O LE TALA O LE ‘IETOGA

FN
By Fuimaono Na’oia Faasavalu Touli F. Tupua, 31 March 2016

Ona toe faapea lea o le Alii-Talofa e ia Lautivunia-ua tele aso o leiloa, ae lelei ona outou o i Toga e su’e.Ona o lea ua su’e i Fiti ma motu uma lava o Tonga, ae ua le maua lava. Ona sau ai lea o le su’ega i Samoa.

Ona afe lea o le vaa i Falefa. Ona alu ane lea o le isi tamaloa e utuvai. E faalogo atu Leutelelei’ite  o asa mai le tagata i le vai. Ona faapea lea o le alii: O le tagata o loo utu vai-ua le tauilo vai o tagata folau.

Ua toe faalogo atu Leutelelei’ite  i le tagata o asa i le vai-ona faapea lea o lana upu-‘Ua le tauilo vae o tagata folau-ua asa sasae le vai’. Ona toe alu lea o le vaa i Tonga. Ua fesili le Tuitoga pe o fea o i ai Lautivunia?

Tali tagata Tonga-“Ua le iloa.”Ae tasi le tagata o loo i Samoa na fai mai lana tala ina ua matou o ane i le vai…! Ona toe fai atu lea o le Tuitoga-“Toe foi le vaa i Samoa ma ia taunuu ia Leutele-na te ta’u mai-poo fea o i ai Lauativunia.

Ona toe foi mai lea o le vaa i Samoa ma fesili ia Leutele-Poo fea o i ai Lautivunia-pe na te iloa? Ona fai atu lea o Leutele-“Ō ina aumai tagata Samoa o loo i Tonga. A o’o mai-ona ‘ou ta’u atu lea o le mea o loo i ai Lautivunia.

Ona alu lea o le va’a ua aumai tagata Samoa sa i Tonga. Ona fai atu lea o Leutelelei’iite e faapea: O le a ta’u atu le mea o i ai Lautivunia! Ona fai ai lea o le ‘lafofua’ e Leutele’i’ite : “E to’iē! La to’iē! O Mulioaiga; Sa foua (nei) e le Lautivunia; Sa pa niu-ae na ia sopoia; sa pa filimoto ae na ia laasia-O tuna ma ula o loo pi’ia le pola-O puga ma one-o taea le otaota;

O Leatoia  ma Leagonia- o fono o le ‘ava a Tuitoga na lua molia-O le lau o le fiso ma le lau o le tolo na ia aumaia-Ua tago i ai le Tuitoga ma na saesaeia-ma ia nutinutia ma togi i fafo-pe ni a ia? O se fotu i ‘ulumanu’a na ia loma’ia;

O se tifitifi na ia foloolaina-le laufanua o Toga na ia telea’ia. Le Tuitoga e -ua e faasulu lava pasia o falala! Ona fai atu lea o Leutelelei’ite-O mai inā o-o Lautivunia o loo tanu faatu lava i le vaiva’a o le Aniva.

ADVERTISEMENT

Ona o ai lea o Tonga-ua eli le mea na ta’u atu e Leuteleleiite i le vaiva’a-ona maua ai lea o Lautivunia. Ona sau lea o le folauga a le afafine o le Tuitoga-taunuu i Amoa i Savaii. Ona faa-uo lea o le afafine o le Tuitoga ma le Alii o Amoa.

Ona fai lea o a la talanoaga-ma ua faapea atu le teine. “O loo i ai le ‘ietoga na avatu e fafine Samoa i lo’u tama- e matua lelei lava. Ona fai atu lea o le alii-‘E mafai ona e poloa’i i ai e aumai le ‘Ie? Ona fai mai lea o le teine-e mafai ona aumai.

Ona tusi lea i ai o le teine-ona aumai lea o le ‘ie taunuu i Savaii-ua igoa o le ‘ietoga’-ona ua toe aumai mai Tonga. Ona fai ai lea o le Fale Lalaga i Amoa ma faata’ita’i ai le faiga o le ‘ie mai Toga.

 

O LE TALA I LE MUMUA I FAGASA:

Na sau le folauga a Li’avaa mai sasa’e. Ona taunuu lea i Fagasa. O le masani a lea alii e inu ‘ava lava i le vasa. Ona fai atu lea i lona afafine o Sina-“Funa e-alu ia ina utu vai o le ‘ava. Ona alu lea o le teine ua utu vai.

Ua o’o i le isi taimi-ona fai atu lea o le alii-e faae’e le vaa. Ona alu lea o le vaa-ua matua mamao mai Samoa. Ona fai atu lea o Li’avaa ia Sina-mama se ‘ava-a’o Sina ua galo i Fagasa. E sau ma lana utuga-vai-ua alu le vaa-ona a’au ane lea o Sina i tai i le a’au-ona ta’ei ai lea o ana vai.

Toe fai atu Liavaa ia Sina-mama se ‘ava.Ona su’e mai lea e le ‘auvaa ua leai se tamaitai.Ona latou ta’u atu lea i le alii-‘Ua galo Sina i le nuu sa tatou i ai! Ona tu lea i luga o Li’avaa-ma fai atu i le ‘auvaa-‘Afai ua galo Sina-ia outou o i le nuu ua galo ai Sina e pei outou o ni i’a.

Ua laga le ‘auvaa ma tulioso i lalo- ua tago le tagata ia i lana nonu ma lana fa’i. Ua feausi ma taunuu i le nuu na galo ai Sina. Ona liu mumua uma lava lea o le ‘auvaa; a’o Sina ua tu atu i uta ma le ilitea ma talo mai ia vave atu i uta.

Ua taunuu mai i le matafaga-ona o atu lea o le nuu la’u mai i uta-e aumai ae taufai tagi. A vaai mai mumua o ‘u’u atu se laau a se tagata e ta ai- ona ‘emo’emo vale lava lea o latou mata e pei o mata o le tagata.

A maua mai la ia i’a- ona tuu lea i lotoama’a ma e ta’itolu masina o auaua’i. E oo mai lava i aso nei- o loo a’e lava i uta ia ia i’a i tausaga uma.

FN
By Fuimaono Na’oia Faasavalu Touli F. Tupua, 31 March 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?