Fa’afetai i le ola ma le malosi
E u i le tele o fa’afitauli o lo’o fesouaina ai le ola ma le soifuaga o lo’o ua tatou i ai nei, ae o lo’o lagona lava le mafanafana o le alofa o le Ali’i mai lea aso i lea aso.
O lea le finagalo o Vini Tapuvae i le fa’atalatalanoaga ma le Fofoga o Samoa.
O Vini o lo’o nofo to’atasi i le taimi lenei ma ua 50 le matua o lona soifua ma o lona ola auauna ai totonu o le ekalesia o se fiafiaga tele lea i a te ia.
“Ia e tusa ma le 17 nei tausaga talu ona ou nofo iinei i le fale o si o matou faifea’u, ma o se fa’afetai ma se fa’amanuiagatele lea mo a’u i lo’u iloa i ai.
“Ae o le soifuaga o lo’o o tatou i ai nei, o lo’o solo solo lelei lava e ui lava i le mau fa’afitauli o lo’o fai ma afatia ai si o tatou folauga o lo’o fai nei.
O le atoa ai o le 50 tausaga o lona soifua o se fa’afetai lea.
“Ia e leai lava se isi mea e ao ona ave ai le fa’afetai ma le viiga , o le Tama Sili i lona agalelei i le tele o aso ua mafai ona fo’ai mai le ola o si nei tagata fa’atauva’a.
“Ia olo’o gasolo lelei mea i totonu o si o matou nei nu’u, ia e le taumate o lea fo’i le tulaga i totonu o si o tatou atunu’u.
“E leai lava se isi mea nai lo le ola fiafia, ia ma to’aga e fai mea uma ma fa’amoemoe i le Atua.
Na ia fa’ailoa o le isi itu lelei o Samoa o le mafai lea ona fesoasoani o le tasi i le tasi.
“Ia o le ola fetausia’i o nai o tatou tagata, ua masani ai lava i vaega nei, e pei o vaega nei o lo’o iloga ai lava si o tatou atunu’u i fafo.
“E le gata i lea o si o tatou aganu’u ua masani ai.