Su’esu’e pea e Leoleo le maliu o se teine talavou

PM
By Pai Mulitalo Ale, 22 August 2016

O le Aso Lulu na maua ai e ni ali’i faifaiva se to’alima o Utuali’i, le tino-maliu o se teine-talavou o tafetafea i le sami i gataifale o le afio’aga. Saunoa le So’oupu a le Matagaluega a Leoleo, Su’a Lemamea Tiumalu e fa’apea o le taimi lenei o lo’o fa’aauau ai pea a latou su’esu’ega.

E pei ona ripotia muamua atu ai, o lea tama’ita’i o lo’o taumate po’o ai, e i le va o le 16 – 18 tausaga le matua. 

Na fa’ailoa mai i le Samoa Observer e Sam Taufao, 25 tausaga o Utuali’i e fa’apea, e maua lea tama’ita’i-talavou ua maliu.

 “O matou sa fagogota ae matou va’aia loa se mea o tafetafea i le sami,” o le fa’amatalaga lea a Sam.

“Na matou fa’alatalata atu iai ma iloa, o le tino o se tama’ita’i ua maliu.” 

Na ta’ua, na fa’ate’ia i latou uma ma fefefe ona o lea va’aiga.  “O le mea moni, ua silia i le sefulu tausaga o ‘ou fagota, a o le taimi muamua lea ua ‘ou tau ai i se mea fa’apea i luga o le sami,” o le fa’aaliga lea a Sam. 

ADVERTISEMENT

O Sam sa fagogota ma ona uso e to’atolu ma le uso o lo latou tama, i le afiafi o le Aso Lulu ae tau ai i le tino-maliu.

“E laki lava ona sa matou o-fa’atasi ma le uso o lo’u tama ae semanu e le-taitai tu’ua i luga o le va’a. Atonu pe nonoa lona vae i se maea ae toso i uta i le pa’umātū.”

 “A’o matou fo’i i uta, sa amata ona sau le palapala (toto) i lona isu ma e matua manogi lava,” o lana fa’amatalaga lea.

“O le mea na tupu, ‘ou te le’i moe i le po atoa lea ona ua le-mafai ona ‘ave’esea ona foliga ma lo’u mafaufau. E o’o fo’i i le manogi, na tumau i lo’u isu. “Atonu pen a maliu i le po anapo ae matou te le’i tau iai.” 

Na fa’afeso’ota’i vave le Ofisa o Leoleo ina ua taunu’u i uta le tino-maliu.

“Na ‘ou fa’alogo i ali’i-leoleo sa pu’eina ata o le teine o fa’apea, o ia lea na alu i se va’a mai Matautu,” o le fa’aaliga lea a Sam.t

Na ta’ua fo’i e Sam, e le’i malamalama i le fa’aaliga lea a leoleo ae na ia fa’atoa iloa  mulimuli ane, e iai se teine na sola i se va’a mai le Uafu i Matautu i le taeao lava lea o le Aso Lulu. E le’i maua se fa’amatalaga mai le Matagaluega o Leoleo ananafi, e uiga i lenei mata’upu. 

A’o le taimi nei, o lo’o ta’oto nei lona tino-maliu i le fale-maliu a’o fa’agasolo su’esu’ega a Leoleo.

PM
By Pai Mulitalo Ale, 22 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?