Fa’alauiloa Savai’i i le Lalolagi

VM
By Vatapuia Maiava, 31 March 2016

O le a avea le motu tele o Salafai ma taula’iga o le va’ai i nai vaiaso o muamua, ina ua tatala aloa’ia ananafi, le ulua’i ta’amilosaga ua fa’aigoaina, o Ta’aloga i Savai’i 2016.

O lea fa’amoemoe e aofia ai le ulua’i tu’uga-a’au (e 22.3 kilomita) mai Upolu i Savai’i le Aso 07 o Aperila 2016, o le tu’uga-uila-vili-vae e fa’ata’amilo i Savai’i atoa (e 180 kilomita) ma le marafoni e amata mai Sale’aula ae tini i Salelologa i le Aso 16 o Aperila lava.  

O ananafi na tatala aloa’ia ai ia ta’aloga e le Peresetene o le Asosi mo Turisi a Savai’i (SSTA), o Tupa’i Saleimoa Va’ai, le sui o Mapusua Sesilia Schwalger, le Failautusi o Elizabeth Siaosi ma Afoa Seti o Ta’aloga i Samoa.

“Na mafua le fa’amoemoe lea i Savai’i ona o le naunau lava e galulue fa’atasi ma latou i le motu-tele e tali ai le latou talosaga mo se fesoasoani,” o lana fa’aaliga lea. 

“O le finagalo-fa’aalia o Savai’i, o mea uma lava e maua e Upolu, o le 80 pasene o tagata-tafafao e nonofo i Upolu ae matamata-fua lava Savai’i, vagana toega mai tama-matutua i tumuā.

 “O lea mana’o, ia matou ‘aumai se mea manaia i Savai’i nei ma o le tali lea i le vala’au. O le ulua’i taimi fo’i lenei – i le fa tausaga ua mavae, ua matou faia ai se mea fa’apitoa mo Savai’i.”

ADVERTISEMENT

O le ‘autu lava o lenei fa’amoemoe, o le una’ia lea o tulaga tau-turisi ae maise le fa’alauiloaina o Samoa, o se nofoaga lelei mo so’o se ta’aloga.

“O le fa’amoemoe lava, o le taumafai lea e fa’ato’atele mai turisi i le motu tele, aua e le fa’apea na o tagata mai Niu Sila, Ausetalia ma Amerika…e ta’ua fo’i tagata mai Upolu o turisi,” o le fa’asoa lea a Afoa.

 “O se taumafaiga manaia tele lea mo Ta’aloga i Samoa, ma ua fiafia lava e fa’atino lenei fuafuaga mo Savai’i.” 

E mautinoa lava, o le a to’atele nisi mai fafo o le a asiasi mai i le atunu’u mo lea fa’amoemoe. 

“E iai tagata mai fafo o le a malaga mai mo ta’aloga nei; e tasi mai Amerika, to’avalu mai Niu Sila ma le to’atasi mai Ausetalia,” o le fa’aaliga lea a Afoa.

“O le mea e manaia ai, ona e o-mai tagata nei ma ‘aumai o latou aiga ma uo ma e foliga mai lava, o le a fa’ato’ateleina pea tagata o le a malaga mai i Samoa i lena taimi.” 

E to’asefulu tagata o le a ‘auai i le tu’uga-a’au, pe 20 nisi o le a fa’ata’amilo i uila-vili-vae i Savai’i ma o le a to’atele atu nisi o le ‘auai i le marafoni.

Ua maua fo’i lea avanoa e fa’alauiloa atu ai le matagofie o le motu-tele o Salafai, ma fa’ailoa atu ai fo’i i le lalolagi, o Upolu, e na o le ‘afa lea o Samoa.

VM
By Vatapuia Maiava, 31 March 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?