O la’u tala fo’i

21 December 2015

1. Matauina i Tala Fou e aliali mai e ono o’o lava le mataupu a le Digicel ma le Bluesky i le Faamasinoga-e ui lava ina ua mae’a ona faatonuina e le Faatonu o Fesootaiga Televavave le Iuni Lakapi a Samoa ma le Bluesky ina ia faato’ese aloa’ia e tusa ai ma le afaina o fesootaiga a le Digicel i le taimi o le taaloga a le Olopeleki ma le Manu Samoa i Apia nei.

Ia afai nei la o le a faifai tetele lea mataupu-o lona uiga o le aliali ai faiga faalilolilo a le Iuni Lakapi ma le Bluesky e tusa ai ma le afaina o fesootaiga a le Digicel i le aso o lea taaloga faitauina a le Olopeleki ma le Manu Samoa.

Ia e pei lava ona faaalia –ua uma ona aumai le poloaiga a le Pule Faatonu o Fesootaiga ia faatoese le Iuni Lakapi a Samoa ma le Bluesky i le Digicel. Ae afai lava e le o faamalieina le Digicel ma ua mana’o lava ia o’o le mataupu i luma o le Faamasinoga-o lona uiga la- e le taumate e anoano ni mea faaletonu na maua i le suesuega a le Regulator poo le Pule Faatonu o Fesootaiga Televavave!

Ae o ai la lea e taiulu i le Iuni Lakapi a Samoa? Ia- e moni lava e mataga pe a o’o lea mataupu i le Faamasinoga, ae aoga foi o le a toe malamalama atili ai le atunuu –i le faatinoina o ia faiga pi’opi’o-aemaise ai o le tagata na faatonuina le Bluesky e faatino lea tulaga! O le a sou taofi? 

2. Matauina foi i Tala Fou le anoano o Laau Kirisimasi ua vaaia i aso nei i Samoa. O le tasi o ia la’au Kirisimasi uiga ese- sa i le Kafetala i Mulivai e lalaga mai le launiu. O isi foi laau Kirisimasi o laau masani lava mai fafo.

O lea foi la ua i ai ma le Laau Kiarisimasi a le Samoa Observer i Vaitele-ma o lea laau Kirisimasi o le a tufatufaina atu ai ni meaalofa mo tamaiti.

O nisi la o le aufaigaluega a le Samoa Observer o le a gafa ma le tufatufaina atu o ia meaalofa i luga o ala tetele i le taeao o le Aso Lulu-23 o Tesema 2015 mo tamaiti o Samoa ma nai tamaiti o loo faatauina atu oloa i luga o alatetele.

O le a molimoli atu ai foi ma faamanuiaga o le Kirisimasi ma le Tausaga Fou a le Samoa Observer i le atunuu atoa-ina ia tatou tofu maua se Kirisimasi Fiafia ma se Tausaga Fou manuia! O le a sou taofi? 

3. Ua matauina foi i lenei vaiaso atoa ma luma atu le tulaga ese o le loto foa’i o le tele o kamupani i le atunuu- e pei ona asia ai e isi kamupani nofoaga e pei o le Falemai i Upolu nei ma Savaii-ona o le agaga o le Kirisimasi- o le foa’i atu lea o meaalofa mo isi tagata-aemaise ai lava nai o tatou tagata matitiva!

ADVERTISEMENT

Ia- e leai se tio i lea tulaga aua a tuu mai i le aganuu- o le masani lava lea a le Samoa o le alofa i le isi tagata e tusa ai ma le fofoa mai o lona olaga i totonu o lona aiga!

O lea ua tu’u mai i ai ma le meaalof Silisili Ese a le Atua  o loo tatou Faaola lea o Iesu Keriso, ua aili ai ona atoatoa! Ia manatua la-o ia mea uma na foa’i atu mo tagata matitiva o le atunuu- e toe taui uma lava e le Atua i se mea e sili atu!

Aisea la e te le alofa ai i lou uso mativa o loo fia maua sau fesoasoani? Ia ‘aua lava nei galo- o tagata matitiva ma tagata puapuagatia e sili ona pele i le finagalo o le Keriso. E faapefea la ona tatou le manuia pe afai tatou te faia e pei ona faia e Iesu Keriso? O le a sou taofi? 

4. Matauina ma le fiafia se sauniga faamanatu faapitoa o le Kirisimasi lea sa aofia ai tamaita’i auro a Sister Patrick ma sa auai ni alii na valaaulia faapitoa se to’alua o Patele Father Hansell ma Tupua Fred Wetzell.

O le taua la o mafutaga faapenei-ua toe vaaia ai le aumatutua sa pagatia ai nai Taupou Sa e tau a’oa’o i aso ua alu! O le toe vaaia la o i latou nei-ua toe fafagu mai o latou uiga tutumau-o le musu lea i se tamaititi a’oga ae paie e faitau tusi pe lau le kapite.

O tagata foi e taua tele ia i latou le taimi, e le maumauina foi le taimi-ma masalo ana latou pule e faaumi taimi o aso- e fai ai a’oga-latou te faia lava! Ia-poo le lava le ‘auga o lea faamoemoe-ae o le faafetai-o lea lava e vaai atu mata o le tino nei-o lea e manuia tamaiti a Sister Patrick aemaise ai o tamaitai uma sa na aoaoina-faapea foi a latou uo mamae ma paaga.

“E momoli atu ai ma matou faamanuiaga mo le Kirisimasi ma le Tausaga Fou mo outou uma lava!

O le a sou taofi? 

5. Matauina o lea ua tapenapena Leoleo mo le fo’ia o sauaga ma o le pogai lea sa potopoto uma ai Leoleo mai ona nofoaga uma i tua- e auai i se aoaoga lea na talimalo ai Tamaitai o Malo Aufaatasi i le Aso Faraile!

Ia afai la ua tapenapena Leoleo mo ia faafitauli-ua tatau ma talafeagai lea aua ua toe o se aga ona tatou tu-vae lea i le Kirisimasni ma le Tausaga Fou!

O le tatalo la-talosia ia manuia ia taumafaiga a Leoleo-ina ia mafai ai ona matua tafiesea ai nei mea o sauaga-aemaise ai lava o lea ua tatou taunuu i le taimi o le soona inu ava malosi ma le faaaogaina o fualaau faasaina! Ae ia manatua foi- e le o se galuega e faapito i Leoleo-o le galuega a i tatou uma-pe afai tatou te manaomia moni se Samoa saogalemu i nei aso fiafia!

O le a sou taofi?

21 December 2015

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?