga pi’opi’o ma le faatautala! O le a la sou taofi?

09 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>