Lauga - “Ia e faia i tagata faapei ona e mana’o e fai mai e tagata ia te oe”

RP
By Rev. Petaia Setu, 07 October 2018

(Mataio. 7:12)

‘O le mea e lelei i Upolu, e lelei foi i Savaii.’ E faamanatu mai pea ia upu a se tasi foi o tamā o le atunuu i aso o lona tulai mai. E agaga i le alofa sauo’o. E tali fiafia i le momoo. E gaua’i i le olaga tutusa. O le faa Samoa e “aumāī” “āvātū” aso uma. Ia paleni le auaunaga ma ona faalumaga, o lalo ma luga. Ia mălie le tagi, ia mălie foi le tali. O upu e faafitifiti ai gagana a le faleupolu, ua le tuua ni lelei… Ioe, a tagi mai le atalii i le fia ‘ai, e te tu atu iai ma le amo? (f.9,10) Fai mai Iesu, “O mea uma foi tou te loto iai ia faia e tagata ia te outou, ia faapea lava ona outou faia ia te i latou.”

O mea lelei. O tatou uma e mana’o i mea lelei. Ua faasolo ina agai atu le lauga a Iesu i lona taufaasiusiuga; a ua atili tupu ai le iloa ma le malamalama o le motu o tagata i le manulauti e tapena ai oe i le malo o le Atua. O le amio. O le amio ia faafailele i le lelei. Ia faatupuina e le lelei. Ia atia’e i le lelei. Ia ola i le lelei; faasoa i le lelei, ma ia atoatoa ona lelei (Mata. 5:48). O le faamalosi foi lea a le aposetolo o Paulo i le ekalesia i Roma, ina ia lelei a latou amio (Rom.12).

E iloa oe i lau amio. E faamatala e le amio lou ituaiga tagata. E pei foi la ona faatonu ma a’oa’o mai ai Iesu i lea vaega o lana lauga. Ua tatou faatuāoia le alofa ua alofa mai ai le Atua ia i tatou. Ua fuapau lou fai mea lelei i ou tagata ma au pā’aga. Ua e faailoga tagata ma faamasino o latou malosiaga. Ua faatauvaa ia te oe le ola na sasaa i le auaunaga Silasila lelei i le lauga a Iesu ma le vaega lea o lana lauga ua tatou iai. E le taamilo le lauga. E le fe’alofa’i. Ae tuu sa’o mai lava i ou va i mata ma o tatou loto ina ia susunu le leaga o loo taataai i lau amio. Le amio ua ’ū. Ua sui lima. Ua faasegosego. Ua vale ai le vaai ma au faaiuga fai. E le o faapea mai Iesu, O “isi” poo “nisi”. Leai. E tuu sa’o mai lava i le tagata agasala, le tagata amio leaga. Fai mai Iesu, “o outou”. Ma le faamatalaina o le ituaiga e iai outou – “e leaga” (f.11) Sena, vaai ifo la’ia ia te oe. Vaai pe le o oe e mătua ai i le vasega lea. Vaai poo oe lea e taulamua ai. Poo oe lea e ta’aa’ina atu ai i le outou lea ua tautino mai e Iesu lava i lona fofoga, o le outou leaga?

E le i soona saunoa Iesu i la ia upu. Ua silafia lelei amio lea o loo fai ma lape i le ola tautua o aso uma. E ioe le loto ae tau tatā solo le mafaufau. E kerisiano le loto, ae le ‘ano’ano le mafaufau. Na ona maua lava e le pupula a Iesu fai mai loa Iesu, e leaga! Tou te ilo le lelei mo outou ae faapefea le lava loa o tagata? Tou te iloa la’u mea lelei ma a outou fanau ma o outou aiga ae faapefea le nuu? Faapefea le atunuu? O ā fā āu le Ekalesia? Oi, na ona ‘ai ma ta’oto, ‘ai ma ta’oto, ae faapefea ona ola le lāina ma le maalili? Na fai le matou toonai ma le aulotu i Savaii i se tasi Aso Sa. Aumai uma vaega o le manufata tufa i le laulau a toeaiina. Ae toe tapa mai foi i le auvae a lalo. Sōlē e, e tele foi mea o le ’ai uma o mea lelei ae toe mana’o mai fo’i i le auvae alalo, ae ’ai la e tama le ā?

