Aoga faapitoa e fesoasoani ai i aafiaga o vailaau ma fualaau faasaina

(OFISA OLE SO’OUPU); E lua vaiaso le umi o se mafutaga faaleaoaoga o loo taimua ai nei le Matagaluega o le Palemia ma le Kapeneta.

O lenei faasoa o le a faaaupegaina ai sui auai ua filifilia mai i Matagaluega a le Malo ma ona itutino e pei o Malu ole malo, Tiute, Femalagaiga, Faamasinoga ma le Soifua Maloloina i tomai faapenei ona po.

O le aoaoga lenei o loo galulue faatasi ai le malo o Samoa faapea foi le malo o Amerika, ina ia unaia ma faamalosia ai le mafai ona tali atu, ma le tuuina atu o le fesoasoani i ia i latou ua afaina, o latou tino aemaise foi o latou mafaufau i le faaogaina o vailaau ma fualaau oona ma faasaina. 

Pei ona silafia e le o toe mafai ona o ese mai Samoa mai le tulaga o le afaina o le toatele o tagata o i latou ua tagofia ma faaogaina fualaau faasaina e le gata i le tino faapena foi le mafaufau ua aafia ai o latou tamaliiaga, faapea foi la ma le va feagai ai ma o latou aiga ma fanau. 

I le saunoaga autu e tatala aloaia ai lenei faamoemoe, saunoa ai le Ofisa Sili ole Matagaluega ale Palemia ma le Kapeneta, Agafili Shem Leo e faapea;

“O le agaga atoa la o le aoaoga, manatua foi o loo iai a ia le lima o le tulafono, e aaapa mai iai i latou o loo faaogaina faasolitulafono fualaau nei, a o le agaga atoa o le aoaoga lenei ina ia ‘ao’aoina ma siitia le tomai ma le agavaa o tatou tagata e mafai ona avatu le fesoasoani e le gata:

(i) ina ia fesoasoani ia i latou e o ese mai i addiction poo le tulaga ua le mafai ona o ese mai, mai le faaogaina o fualaau faasaina.

(ii) ina ia mafai ona fesoasoani e toe faafoi mai i latou i le mafaufau e toe avea ma se tagata e pei o lona soifuaga sa iai."

ADVERTISEMENT

“O le taua atoa la lena, ma o le aoaoga muamua nei o lea ua faatuina i totonu o le atunuu muamua ina ia fesoasoani i o tatou tagata a o le’i oo i se tulaga sili ona leaga ia pe oo a foi ina loka i le falepuipui.”

E tele vaega eseese o le aoaoga e pei;

(i) o le tilotilo i le mafuaga e alai ona addict le tagata, i le faaogaina o fualaau faasaina

(ii) o le galulue faapaga faatasi e le gata i itutino o le malo, o loo ia le Matagaluega a le Palemia, i tulaga tau Immigration, o loo i ai le Customs, o loo iai foi le Matagaluega o le Soifua Maloloina, faapena foi ma le Matagaluega o Faamasinoga, ma tatou paaga mai tua, tatou faalapotopotoga tumaoti, ina ia galulue faatasi e tuuina atu le fesoasoani ia i latou o loo ua aafia ona o le tagofia o fualaau faasaina.

A maea la le le faamoemoe lenei, ua maua ai e o tatou tagata, e mafai ona fesoasoani, pea moomia le fesoasoani ia i latou ua tagofia ma ua iai tulaga ua le mafai ona o ese mai le faaogaina o fualaau faasaina o loo maua le fesoasoani e tuuina atu e sui o le tatou malo ma sui ma faalapotopotoga tumaoti a le malo lea ua aoaoina i le vaiaso lenei ma le vaiaso fou e fesoasoani ai ia i latou.

O le isi vaega tele lea na faamalosia, ina ia silafia, e leai se mea e faigata, e iai le auala e fatinoa ai mea uma, ma o le atunuu lenei o le atunuu e talitonu i le Atua ma faamuamua Iesu i soo se mea. 

Saunoa foi Agafili, o le vaega foi la o le counselling poo le faufautua, ia e le gata i le tomai faaletino, faalemafaufau ma le poto ma le agavaa, ae maualuaga ia le faamuamua o le Atua, e aumai lona Agaga Paia e tuuina atu ai le aoaoga lenei, ma ia faamanatu i tagata, o le tino lenei o le tino o le malumalu o le Agaga Paia, a faalegaa e le tagata ia o le upu a le Afioga a le Atua ia e faaleaga foi. 

E le gata la i le poto ma le tomai aoaoina lelei i le poto faalelalolagi nei, ae taua tele le tuuina o counselling session i ai latou e faamanatu iai o le Atua o ia o le tali o mea uma a, o Iesu o le tali o mea uma, mea la na e taua ina ia paleni ia le tulaga i le aoaoga i le poto masani ma le olaga faakerisiano o le tagata e fesoasoani ‘ai ai ina ia tafiesea ia faafitauli lenei e mafua mai ona o le tagofia o fualaau faasaina.

O le agaga atoa lena o le polokalame, ina ia tatala le avanoa ia i latou, o le isi tulaga lea e manatu iai, e i ai i latou ua aafia e le gata i le mafaufau o le tino o le va feagai ai poo latou va fealoai ma aiga ma fanau ae e le o mafai ona o mai ona o le tulaga e le gata stigmatisation ia poo tulaga i le fefe foi  i le tulaga  faaletulafono, o le agaga la o le polokalame ina ia tuuina atu le avanoa ia i latou, e omai ai i, ma faailoa atu, e mafai ona matou fesoasoani.

O i latou ia o le a aoaoina, o le a mafai ona tuuina atu ai le fesoasoani ia i latou ae le’i oo i se i si tulaga sili atu ona afaina ai, ia ma faasolo atu ai lava ina le mafai ona fofo le faafitauli.

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?