Tatou ia o loo pulea soo se galuega, ma tatou ia e tele ina usu atu e eva, faamata e le o oe tonu lava lea e tautala iai Iesu – e leaga? Tele mea e maualuluga ma lelei o outou totogi, ae toe faomalo foi i pasene o siitaga, ae faapefea le au faigaluega o loo tauamoa le mamafa? Outou e leaga! E faapefea ona faamălie le galala? Fai mai Iesu, ia paleni lelei mea uma. Ia tutusa mea e te mana’o iai e fai mai e nisi tagata ia te oe, ma mea lelei e te faiai foi mo latou. O le faatonuga lena a Iesu. Ae le o le usu o oe fai ou taaloga i lau komipiuta i lou ofisa, ae selesele i le afu ma le ola o le faiaoga o loo femoea’i solo i vasega e fia e tau faasoa ona taimi i tamaiti ma o latou manaoga. Pologa isi e su”e mea e faalelei ai le Manu Samoa ae folo pakakō  a e oe ae tuli le tautua loto nuu o loo punou faamaoni I le alofa I le atunuu!

ADVERTISEMENT

Le au uso e, o upu a le Valasi i tu’itu’i o lona alii, “E ā oe nei, e ā a’u taeao.” E faamasinoina oe i lau amio. O la Paulo, “’Aua ne’i faatoilaloina oe i le leaga, a ia ’e faatoilaloina le leaga i le lelei.” (Rom. 12:21). E te mafaia? A e iloa o le amio lea e tautala iai Iesu o le amio Atua, ma talia i lou loto le a’oa’o mai o le Alii ia i tatou, ona mautinoa lea o lou faamoemoe i le malo o le Atua e ala i lau amio paia ma le tausaafia. ’Aua le faufau i tofi ma tupe. O la Paulo ia Timoteo, O le amio Atua ma le loto mălie, o le oloa tele lava lea. (I Timo. 6:6) 

Le au uso e, ua tele o tatou manao. Ua tatou manana’o e faapea ma faapea ona tau’ai loa lea i le au faigaluega ma tauanau lona taunuuga! E iai foi le faautautaga faale atunuu, e fai foi o le i’a, ae manumanu foi i le upega. O le upu foi a se tasi tamā faifeau ua lagomau mai i tia sa, “Aua ne i galo, o lo tatou naunau tele foi ia lelei se mea, ae galo ai o loo iai faatasi ma o tatou sesē. “Le au uso e, tatou te tūlia le lauamanu, ae taga’i i le faamuli o ātu. E aumā na tikerī? O tatou uma na popoto mai i le loto nuu ma le faamaoni o nai toeaiina ma loomatutua, sa tautua ai i le Atua ma lo tatou malo i o latou faiva faafaiaoga. Ou te faamanatu atu le upu a se tasi o taitai o le Ekalesia e faapea, “Le Ekalesia e, ua tele a tatou faifeau popoto ma fai faailoga maualuluga; ae fia maua ni faifeau e faamaoni.

Samoa e, ua tumu lo tatou atunuu i le au popoto ma le au fai faailoga. Ua fanau mai ai le mau talitonuga ma le anoanoa’i o amioga! Ae o loo fia maua e le atunuu ni tagata faamaoni. O loo fia maua e Samoa ni tagata alolofa. Ni tagata e faalogo ma usitai i le Atua. Manaomia ni tagata faautauta ma pulea lelei le amio. E le poto se tamaitiiti i sou tikerī; e poto i lou faamaoni. La lea ua tausili uma i faailoga, ona tagisā lea i totogi a o le galuega, e oti atoa lona faatinoga. O ai e tuua’ina? O outou e leaga! Outou o loo faia tonu ma fuafuaina. Ia e faia i tagata faapei ona e mana’o e fai mai e tagata ia te oe. Afai tatou te manana’o ia lelei ona fai e tagata o galuega, ia iloa foi la ona fai lelei tagata o loo faatinoina a tatou galuega. Ia faautauta i lau amio. ’Aua le soona masau, a ia iloa faafua tatau.

Samoa e, o le alofa e faavae ai mea uma. E afua ai le faamaoni, le onosai, le tō’aga, le mataala. E fanau mai le lelei i le alofa. Fai mai Paulo i le ekalesia i Kolose, “…e lautua i mea uma” (Kol. 3:14), i le ekalesia i Korinito, “o le sili o na mea o le alofa lea.” (I Kori. 13:13). E faatonu e le alofa le amio; ona fotu mai ai lea o le loto mălie, o le fiafia, o manatu mamā, o le fai mea lelei, ma le tausia tutusa o tagata uma. Ia manatua, e le i faaolaina oe ma a’u e Iesu i sona poto poo ni faailoga, a o lona faamaoni ma lona alofa.

Samoa e, o le manuia lea o loo ta’oto ai le malo ma le Ekalesia, fia maua ni pulega alolofa ma ni au faigaluega faamaoni. Ae a oe? O ’e mālōlōina poo ’e taoto ai foi i le gasegase lea? Manatua, o le mea e lelei ia te oe ma lau fanau, e lelei foi i aiga uma ma le atunuu. O le faamanatu – Ia e faia i tagata e faapei ona e mana’o e faia e tagata ia te oe.

                                      

Amene.

7737063

RP
By Rev. Petaia Setu, 07 October 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?